'ਨਾ ਕਦੇ ਟੁੱਟੀ ਹੱਡੀ, ਨਾ ਹਸਪਤਾਲ ਗਈ', ਦੁਨੀਆ ਦੀ ਸਭ ਤੋਂ ਬਜ਼ੁਰਗ ਇਨਸਾਨ ਦੀ ਮੌਤ

ਮੈਡ੍ਰਿਡ : ਦੁਨੀਆ ਦੀ ਸਭ ਤੋਂ ਬਜ਼ੁਰਗ ਵਿਅਕਤੀ ਮਾਰੀਆ ਬ੍ਰਾਨਿਆਸ ਮੋਰੇਰਾ ਦਾ ਦੇਹਾਂਤ ਹੋ ਗਿਆ। ਉਸ ਦੇ ਪਰਿਵਾਰ ਨੇ ਇਹ ਜਾਣਕਾਰੀ ਦਿੱਤੀ। ਉਸਦਾ ਜਨਮ ਸੰਯੁਕਤ ਰਾਜ ਵਿੱਚ ਹੋਇਆ ਸੀ ਅਤੇ ਉਸਨੇ ਦੋਵੇਂ ਵਿਸ਼ਵ ਯੁੱਧ ਦੇਖੇ ਸਨ। ਮੋਰੇਰਾ ਦੀ ਮੰਗਲਵਾਰ ਨੂੰ ਸਪੇਨ ਵਿੱਚ 117 ਸਾਲ ਦੀ ਉਮਰ ਵਿੱਚ ਮੌਤ ਹੋ ਗਈ।

ਇਸ ਸਬੰਧੀ ਉਸ ਦੇ ਪਰਿਵਾਰ ਨੇ ਸੋਸ਼ਲ ਨੈੱਟਵਰਕ ਐਕਸ 'ਤੇ ਆਪਣੇ ਅਕਾਊਂਟ 'ਤੇ ਲਿਖਿਆ ਕਿ ਮਾਰਿਆ ਸਾਨੂੰ ਛੱਡ ਕੇ ਚਲੀ ਗਈ ਹੈ, ਉਹ ਸ਼ਾਂਤੀ ਨਾਲ ਤੇ ਬਿਨਾਂ ਕਿਸੇ ਦਰਦ ਦੇ ਦੁਨੀਆ ਤੋਂ ਚਲੀ ਗਈ। ਅਸੀਂ ਉਨ੍ਹਾਂ ਦੀ ਸਲਾਹ ਤੇ ਉਨ੍ਹਾਂ ਦੀ ਦਿਆਲਤਾ ਨੂੰ ਹਮੇਸ਼ਾ ਯਾਦ ਰੱਖਾਂਗੇ।

ਬ੍ਰੈਨਿਆਸ ਪਿਛਲੇ ਦੋ ਦਹਾਕਿਆਂ ਤੋਂ ਉੱਤਰ-ਪੂਰਬੀ ਸਪੇਨ ਦੇ ਓਲੋਟ ਸ਼ਹਿਰ ਵਿੱਚ ਸਾਂਤਾ ਮਾਰੀਆ ਡੇਲ ਟੂਰਾ ਨਰਸਿੰਗ ਹੋਮ ਵਿੱਚ ਰਹਿ ਰਹੀ ਸੀ। ਉਨ੍ਹਾਂ ਨੇ ਮੰਗਲਵਾਰ ਨੂੰ ਆਪਣੇ ਪਰਿਵਾਰ ਵੱਲੋਂ ਇਸਤੇਮਾਲ ਕੀਤੇ ਜਾ ਰਹੇ ਆਪਣੇ ਐਕਸ ਅਕਾਊਂਟ 'ਤੇ ਲਿਖਿਆ ਕਿ ਮੈਂ ਕਮਜ਼ੋਰ ਮਹਿਸੂਸ ਕਰਦੀ ਹਾਂ। ਸਮਾਂ ਨੇੜੇ ਆ ਗਿਆ ਹੈ। ਰੋਣਾ ਨਹੀਂ, ਮੈਨੂੰ ਹੰਝੂ ਪਸੰਦ ਨਹੀਂ ਹਨ ਅਤੇ ਸਭ ਤੋਂ ਵੱਧ, ਮੇਰੇ ਲਈ ਦੁੱਖ ਨਾ ਕਰੋ, ਮੈਂ ਜਿੱਥੇ ਵੀ ਜਾਵਾਂਗੀ, ਮੈਂ ਖੁਸ਼ ਰਹਾਂਗੀ।

ਜਾਪਾਨ ਦੇ ਟੋਮੀਕੋ ਬਣੇ ਦੁਨੀਆ ਦੇ ਸਭ ਤੋਂ ਬਜ਼ੁਰਗ ਵਿਅਕਤੀ
118 ਸਾਲ ਦੀ ਉਮਰ ਵਿਚ ਫ੍ਰੈਂਚ ਨਨ ਲੂਸੀਲ ਰੈਂਡਨ ਦੀ ਮੌਤ ਤੋਂ ਬਾਅਦ, ਗਿਨੀਜ਼ ਵਰਲਡ ਰਿਕਾਰਡਸ ਨੇ ਅਧਿਕਾਰਤ ਤੌਰ 'ਤੇ ਜਨਵਰੀ 2023 ਵਿੱਚ ਬ੍ਰੈਨਿਆਸ ਨੂੰ ਦੁਨੀਆ ਦੇ ਸਭ ਤੋਂ ਬਜ਼ੁਰਗ ਵਿਅਕਤੀ ਵਜੋਂ ਸਵੀਕਾਰ ਕੀਤਾ। ਅਮਰੀਕਨ ਗੇਰੋਨਟੋਲੋਜੀ ਰਿਸਰਚ ਗਰੁੱਪ ਦੇ ਅਨੁਸਾਰ, ਬ੍ਰੈਨਿਆਸ ਦੀ ਮੌਤ ਤੋਂ ਬਾਅਦ, ਦੁਨੀਆ ਵਿੱਚ ਸਭ ਤੋਂ ਵੱਧ ਉਮਰ ਦੇ ਜੀਵਤ ਵਿਅਕਤੀ ਜਾਪਾਨ ਦੇ ਟੋਮੀਕੋ ਇਤਸੁਕਾ ਹਨ, ਜਿਨ੍ਹਾਂ ਦਾ ਜਨਮ 23 ਮਈ, 1908 ਨੂੰ ਹੋਇਆ ਸੀ ਅਤੇ ਉਨ੍ਹਾਂ ਦੀ ਉਮਰ 116 ਸਾਲ ਹੈ।

2020 ਵਿੱਚ ਹੋਇਆ ਸੀ ਕੋਰੋਨਾ
ਜਾਣਕਾਰੀ ਮੁਤਾਬਕ ਬ੍ਰੈਨਿਆਸ 1918 ਦੇ ਫਲੂ, ਪਹਿਲੇ ਵਿਸ਼ਵ ਯੁੱਧ ਅਤੇ ਦੂਜੇ ਵਿਸ਼ਵ ਯੁੱਧ ਅਤੇ ਸਪੇਨ ਦੀ ਘਰੇਲੂ ਜੰਗ ਵਿੱਚੋਂ ਲੰਘੀ ਸੀ। ਉਹ 2020 ਵਿੱਚ ਆਪਣੇ 113ਵੇਂ ਜਨਮਦਿਨ ਤੋਂ ਕੁਝ ਹਫ਼ਤਿਆਂ ਬਾਅਦ ਕੋਵਿਡ -19 ਨਾਲ ਸੰਕਰਮਿਤ ਹੋ ਗਈ ਸੀ ਅਤੇ ਘਰ ਵਿੱਚ ਆਪਣੇ ਕਮਰੇ ਵਿੱਚ ਸੀਮਤ ਸੀ, ਪਰ ਪੂਰੀ ਤਰ੍ਹਾਂ ਠੀਕ ਹੋ ਗਈ ਸੀ।

'ਨਾ ਹਸਪਤਾਲ ਗੀ, ਨਾ ਕੋਈ ਹੱਡੀ ਟੁੱਟੀ'
ਉਸਦੀ ਸਭ ਤੋਂ ਛੋਟੀ ਧੀ, ਰੋਜ਼ਾ ਮੋਰੇਟ, ਨੇ ਇੱਕ ਵਾਰ ਆਪਣੀ ਮਾਂ ਦੀ ਲੰਬੀ ਉਮਰ ਦਾ ਸਿਹਰਾ ਜੈਨੇਟਿਕਸ ਨੂੰ ਦਿੱਤਾ। ਉਸ ਨੇ ਕਿਹਾ ਕਿ ਉਹ ਕਦੇ ਹਸਪਤਾਲ ਨਹੀਂ ਗਈ, ਉਸ ਦੀ ਕਦੇ ਕੋਈ ਹੱਡੀ ਨਹੀਂ ਟੁੱਟੀ, ਉਹ ਸਾਰੀ ਉਮਰ ਠੀਕ ਰਹੀ, ਉਨ੍ਹਾਂ ਨੂੰ ਕੋਈ ਦਰਦ ਨਹੀਂ ਸੀ। ਮੋਰੇਟ ਨੇ 2023 ਵਿੱਚ ਖੇਤਰੀ ਕੈਟਲਨ ਟੈਲੀਵਿਜ਼ਨ ਨੂੰ ਦੱਸਿਆ।