ਗੰਜੇਪਨ ਤੋਂ ਛੁਟਕਾਰਾ ਦਿਵਾਉਂਦਾ ਹੈ ਇਹ ਅਨੋਖਾ ਮੰਦਰ! ਦੁਨੀਆ ਭਰ ਤੋਂ ਆਉਂਦੇ ਹਨ ਸ਼ਰਧਾਲੂ

ਵੈੱਬ ਡੈਸਕ- ਦੁਨੀਆ ਭਰ 'ਚ ਕਰੋੜਾਂ ਲੋਕ ਵਾਲਾਂ ਦੇ ਝੜਨ ਅਤੇ ਗੰਜੇਪਨ ਦੀ ਸਮੱਸਿਆ ਤੋਂ ਪਰੇਸ਼ਾਨ ਹਨ, ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਜਾਪਾਨ 'ਚ ਇਕ ਅਜਿਹਾ ਮੰਦਰ ਵੀ ਹੈ ਜਿੱਥੇ ਲੋਕ ਖਾਸ ਤੌਰ ‘ਤੇ ਆਪਣੇ ਵਾਲਾਂ ਦੀ ਸਲਾਮਤੀ ਲਈ ਅਰਦਾਸ ਕਰਨ ਆਉਂਦੇ ਹਨ? ਜਾਪਾਨ ਦੇ ਸੱਭਿਆਚਾਰਕ ਕੇਂਦਰ ਕਿਓਟੋ ਸ਼ਹਿਰ 'ਚ ਸਥਿਤ ਮਿਕਾਮੀ ਸ਼੍ਰਾਇਨ (Mikami Shrine) ਆਪਣੀ ਇਸ ਅਨੋਖੀ ਆਸਥਾ ਕਰਕੇ ਦੁਨੀਆ ਭਰ 'ਚ ਪ੍ਰਸਿੱਧ ਹੈ। ਗੰਜੇਪਨ ਜਾਂ ਵਾਲਾਂ ਦੇ ਝੜਨ ਤੋਂ ਤੰਗ ਲੋਕ ਇੱਥੇ ਮੰਨਤਾਂ ਮੰਗਣ ਆਉਂਦੇ ਹਨ। ਆਰਾਸ਼ਿਆਮਾ ਬੈਂਬੂ ਫਾਰੈਸਟ (Arashiyama Bamboo Forest) ਦੇ ਨੇੜੇ ਸਥਿਤ ਇਹ ਮੰਦਰ ਉਨ੍ਹਾਂ ਲਈ ਆਸ ਦੀ ਕਿਰਣ ਹੈ, ਜੋ ਸੰਘਣੇ ਅਤੇ ਸੁੰਦਰ ਵਾਲਾਂ ਦੀ ਇੱਛਾ ਰੱਖਦੇ ਹਨ।

ਕੌਣ ਹਨ ‘ਕਾਮੀ’ ਤੇ ਕੀ ਹੈ ਇਤਿਹਾਸ?

ਇਹ ਮੰਦਰ ਜਾਪਾਨੀ ਦੇਵਤਾ ਫੁਜੀਵਾਰਾ ਉਨੇਮੇਨੋਸੁਕੇ ਮਸਾਯੂਕੀ (Fujiwara Unemenosuke Masayuki) ਨੂੰ ਸਮਰਪਿਤ ਹੈ। ਮੰਨਿਆ ਜਾਂਦਾ ਹੈ ਕਿ ਮਸਾਯੂਕੀ ਜਾਪਾਨ ਦੇ ਇਤਿਹਾਸ ਦੇ ਪਹਿਲੇ ਪੇਸ਼ੇਵਰ ਹੇਅਰ ਸਟਾਈਲਿਸਟ ਸਨ। ਵਾਲਾਂ ਦੀ ਦੇਖਭਾਲ ਅਤੇ ਸਟਾਈਲਿੰਗ 'ਚ ਉਨ੍ਹਾਂ ਦੀ ਮਹਾਰਤ ਇੰਨੀ ਪ੍ਰਸਿੱਧ ਹੋਈ ਕਿ ਲੋਕਾਂ ਨੇ ਉਨ੍ਹਾਂ ਨੂੰ ਦੇਵਤਾ ਦਾ ਦਰਜਾ ਦੇ ਦਿੱਤਾ। ਹਰ ਸਾਲ 17 ਤਰੀਕ ਨੂੰ ਉਨ੍ਹਾਂ ਦੀ ਬਰਸੀ ਮਨਾਈ ਜਾਂਦੀ ਹੈ। ਇਸ ਸਮੇਂ ਸੀ, ਜਦੋਂ ਇਸ ਦਿਨ ਜਾਪਾਨ ਦੇ ਸਾਰੇ ਸੈਲੂਨ ਉਨ੍ਹਾਂ ਦੇ ਸਨਮਾਨ 'ਚ ਬੰਦ ਰੱਖੇ ਜਾਂਦੇ ਸਨ।

ਪੂਜਾ ਦੀ ਅਨੋਖੀ ਰਸਮ

ਮਿਕਾਮੀ ਸ਼੍ਰਾਇਨ 'ਚ ਪੂਜਾ ਕਰਨ ਦਾ ਢੰਗ ਆਮ ਮੰਦਰਾਂ ਤੋਂ ਬਿਲਕੁਲ ਵੱਖਰਾ ਹੈ। ਸ਼ਰਧਾਲੂ ਸਭ ਤੋਂ ਪਹਿਲਾਂ ਮੰਦਰ ਤੋਂ ਇਕ ਖਾਸ ‘ਪ੍ਰੇਅਰ ਐਨਵੈਲਪ’ ਖਰੀਦਦੇ ਹਨ। ਮੰਦਰ ਦੇ ਪੂਜਾਰੀ ਸ਼ਰਧਾਲੂ ਦੇ ਸਿਰ ਤੋਂ ਵਾਲਾਂ ਦੀ ਇਕ ਛੋਟੀ ਲਟ ਕੱਟ ਕੇ ਉਸ ਲਿਫਾਫੇ 'ਚ ਸੰਭਾਲ ਕੇ ਰੱਖਦੇ ਹਨ। ਇਸ ਤੋਂ ਬਾਅਦ ਵਿਅਕਤੀ ਦੇਵਤਾ ਮਸਾਯੂਕੀ ਅੱਗੇ ਆਪਣੇ ਵਾਲਾਂ ਨੂੰ ਸਿਹਤਮੰਦ ਅਤੇ ਸੰਘਣਾ ਬਣਾਏ ਰੱਖਣ ਲਈ ਅਰਦਾਸ ਕਰਦਾ ਹੈ। ਅੰਤ 'ਚ ਇਹ ਲਿਫਾਫਾ ਪੁਜਾਰੀ ਨੂੰ ਸੌਂਪ ਦਿੱਤਾ ਜਾਂਦਾ ਹੈ, ਜੋ ਵਿਸ਼ੇਸ਼ ਅਨੁਸ਼ਠਾਨ ਕਰਦੇ ਹਨ।

ਬਿਊਟੀ ਐਕਸਪਰਟਾਂ ਅਤੇ ਵਿਦਿਆਰਥੀਆਂ ਲਈ ਖਾਸ ਥਾਂ

ਇਹ ਮੰਦਰ ਸਿਰਫ਼ ਆਮ ਲੋਕਾਂ ਲਈ ਹੀ ਨਹੀਂ, ਸਗੋਂ ਪੇਸ਼ੇਵਰਾਂ ਲਈ ਵੀ ਬਹੁਤ ਮਹੱਤਵਪੂਰਨ ਹੈ। ਜਾਪਾਨ ਦੇ ਮਸ਼ਹੂਰ ਹੇਅਰ ਸਟਾਈਲਿਸਟ ਅਤੇ ਬਿਊਟੀ ਐਕਸਪਰਟ ਇੱਥੇ ਆਸ਼ੀਰਵਾਦ ਲੈਣ ਆਉਂਦੇ ਹਨ। ਨੈਸ਼ਨਲ ਬਾਰਬਰ ਜਾਂ ਬਿਊਟੀਸ਼ੀਅਨ ਲਾਇਸੈਂਸ ਦੀ ਪ੍ਰੀਖਿਆ ਦੇਣ ਵਾਲੇ ਵਿਦਿਆਰਥੀ ਵੀ ਕਾਮਯਾਬੀ ਲਈ ਇੱਥੇ ਮੱਥਾ ਟੇਕਦੇ ਹਨ।

ਆਸਥਾ ਅਤੇ ਵਿਗਿਆਨ

ਵਿਗਿਆਨਕ ਨਜ਼ਰੀਏ ਨਾਲ ਵੇਖਿਆ ਜਾਵੇ ਤਾਂ ਮੰਦਰ ਜਾਣ ਨਾਲ ਸਿੱਧੇ ਤੌਰ ‘ਤੇ ਵਾਲ ਉੱਗਣਾ ਸੰਭਵ ਨਹੀਂ ਲੱਗਦਾ, ਪਰ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇੱਥੇ ਮਿਲਣ ਵਾਲੀ ਸ਼ਾਂਤੀ ਅਤੇ ਮਨੋਬਲ ਤਣਾਅ ਘਟਾਉਂਦਾ ਹੈ। ਕਿਉਂਕਿ ਤਣਾਅ ਵਾਲਾਂ ਦੇ ਝੜਨ ਦਾ ਇਕ ਮੁੱਖ ਕਾਰਨ ਹੈ, ਇਸ ਲਈ ਲੋਕਾਂ ਨੂੰ ਇੱਥੇ ਆ ਕੇ ਅਸਿੱਧੇ ਤੌਰ ‘ਤੇ ਲਾਭ ਮਹਿਸੂਸ ਹੁੰਦਾ ਹੈ। ਅੱਜ ਮਿਕਾਮੀ ਸ਼੍ਰਾਇਨ ਨਾ ਸਿਰਫ਼ ਇਕ ਧਾਰਮਿਕ ਸਥਾਨ ਹੈ, ਸਗੋਂ ਕਿਓਟੋ ਆਉਣ ਵਾਲੇ ਸੈਲਾਨੀਆਂ ਲਈ ਵੀ ਇਕ ਵੱਡਾ ਆਕਰਸ਼ਣ ਬਣ ਚੁੱਕਾ ਹੈ।