ਉੱਤਰ ਕੋਰੀਆ ਨੇ 1,500 ਕਿਲੋਮੀਟਰ ਦੀ ਦੂਰੀ ਵਾਲੀ ਮਿਜ਼ਾਈਲ ਦਾ ਕੀਤਾ ਪ੍ਰੀਖਣ

ਸਿਓਲ- ਉੱਤਰ ਕੋਰੀਆ ਨੇ ਕਿਹਾ ਹੈ ਕਿ ਹਫਤੇ ਦੇ ਅਖ਼ੀਰ ਵਿਚ ਉਸਨੇ ਨਵੀਂ ਵਿਕਸਿਤ ਲੰਬੀ ਦੂਰੀ ਦੀ ਕਰੂਜ਼ ਮਿਜ਼ਾਈਲ ਦਾ ਸਫਲ ਪ੍ਰੀਖਣ ਕੀਤਾ ਹੈ। ਬੀਤੇ ਕਈ ਮਹੀਨਿਆਂ ਵਿਚ ਉਸਦੇ ਵਲੋਂ ਪ੍ਰੀਖਣ ਦੀ ਇਹ ਪਹਿਲੀ ਜਾਣੂ ਸਰਗਰਮੀ ਹੈ ਜੋ ਰੇਖਾਬੱਧ ਕਰਦੀ ਹੈ ਕਿ ਕਿਸ ਤਰ੍ਹਾਂ ਅਮਰੀਕਾ ਨਾਲ ਪ੍ਰਮਾਣੂ ਗੱਲਬਾਤ ਵਿਚ ਅੜਿੱਕੇ ਦਰਮਿਆਨ ਉੱਤਰ ਕੋਰੀਆ ਫੌਜੀ ਸਮਰੱਥਾਵਾਂ ਦਾ ਵਿਸਥਾਰ ਕਰ ਰਿਹਾ ਹੈ। ਕੋਰੀਅਨ ਸੈਂਟਰਲ ਨਿਊਜ਼ ਏਜੰਸੀ ਨੇ ਸੋਮਵਾਰ ਨੂੰ ਕਿਹਾ ਕਿ ਕਰੂਜ਼ ਮਿਜ਼ਾਈਲ ਵਿਕਸਿਤ ਕਰਨ ਦਾ ਕੰਮ ਬੀਤੇ ਦੋ ਸਾਲ ਤੋਂ ਚਲ ਰਿਹਾ ਸੀ ਅਤੇ ਸ਼ਨੀਵਾਰ ਤੇ ਐਤਵਾਰ ਨੂੰ ਪ੍ਰੀਖਣ ਦੌਰਾਨ ਇਸਨੇ 1,500 ਕਿਲੋਮੀਟਰ ਦੂਰ ਸਥਿਤ ਟੀਚੇ ’ਤੇ ਸਫਲਤਾਪੂਰਵਕ ਮਾਰ ਕੀਤੀ।

ਉੱਤਰ ਕੋਰੀਆ ਨੇ ਨਵੀਆਂ ਮਿਜ਼ਾਈਲਾਂ ਨੂੰ ‘ਬੇਹੱਦ ਮਹੱਤਵਪੂਰਨ ਰਣਨੀਤਕ ਹਥਿਆਰ’ ਦੱਸਿਆ ਜੋ ਦੇਸ਼ ਦੇ ਨੇਤਾ ਕਿਮ ਜੋਂਗ ਉਨ੍ਹਾਂ ਦੀ ਫੌਜ ਨੂੰ ਮਜ਼ਬੂਤ ਕਰਨ ਦਾ ਸੱਦੇ ਦੇ ਅਨੁਰੂਪ ਹੈ। ਦੱਖਣੀ ਕਰੀਆ ਦੀ ਫੌਜ ਨੇ ਉੱਤਰ ਕੋਰੀਆ ਵਲੋਂ ਮਿਜ਼ਾਈਲ ਪ੍ਰੀਖਣ ਕਰਨ ਦੀ ਅਜੇ ਪੁਸ਼ਟੀ ਨਹੀਂ ਕੀਤੀ ਹੈ।
ਜਾਪਾਨ ਨੂੰ ਕੋਈ ਨੁਕਸਾਨ ਨਹੀਂ

ਜਾਪਾਨ ਦਾ ਕਹਿਣਾ ਹੈ ਕਿ ਉੱਤਰ ਕੋਰੀਆ ਦੇ ਨਵੀਂ ਮਿਜ਼ਾਈਲ ਦੇ ਪ੍ਰੀਖਣ ਦਾ ਉਸਦੇ ਹਵਾਈ ਖੇਤਰ, ਜਲ ਖੇਤਰ ਅਤੇ ਵਿਸ਼ੇਸ਼ ਆਰਥਿਕ ਖੇਤਰ ’ਤੇ ਕੋਈ ਅਸਰ ਨਹੀਂ ਪਵੇਗਾ। ਰੂਸੀ ਵਿਦੇਸ਼ ਮਾਮਲਿਆਂ ਦੀ ਕਮੇਟੀ ਦੇ ਪਹਿਲੇ ਉਪ ਪ੍ਰਧਾਨ ਵਲਾਦਿਮੀਰ ਦਬਾਰੋਵ ਨੇ ਕਿਹਾ ਕਿ ਉੱਤਰ ਕੋਰੀਆ ਦੇ ਕਰੂਜ ਮਿਜ਼ਾਈਲ ਪ੍ਰੀਖਣ ਨਾਲ ਰੂਸੀ ਖੇਤਰ ਲਈ ਕੋਈ ਖਤਰਾ ਪੈਦਾ ਨਹੀਂ ਹੈ ਪਰ ਇਸ ਨਾਲ ਦੂਰ-ਦੁਰਾਡੇ ਪੂਰਬੀ ਖੇਤਰ ਵਿਚ ਤਣਾਅ ਵਧ ਗਿਆ ਹੈ। ਜਾਪਾਨ ਅਤੇ ਅਮਰੀਕਾ ਇਸ ਪ੍ਰੀਖਣ ਤੋਂ ਬੇਚੈਨ ਹਨ। ਅਜਿਹੇ ਪ੍ਰੀਖਣ ਸਬੰਧਾਂ ਅਤੇ ਸਥਿਤੀ ਸੁਧਾਰਣ ਵਿਚ ਆਪਣਾ ਯੋਗਦਾਨ ਨਹੀਂ ਦੇ ਸਕਦੇ।

ਉੱਤਰ ਕੋਰੀਆ ਦੀ ਫੌਜੀ ਸਰਗਰਮੀ ਕੌਮਾਂਤਰੀ ਭਾਈਚਾਰੇ ਲਈ ਖਤਰਾ : ਅਮਰੀਕਾ
ਅਮਰੀਕਾ ਨੇ ਕਿਹਾ ਕਿ ਉੱਤਰ ਕੋਰੀਆ ਦੇ ਮਿਜ਼ਾਈਲ ਪ੍ਰੀਖਣ ਨੂੰ ਉਹ ਕੌਮਾਂਤਰੀ ਭਾਈਚਾਰੇ ਲਈ ਖਤਰਾ ਮੰਨਦਾ ਹੈ। ਅਮਰੀਕੀ ਰੱਖਿਆ ਵਿਭਾਗ ਪੈਂਟਾਗਨ ਨੇ ਕਿਹਾ ਕਿ ਅਸੀਂ ਸਥਿਤੀ ਦੀ ਨਿਗਰਾਨੀ ਕਰਨਾ ਜਾਰੀ ਰੱਖਾਂਗੇ ਅਤੇ ਇਸ ਸਬੰਧੀ ਅਸੀਂ ਆਪਣੇ ਸਹਿਯੋਗੀਆਂ ਅਤੇ ਭਾਈਵਾਲਾਂ ਨਾਲ ਵਿਚਾਰ-ਵਟਾਂਦਰਾ ਕਰ ਰਹੇ ਹਾਂ।