85 ਲੱਖ ਰੁਪਏ ''ਚ ਵਿਕਿਆ ਇਹ ਕੇਲਾ, ਤਸਵੀਰ ਵਾਇਰਲ
12/8/2019 12:40:43 PM
ਵਾਸ਼ਿੰਗਟਨ (ਬਿਊਰੋ): ਅਮਰੀਕਾ ਦੇ ਮਿਆਮੀ ਬੀਚ 'ਤੇ ਆਰਟ ਬੇਸਲ ਵਿਚ ਬੁੱਧਵਾਰ ਨੂੰ ਟੇਪ ਲੱਗਿਆ ਇਕ ਕੇਲਾ 85.81 ਲੱਖ ਰੁਪਏ ਵਿਚ ਵਿਕਿਆ। ਸੋਸ਼ਲ ਮੀਡੀਆ 'ਤੇ ਇਸ ਦੀ ਤਸਵੀਰ ਕਾਫੀ ਵਾਇਰਲ ਹੋ ਰਹੀ ਹੈ। ਇਸ ਕੇਲੇ ਦੀ ਕੀਮਤ ਜਾਣ ਕੇ ਤੁਸੀਂ ਹੈਰਾਨ ਹੋ ਰਹੇ ਹੋਵੇਗੇ। ਆਮਤੌਰ 'ਤੇ ਬਜ਼ਾਰ ਵਿਚ ਜਿੱਥੇ ਕੇਲੇ 40-50 ਰੁਪਏ ਦਰਜਨ ਮਿਲ ਜਾਂਦੇ ਹਨ ਉੱਥੇ ਜੇਕਰ ਤੁਸੀਂ ਇਕ ਕੇਲਾ 85 ਲੱਖ ਰੁਪਏ ਵਿਚ ਵਿਕਣ ਬਾਰੇ ਸੁਣੋਗੇ ਤਾਂ ਹੈਰਾਨੀ ਤਾਂ ਹੋਵੇਗੀ ਹੀ ਪਰ ਇਹ ਬਿਲਕੁੱਲ ਸੱਚ ਹੈ।
ਅਸਲ ਵਿਚ ਇਹ ਇਕ ਆਰਟ ਹੈ। ਇਸ ਬਨਾਨਾ ਆਰਟ ਨੂੰ ਇਟਲੀ ਦੇ ਕਲਾਕਾਰ ਮੌਰਿਜਿਓ ਕੈਟੇਲਨ ਨੇ ਬਣਾਇਆ ਹੈ। ਆਰਟ ਮਾਰਕੀਟ ਵੈਬਸਾਈਟ ਅਰਟਨੇਟ ਦੇ ਮੁਤਾਬਕ ਉਨ੍ਹਾਂ ਦੇ ਬਣਾਏ ਬਨਾਨਾ ਆਰਟ ਵਿਚ 3 ਵਿਚੋਂ 2 ਕੇਲੇ ਵਿਕ ਚੁੱਕੇ ਹਨ ਅਤੇ ਆਖਰੀ ਕੇਲੇ ਦੀ ਕੀਮਤ 1.07 ਕਰੋੜ ਰੁਪਏ ਰੱਖੀ ਗਈ ਹੈ।
ਪੈਰੋਟਿਨ ਗੈਲਰੀ ਦੇ ਮੁਤਾਬਕ ਇਸ ਬਨਾਨਾ ਆਰਟ ਨੂੰ ਬਣਾਉਣ ਵਾਲੇ ਕਲਾਕਾਰ ਕੈਟੇਲਨ ਆਪਣੇ ਹੋਟਲ ਦੇ ਕਮਰੇ ਵਿਚ ਲਟਕਾਉਣ ਲਈ ਕੋਈ ਮੂਰਤੀ ਬਣਾਉਣ 'ਤੇ ਵਿਚਾਰ ਕਰ ਰਹੇ ਸਨ। ਇਸ ਮਗਰੋਂ ਉਨ੍ਹਾਂ ਨੇ ਪਹਿਲਾਂ ਤਾਂਬੇ ਅਤੇ ਤਾਂਬੇ ਦੇ ਰੰਗ ਨਾਲ ਪੇਂਟ ਕੀਤੇ ਹੋਏ ਕੇਲਿਆਂ ਨੂੰ ਤਿਆਰ ਕੀਤਾ ਅਤੇ ਬਾਅਦ ਵਿਚ ਇਕ ਅਸਲੀ ਕੇਲੇ ਨੂੰ ਕੰਧ 'ਤੇ ਟੇਪ ਲਗਾ ਕੇ ਚਿਪਕਾ ਦਿੱਤਾ ਅਤੇ ਉਸ ਨੂੰ ਆਰਟ ਬੇਸਲ ਵਿਚ ਪ੍ਰਦਰਸ਼ਿਤ ਕੀਤਾ।
ਮੀਡੀਆ ਰਿਪੋਰਟਾਂ ਮੁਤਾਬਕ ਉਸ ਕੇਲੇ ਨੂੰ ਮਿਆਮੀ ਦੇ ਇਕ ਗ੍ਰੋਸਰੀ ਸਟੋਰ ਤੋਂ ਖਰੀਦਿਆ ਗਿਆ ਸੀ। ਪੇਰੋਟਿਨ ਗੈਲਰੀ ਦੇ ਇੰਸਟਾਗ੍ਰਾਮ ਪੋਸਟ ਵਿਚ ਲਿਖਿਆ ਹੈ ਕਿ ਇਸ ਇਕ ਕੇਲੇ ਦੀ ਕੀਮਤ ਦੱਸਦੀ ਹੈ ਕਿ ਅਸੀਂ ਕਿਸ ਤਰ੍ਹਾਂ ਮੁੱਲ ਤੈਅ ਕਰਦੇ ਹਾਂ ਅਤੇ ਕਿਹੜੀਆਂ ਵਸਤਾਂ ਨੂੰ ਮਹੱਤਾ ਦਿੰਦੇ ਹਾਂ। ਇਸ ਬਨਾਨਾ ਆਰਟ ਨੂੰ 'ਕਾਮੇਡੀਅਨ' ਨਾਮ ਦਿੱਤਾ ਗਿਆ ਹੈ। ਪੇਰੋਟਿਨ ਗੈਲਰੀ ਦੇ ਮਾਲਕ ਇਮੈਨੁਅਲ ਪੇਰੋਟਿਨ ਦੇ ਮੁਤਾਬਕ ਕੇਲਾ ਗਲੋਬਲ ਵਪਾਰ ਦਾ ਪ੍ਰਤੀਕ ਹੈ। ਇਸ ਦੇ ਇਲਾਵਾ ਇਸ ਦੀ ਵਰਤੋਂ ਮਜ਼ਾਕ ਦੇ ਤੌਰ 'ਤੇ ਵੀ ਕੀਤੀ ਜਾਂਦੀ ਹੈ। ਇੱਥੇ ਦੱਸ ਦਈਏ ਕਿ ਕੈਟੇਲਨ ਇਸ ਤੋਂ ਪਹਿਲਾਂ 18 ਕੈਰਟ ਸੋਨੇ ਦਾ ਇਕ ਟਾਇਲਟ ਵੀ ਬਣਾ ਚੁੱਕੇ ਹਨ।
ਆਪਣੇ ਭਾਈਚਾਰੇ ਚੋ ਆਪਣੇ ਜੀਵਨਸਾਥੀ ਦੀ ਚੋਣ ਕਰੋ - ਮੁਫ਼ਤ ਰਿਜਿਸਟ੍ਰੇਸ਼ਨ ਕਰੇ
