ਤਾਲਿਬਾਨ ਨੇ ਮਨੁੱਖੀ ਸੰਕਟ ਨੂੰ ਦਿੱਤੀ ‘ਹਵਾ’, 4 ਲੱਖ ਲੋਕ ਹੋਏ ਬੇਘਰ

08/15/2021 6:07:27 PM

ਕਾਬੁਲ— ਅਫ਼ਗਾਨਿਸਤਾਨ ਵਿਚ ਤਾਲਿਬਾਨ ਦੀ ਕਹਿਰ ਮਗਰੋਂ 4 ਲੱਖ ਲੋਕ ਅਫ਼ਗਾਨਿਸਤਾਨ ਵਿਚ ਮਨੁੱਖੀ ਸੰਕਟ ਕਾਰਨ ਬੇਘਰ ਹੋ ਗਏ ਹਨ। ਸੰਯੁਕਤ ਰਾਸ਼ਟਰ ਸ਼ਰਨਾਰਥੀਆਂ ਦੇ ਹਾਈ ਕਮਿਸ਼ਨਰ (ਯੂ. ਐੱਨ. ਐੱਚ. ਸੀ. ਆਰ.)  ਦੇ ਦਫ਼ਤਰ ਨੇ ਕਿਹਾ ਕਿ ਦੇਸ਼ ਵਿਚ ਲੱਗਭਗ 4 ਲੱਖ ਲੋਕ ਬੇਘਰ ਹੋ ਗਏ, ਜਿਨ੍ਹਾਂ ਵਿਚੋਂ 1,20,000 ਲੋਕ ਰਾਜਧਾਨੀ ਕਾਬੁਲ ਵੱਲ ਦੌੜ ਗਏ ਹਨ। ਜਿਵੇਂ ਲੜਾਈ ਤੇਜ਼ ਹੋ ਰਹੀ, ਅਫ਼ਗਾਨਿਸਤਾਨ ਵਿਚ ਸੰਯੁਕਤ ਰਾਸ਼ਟਰ ਸਥਾਈ ਜੰਗਬੰਦੀ ਅਤੇ ਅਫ਼ਗਾਨ ਲੋਕਾਂ ਦੇ ਹਿੱਤਾਂ ’ਚ ਗੱਲਬਾਤ ਰਾਹੀਂ ਸਮਝੌਤੇ ਦੀ ਮੰਗ ਕਰ ਰਿਹਾ ਹੈ। ਤਾਲਿਬਾਨ ਦੇ ਕਹਿਰ ਕਾਰਨ ਸਭ ਤੋਂ ਵੱਧ ਮਨੁੱਖੀ ਪ੍ਰਭਾਵ ਪਿਆ। ਸੰਯੁਕਤ ਰਾਸ਼ਟਰ ਸਹਾਇਤਾ ਮਿਸ਼ਨ ਨੇ ਚਿਤਾਵਨੀ ਦਿੱਤੀ ਹੈ ਕਿ ਹਿੰਸਾ ਨੂੰ ਰੋਕੇ ਬਿਨਾਂ ਸ਼ਾਂਤੀ ਸੰਭਵ ਨਹੀਂ ਹੈ। ਸੰਯੁਕਤ ਰਾਸ਼ਟਰ ਦੀ ਵਿਆਪਕ ਕੋਸ਼ਿਸ਼ ਕਾਰਨ ਇਸ ਸਾਲ ਲੱਗਭਗ 4 ਲੱਖ ਬੇਘਰ ਨਾਗਰਿਕਾਂ ਦੀਆਂ ਲੋੜਾਂ ਦਾ ਮੁਲਾਂਕਣ ਕੀਤਾ ਹੈ। 

ਯੂ. ਐੱਨ. ਐੱਚ. ਸੀ. ਆਰ. ਦੇ ਬੁਲਾਰੇ ਸ਼ਾਬੀਆ ਮੰਟੂ ਨੇ ਕਿਹਾ ਕਿ ਅਸੀਂ ਭੋਜਨ, ਆਸਰਾ, ਸਵੱਛਤਾ ਅਤੇ ਸਵੱਛਤਾ ਕਿੱਟ ਅਤੇ ਹੋਰ ਜੀਵਨ ਰੱਖਿਅਕ ਮਦਦ ਪ੍ਰਦਾਨ ਕਰ ਰਹੇ ਹਾਂ। ਯੂ. ਐੱਨ. ਐੱਚ. ਸੀ. ਆਰ. ਨੇ ਅਫ਼ਗਾਨਿਸਤਾਨ ਵਿਚ ਵੱਧਦੇ ਸੰਕਟ ਨੂੰ ਵੇਖਦੇ ਹੋਏ ਗੁਆਂਢੀ ਦੇਸ਼ਾਂ ਨੂੰ ਆਪਣੀਆਂ ਸਰਹੱਦਾਂ ਖੁੱਲ੍ਹੀਆਂ ਰੱਖਣ ਦੀ ਅਪੀਲ ਕੀਤੀ ਹੈ। ਅਫ਼ਗਾਨਿਸਤਾਨ ਵਿਚ 34 ਸੂਬਿਆਂ ਵਿਚੋਂ 33 ਵਿਚ ਜਾਰੀ ਲੜਾਈ ਦੀ ਸੂਚਨਾ ਮਿਲੀ ਹੈ। ਦੌੜਨ ਲਈ ਮਜਬੂਰ ਹੋਏ ਅਫ਼ਗਾਨਾਂ ਦਾ ਭਾਰੀ ਬਹੁਮਤ ਦੇਸ਼ ਦੇ ਅੰਦਰ ਹੀ ਰਹਿੰਦਾ ਹੈ। ਇਸ ਸਾਲ ਦੀ ਸ਼ੁਰੂਆਤ ਤੋਂ ਹੁਣ ਤੱਕ ਲੱਗਭਗ 1,20,000 ਅਫ਼ਗਾਨ ਪੇਂਡੂ ਇਲਾਕਿਆਂ ਅਤੇ ਸੂਬਾਈ ਸ਼ਹਿਰਾਂ ਤੋਂ ਕਾਬੁਲ ਸੂਬੇ ਵਿਚ ਦੌੜ ਗਏ ਹਨ। 

ਸਰਕਾਰ ਵਿਰੋਧੀ ਤਾਕਤਾਂ ਦੇਸ਼ ਦੇ ਵੱਡੇ ਹਿੱਸੇ ’ਤੇ ਹਾਵੀ ਹੋ ਰਹੀਆਂ ਹਨ ਕਿਉਂਕਿ ਅਮਰੀਕੀ ਫ਼ੌਜ ਇਸ ਮਹੀਨੇ ਦੇ ਅਖ਼ੀਰ ਤੱਕ ਆਪਣੀ ਵਾਪਸੀ ਨਾਲ ਅੱਗੇ ਵੱਧ ਰਹੀ ਹੈ। ਏਜੰਸੀ ਦਾ ਕਹਿਣਾ ਹੈ ਕਿ ਮਈ ਤੋਂ ਬਾਅਦ ਬੇਘਰ ਹੋਏ ਲੋਕਾਂ ਵਿਚੋਂ ਲੱਗਭਗ 80 ਫ਼ੀਸਦੀ ਔਰਤਾਂ ਅਤੇ ਬੱਚੇ ਹਨ। ਇਕ ਰਿਪੋਰਟ ਮੁਤਾਬਕ ਸੁਰੱਖਿਆ ਸਥਿਤੀ ਵਿਗੜਨ ਮਗਰੋਂ ਯੂਰਪੀ ਦੇਸ਼ਾਂ ਨੇ ਦੂਤਘਰ ਦੇ ਕਾਮਿਆਂ ਨੂੰ ਕੱਢਣਾ ਸ਼ੁਰੂ ਕਰ ਦਿੱਤਾ ਹੈ। ਨਾਰਵੇ ਅਤੇ ਡੈਨਮਾਰਕ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਉਹ ਆਪਣੇ ਦੂਤਘਰਾਂ ਨੂੰ ਅਸਥਾਈ ਰੂਪ ਨਾਲ ਬੰਦ ਕਰ ਦੇਣਗੇ ਅਤੇ ਆਪਣੇ ਕਾਮਿਆਂ ਨੂੰ ਦੂਜੇ ਦੇਸ਼ਾਂ ਵਿਚ ਭੇਜ ਦੇਣਗੇ।


Tanu

Content Editor

Related News