ਚੋਰਾਂ ਨੇ ਦਿਖਾਈ ਬਿਜਲੀ ਦੀ ਫੁਰਤੀ, 30 ਸੈਕਿੰਡ 'ਚ ਉਡਾਏ ਕਰੀਬ 21 ਲੱਖ ਦੇ ਕੱਪੜੇ

ਵਾਸ਼ਿੰਗਟਨ (ਏਜੰਸੀ)- ਅਮਰੀਕਾ ਦੇ ਵਿਸਕਾਨਸਿਨ ਸੂਬੇ ਵਿਚ ਚੋਰਾਂ ਦੇ ਇਕ ਗਰੁੱਪ ਨੇ ਚੋਰੀ ਦੀ ਵਾਰਦਾਤ ਵਿਚ ਜ਼ਬਰਦਸਤ ਫੁਰਤੀ ਦਿਖਾਈ। ਉਨ੍ਹਾਂ ਦੀ ਫੁਰਤੀ ਦੇਖ ਪੁਲਸ ਅਧਿਕਾਰੀ ਵੀ ਹੈਰਾਨ ਰਹਿ ਗਏ। ਫਿਲਹਾਲ ਪੁਲਸ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।ਵਿਸਕਾਨਸਿਨ ਸੂਬੇ ਦੇ ਪੁਲਸ ਅਧਿਕਾਰੀ ਨੇ ਕਿਹਾ ਕਿ ਸੂਬੇ ਦੇ ਪਲਾਸੇਂਟ ਪ੍ਰੇਰੀ ਸ਼ਹਿਰ ਵਿਚ ਕੱਪੜਿਆਂ ਦੀ ਦੁਕਾਨ ਵਿਚ ਪਿਛਲੇ ਹਫਤੇ ਸੋਮਵਾਰ ਨੂੰ ਦਿਨਦਿਹਾੜੇ ਚੋਰੀ ਦੀ ਘਟਨਾ ਹੋਈ ਸੀ। ਦੁਕਾਨ ਮਾਲਕ ਨੇ ਇਸ ਸਬੰਧੀ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਸੀ। ਮਾਮਲਾ ਦਰਜ ਹੋਣ ਤੋਂ ਬਾਅਦ ਪੁਲਸ ਨੇ ਜਾਂਚ ਦੌਰਾਨ ਦੁਕਾਨ 'ਚ ਲੱਗੇ ਸੀਸੀਟੀਵੀ ਕੈਮਰੇ ਦੀ ਫੁਟੇਜ ਖੰਗਾਲੀ ਤਾਂ ਉਹ ਹੈਰਾਨ ਰਹਿ ਗਏ। ਸਵੇਰ ਦੇ ਸਮੇਂ ਹੋਈ ਇਸ ਚੋਰੀ ਦੀ ਵਾਰਦਾਤ ਨੂੰ ਕੈਮਰੇ ਨੇ ਕੈਦ ਕਰ ਲਿਆ ਸੀ।

ਕੈਮਰੇ ਵਿਚ ਸਾਫ ਨਜ਼ਰ ਆ ਰਿਹਾ ਹੈ ਕਿ ਦੁਕਾਨ ਵਿਚ ਸਵੇਰੇ-ਸਵੇਰੇ ਤਕਰੀਬਨ 10 ਲੋਕਾਂ ਦਾ ਇਕ ਗਰੁੱਪ ਅੰਦਰ ਆਇਆ ਅਤੇ ਸਿਰਫ 30 ਸੈਕਿੰਡ ਵਿਚ ਹੀ ਦੁਕਾਨਦਾਰ ਅਤੇ ਸਟਾਫ ਦੀ ਮੌਜੂਦਗੀ ਵਿਚ ਤਕਰੀਬਨ 20 ਲੱਖ 53 ਹਜ਼ਾਰ ਦਾ ਮਾਲ ਲੈ ਕੇ ਫਰਾਰ ਹੋ ਗਿਆ। ਸਾਰੇ ਚੋਰ ਬਾਈਕ ਰਾਹੀਂ ਆਏ ਸਨ ਅਤੇ ਚੋਰੀ ਦਾ ਮਾਲ ਲੈ ਕੇ ਭੱਜ ਗਏ। ਜਾਰੀ ਵੀਡੀਓ ਵਿਚ ਚੋਰਾਂ ਦੀ ਫੁਰਤੀ ਦੇਖ ਹਰ ਕੋਈ ਹੈਰਾਨ ਹੈ। ਹਾਲਾਂਕਿ ਮਾਮਲੇ ਵਿਚ ਪੁਲਸ ਅਜੇ ਜਾਂਚ ਕਰ ਰਹੀ ਹੈ। ਅਜੇ ਤੱਕ ਕਿਸੇ ਦੀ ਵੀ ਗ੍ਰਿਫਤਾਰੀ ਦੀ ਕੋਈ ਖਬਰ ਨਹੀਂ ਮਿਲੀ ਹੈ।

ਵਿਸਕਾਨਸਿਨ ਪੁਲਸ ਦੇ ਮੁਖੀ ਡੇਵਿਡ ਸਮੇਟਨ ਨੇ ਦੱਸਿਆ ਕਿ ਵੀਡੀਓ ਦੇਖਣ ਤੋਂ ਬਾਅਦ ਅਜਿਹਾ ਲੱਗਦਾ ਹੈ ਕਿ ਚੋਰਾਂ ਨੇ ਪਹਿਲਾਂ ਹੀ ਦੁਕਾਨ ਦੀ ਰੈਕੀ ਕੀਤੀ ਹੋਈ ਸੀ। ਚੋਰਾਂ ਨੂੰ ਪਤਾ ਸੀ ਕਿ ਉਨ੍ਹਾਂ ਦੇ ਕੰਮ ਦੇ ਕੱਪੜੇ ਕਿੱਥੇ ਰੱਖੇ ਗਏ ਹਨ। ਇਸ ਲਈ ਉਹ ਦੁਕਾਨ ਅੰਦਰ ਆਉਣ ਦੌਰਾਨ ਸਿੱਧੇ ਉਥੇ ਪਹੁੰਚੇ, ਜਿਥੋਂ ਉਨ੍ਹਾਂ ਨੇ ਕੱਪੜੇ ਚੁੱਕੇ ਸਨ। ਮੌਕੇ 'ਤੇ ਪਹੁੰਚਦੇ ਹੀ ਬਦਮਾਸ਼ਾਂ ਨੇ ਆਪਣੇ ਮਤਲਬ ਦਾ ਸਾਮਾਨ ਚੁੱਕਿਆ ਅਤੇ ਫੁਰਤੀ ਨਾਲ ਭੱਜ ਗਏ। ਇਹ ਪੂਰੀ ਤਰ੍ਹਾਂ ਨਾਲ ਪਲਾਨਿੰਗ ਦੀ ਹੋਈ ਚੋਰੀ ਸੀ, ਜਿਸ ਦਾ ਵੀਡੀਓ ਸੋਸ਼ਲ 'ਤੇ ਵਾਇਰਲ ਹੋ ਰਹੀ ਹੈ।