TVS ਦਾ ਵੱਡਾ ਧਮਾਕਾ! 50000 ਤੋਂ ਵੀ ਘੱਟ ਕੀਮਤ ''ਚ ਲਾਂਚ ਕੀਤਾ ਨਵਾਂ ਇਲੈਕਟ੍ਰਿਕ ਸਕੂਟਰ

ਸਪੋਰਟਸ ਡੈਸਕ- ਦਿੱਗਜ ਵਾਹਨ ਨਿਰਮਾਤਾ ਕੰਪਨੀ TVS ਮੋਟਰ ਨੇ ਭਾਰਤੀ ਬਾਜ਼ਾਰ ਵਿੱਚ ਆਪਣਾ ਸਭ ਤੋਂ ਸਸਤਾ ਇਲੈਕਟ੍ਰਿਕ ਸਕੂਟਰ TVS Orbiter V1 ਲਾਂਚ ਕਰਕੇ ਹਲਚਲ ਮਚਾ ਦਿੱਤੀ ਹੈ। ਕੰਪਨੀ ਨੇ ਇਸ ਸਕੂਟਰ ਨੂੰ ਬੇਹੱਦ ਆਕਰਸ਼ਕ ਕੀਮਤ 'ਤੇ ਪੇਸ਼ ਕੀਤਾ ਹੈ, ਜਿਸ ਦੀ ਸ਼ੁਰੂਆਤੀ ਕੀਮਤ 49,999 ਰੁਪਏ (ਐਕਸ-ਸ਼ੋਰੂਮ) ਰੱਖੀ ਗਈ ਹੈ। ਇਹ ਕੀਮਤ ਕੰਪਨੀ ਦੀ 'ਬੈਟਰੀ-ਐਜ਼-ਏ-ਸਰਵਿਸ' (BaaS) ਸੇਵਾ ਦੇ ਤਹਿਤ ਸੰਭਵ ਹੋਈ ਹੈ।

TVS Orbiter V1 ਵਿੱਚ ਗਾਹਕਾਂ ਨੂੰ ਕਈ ਆਧੁਨਿਕ ਫੀਚਰਜ਼ ਮਿਲਣਗੇ। ਇਸ ਵਿੱਚ ਕਰੂਜ਼ ਕੰਟਰੋਲ, ਹਿਲ ਹੋਲਡ ਅਸਿਸਟ, ਨੈਵੀਗੇਸ਼ਨ ਅਤੇ ਬਲੂਟੁੱਥ ਕਨੈਕਟੀਵਿਟੀ ਵਰਗੀਆਂ ਸਹੂਲਤਾਂ ਦਿੱਤੀਆਂ ਗਈਆਂ ਹਨ। ਇਸ ਤੋਂ ਇਲਾਵਾ ਸਕੂਟਰ ਵਿੱਚ ਈਕੋ ਅਤੇ ਪਾਵਰ ਮੋਡ ਦੇ ਨਾਲ-ਨਾਲ ਪਾਰਕਿੰਗ ਅਸਿਸਟ ਦਾ ਫੀਚਰ ਵੀ ਸ਼ਾਮਲ ਹੈ।

ਸਿੰਗਲ ਚਾਰਜ 'ਤੇ ਚੱਲੇਗਾ 86 ਕਿਲੋਮੀਟਰ

ਇਸ ਸਕੂਟਰ ਵਿੱਚ 1.8kWh ਦੀ ਬੈਟਰੀ ਲਗਾਈ ਗਈ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ ਇਹ ਸਕੂਟਰ ਸਿੰਗਲ ਚਾਰਜ 'ਤੇ 86 ਕਿਲੋਮੀਟਰ ਤੱਕ ਦਾ ਸਫ਼ਰ ਤੈਅ ਕਰ ਸਕਦਾ ਹੈ। ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਇਹ ਸਕੂਟਰ ਸਿਰਫ਼ 2 ਘੰਟੇ 20 ਮਿੰਟ ਵਿੱਚ 0 ਤੋਂ 80 ਫੀਸਦੀ ਤੱਕ ਚਾਰਜ ਹੋ ਜਾਂਦਾ ਹੈ।

ਕੀ ਹੈ BaaS ਸੇਵਾ? 

BaaS ਸੇਵਾ ਦੇ ਤਹਿਤ ਗਾਹਕਾਂ ਨੂੰ ਸਿਰਫ਼ ਸਕੂਟਰ ਦੀ ਕੀਮਤ ਅਦਾ ਕਰਨੀ ਪੈਂਦੀ ਹੈ, ਜਦੋਂ ਕਿ ਬੈਟਰੀ ਸਬਸਕ੍ਰਿਪਸ਼ਨ ਦੇ ਆਧਾਰ 'ਤੇ ਮਿਲਦੀ ਹੈ। Orbiter V1 ਲਈ ਗਾਹਕਾਂ ਨੂੰ 862 ਰੁਪਏ ਦੀ ਮਹੀਨਾਵਾਰ ਸਬਸਕ੍ਰਿਪਸ਼ਨ ਦੇਣੀ ਪਵੇਗੀ। ਇਸ ਸਕੂਟਰ ਨੂੰ ਦੋ ਸ਼ਾਨਦਾਰ ਰੰਗਾਂ- ਮਾਰਟਨ ਕਾਪਰ ਅਤੇ ਸਟੈਲਰ ਸਿਲਵਰ ਵਿੱਚ ਖਰੀਦਿਆ ਜਾ ਸਕਦਾ ਹੈ।