ਭਾਰਤ ''ਚ ਇਲੈਕਟ੍ਰਿਕ ਵਾਹਨਾਂ ਦਾ ਕ੍ਰੇਜ਼, ਇੱਕ ਸਾਲ ''ਚ ਵਿਕੇ 24.52 ਲੱਖ ਵਾਹਨ

ਆਟੋ ਡੈਸਕ - ਭਾਰਤ ਵਿੱਚ ਇਲੈਕਟ੍ਰਿਕ ਵਾਹਨਾਂ (EV) ਦੀ ਮੰਗ ਤੇਜ਼ੀ ਨਾਲ ਵਧ ਰਹੀ ਹੈ ਅਤੇ ਲੋਕ ਬੈਟਰੀ ਵਾਲੀਆਂ ਗੱਡੀਆਂ ਨੂੰ ਤਰਜੀਹ ਦੇ ਰਹੇ ਹਨ। ਫੈਡਰੇਸ਼ਨ ਆਫ ਆਟੋਮੋਬਾਈਲ ਡੀਲਰਜ਼ ਐਸੋਸੀਏਸ਼ਨ (FADA) ਵੱਲੋਂ ਜਾਰੀ ਅੰਕੜਿਆਂ ਅਨੁਸਾਰ, ਵਿੱਤੀ ਸਾਲ 2025-26 (FY26) ਦੌਰਾਨ ਦੇਸ਼ ਵਿੱਚ ਕੁੱਲ EV ਰਿਟੇਲ ਵਿਕਰੀ 24.6 ਫੀਸਦੀ ਵਧ ਕੇ 24.52 ਲੱਖ ਯੂਨਿਟ ਤੱਕ ਪਹੁੰਚ ਗਈ ਹੈ। ਖਾਸ ਗੱਲ ਇਹ ਹੈ ਕਿ ਟੂ-ਵ੍ਹੀਲਰ, ਥ੍ਰੀ-ਵ੍ਹੀਲਰ, ਪੈਸੰਜਰ ਵਾਹਨ ਅਤੇ ਕਮਰਸ਼ੀਅਲ ਵਾਹਨਾਂ ਸਮੇਤ ਸਾਰੀਆਂ ਸ਼੍ਰੇਣੀਆਂ ਵਿੱਚ ਦੋਹਰੇ ਅੰਕਾਂ ਵਿੱਚ ਵਾਧਾ ਦਰਜ ਕੀਤਾ ਗਿਆ ਹੈ।

ਇਲੈਕਟ੍ਰਿਕ ਕਾਰਾਂ ਦੀ ਵਿਕਰੀ 'ਚ ਜ਼ਬਰਦਸਤ ਤੇਜ਼ੀ
ਪੈਸੰਜਰ ਵਾਹਨਾਂ (ਕਾਰਾਂ) ਦੇ ਸੈਗਮੈਂਟ ਵਿੱਚ ਸਭ ਤੋਂ ਵੱਡਾ ਉਛਾਲ ਦੇਖਣ ਨੂੰ ਮਿਲਿਆ ਹੈ। ਵਿੱਤੀ ਸਾਲ 2025-26 ਵਿੱਚ 1,99,923 ਇਲੈਕਟ੍ਰਿਕ ਕਾਰਾਂ ਵਿਕੀਆਂ, ਜੋ ਪਿਛਲੇ ਸਾਲ (1,08,873 ਯੂਨਿਟ) ਦੇ ਮੁਕਾਬਲੇ 83.63 ਫੀਸਦੀ ਜ਼ਿਆਦਾ ਹਨ।
ਟਾਟਾ ਮੋਟਰਜ਼ (Tata Motors): 78,811 ਯੂਨਿਟਾਂ ਨਾਲ ਪਹਿਲੇ ਸਥਾਨ 'ਤੇ ਰਹੀ।
JSW MG ਮੋਟਰ ਇੰਡੀਆ: 53,089 ਯੂਨਿਟਾਂ ਨਾਲ ਦੂਜੇ ਨੰਬਰ 'ਤੇ।
ਮਹਿੰਦਰਾ (Mahindra): 42,721 ਯੂਨਿਟਾਂ ਨਾਲ ਤੀਜੇ ਸਥਾਨ 'ਤੇ ਰਹੀ।

ਟੂ-ਵ੍ਹੀਲਰ ਸੈਗਮੈਂਟ 'ਚ 14 ਲੱਖ ਦਾ ਅੰਕੜਾ ਪਾਰ
ਇਲੈਕਟ੍ਰਿਕ ਟੂ-ਵ੍ਹੀਲਰ ਦੀ ਵਿਕਰੀ 21.81 ਫੀਸਦੀ ਵਧ ਕੇ 14,01,818 ਯੂਨਿਟ ਹੋ ਗਈ ਹੈ, ਜੋ ਪਿਛਲੇ ਵਿੱਤੀ ਸਾਲ ਵਿੱਚ 11,50,790 ਯੂਨਿਟ ਸੀ।
TVS: 3,41,513 ਯੂਨਿਟਾਂ ਨਾਲ ਸਭ ਤੋਂ ਅੱਗੇ ਰਹੀ।
ਬਜਾਜ ਆਟੋ (Bajaj Auto): 2,89,349 ਯੂਨਿਟਾਂ ਨਾਲ ਦੂਜੇ ਸਥਾਨ 'ਤੇ।
ਏਥਰ ਐਨਰਜੀ (Ather Energy): 2,39,178 ਯੂਨਿਟਾਂ ਨਾਲ ਤੀਜੇ ਸਥਾਨ 'ਤੇ ਰਹੀ।

ਕਮਰਸ਼ੀਅਲ ਵਾਹਨਾਂ ਦੀ ਵਿਕਰੀ ਹੋਈ ਦੁੱਗਣੀ
ਸਭ ਤੋਂ ਤੇਜ਼ ਵਾਧਾ ਇਲੈਕਟ੍ਰਿਕ ਕਮਰਸ਼ੀਅਲ ਵਾਹਨਾਂ ਵਿੱਚ ਦੇਖਿਆ ਗਿਆ, ਜਿਸ ਦੀ ਵਿਕਰੀ 120.57 ਫੀਸਦੀ ਵਧ ਕੇ 19,454 ਯੂਨਿਟ ਹੋ ਗਈ ਹੈ। ਇਸੇ ਤਰ੍ਹਾਂ ਇਲੈਕਟ੍ਰਿਕ ਥ੍ਰੀ-ਵ੍ਹੀਲਰ ਦੀ ਵਿਕਰੀ ਵਿੱਚ ਵੀ 18.97 ਫੀਸਦੀ ਦਾ ਵਾਧਾ ਦਰਜ ਹੋਇਆ ਅਤੇ ਇਹ 8,30,819 ਯੂਨਿਟ ਤੱਕ ਪਹੁੰਚ ਗਈ।
FADA ਦੇ ਪ੍ਰਧਾਨ ਸੀ.ਐੱਸ. ਵਿਗਨੇਸ਼ਵਰ ਨੇ ਕਿਹਾ ਕਿ ਵਿੱਤੀ ਸਾਲ 2026 ਭਾਰਤ ਦੀ ਇਲੈਕਟ੍ਰਿਕ ਮੋਬਿਲਿਟੀ ਲਈ ਇੱਕ ਇਤਿਹਾਸਕ ਸਾਲ ਸਾਬਤ ਹੋਇਆ ਹੈ। ਇਹ ਵਾਧਾ ਸਿਰਫ਼ ਆਟੋ ਇੰਡਸਟਰੀ ਦੀ ਸਫ਼ਲਤਾ ਨਹੀਂ ਹੈ, ਸਗੋਂ ਦੇਸ਼ ਵਿੱਚ ਵੱਡੇ ਪੱਧਰ 'ਤੇ ਹੋ ਰਹੀ ਊਰਜਾ ਤਬਦੀਲੀ (Energy Transition) ਦੀ ਮਜ਼ਬੂਤ ਸ਼ੁਰੂਆਤ ਨੂੰ ਦਰਸਾਉਂਦਾ ਹੈ।