ਜਨਾਨੀਆਂ ਨਾਲੋਂ ਜ਼ਿਆਦਾ ਪੁਰਸ਼ਾਂ ਨੂੰ ਪਸੰਦ ਆ ਰਹੇ OTT ਐਪਸ, ਪੇਮੈਂਟ ਕਰਨ ’ਚ ਨੌਜਵਾਨ ਸਭ ਤੋਂ ਅੱਗੇ

ਗੈਜੇਟ ਡੈਸਕ– ਕੋਰੋਨਾ ਮਹਾਮਾਰੀ ਦੇ ਚਲਦੇ ਓ.ਟੀ.ਟੀ. ਐਪਸ ਦੇ ਇਸਤੇਮਾਲ ’ਚ ਵਾਧਾ ਵੇਖਣ ਨੂੰ ਮਿਲਿਆ ਹੈ। ਭਾਰਤ ’ਚ ਸਭ ਤੋਂ ਜ਼ਿਆਦਾ ਦਿੱਲੀ ’ਚ ਹਰ ਮਹੀਨੇ 97 ਲੱਖ ਦਰਸ਼ਕ ਓ.ਟੀ.ਟੀ. ਪਲੇਟਫਾਰਮ ਦਾ ਇਸਤੇਮਾਲ ਕਰ ਰਹੇ ਹਨ, ਉਥੇ ਹੀ ਮੁੰਬਈ ’ਚ 93 ਲੱਖਅਤੇ ਬੈਂਗਲੁਰੂ ’ਚ 87 ਲੱਖ ਯੂਜ਼ਰਸ ਓ.ਟੀ.ਟੀ. ਐਪਸ ਦੀ ਵਰਤੋਂ ਕਰ ਰਹੇ ਹਨ। ਓ.ਟੀ.ਟੀ. ’ਤੇ ਮਨੋਰੰਜਨ ਲਈ ਭੁਗਤਾਨ ਕਰਨ ਵਾਲਿਆਂ ’ਚ 22 ਤੋਂ 30 ਸਾਲ ਦੀ ਉਮਰ ਦੇ ਲੋਕਾਂ ਦੀ ਗਿਣਤੀ ਸਭ ਤੋਂ ਜ਼ਿਆਦਾ ਹੈ। ਉਥੇ ਹੀ ਸ਼ਹਿਰੀ ਦਰਸ਼ਕ ਸਭ ਤੋਂ ਜ਼ਿਆਦਾ ਵੀਡੀਓ-ਆਨ-ਡਿਮਾਂਡ ਸਬਸਕ੍ਰਿਪਸ਼ਨ ਲੈ ਰਹੇ ਹਨ। ਭਾਰਤ ’ਚ ਜਨਾਨੀਆਂ ਨਾਲੋਂ ਜ਼ਿਆਦਾ ਪੁਰਸ਼ਾਂ ਨੂੰ ਓ.ਟੀ.ਟੀ. ਐਪਸ ਪਸੰਦ ਆ ਰਹੇ ਹਨ ਅਤੇ ਉਹ ਹੀ ਇਨ੍ਹਾਂ ਨੂੰ ਲੈ ਕੇ ਪੇਮੈਂਟ ਵੀ ਕਰਦੇ ਹਨ। 

ਆਰਮੈਕਸ ਟੀ.ਟੀ. ਆਡੀਅੰਸ ਰਿਪੋਰਟ 2021 ਮੁਤਾਬਕ, ਮੁੰਬਈ ਦੀ ਕੰਸਲਟਿੰਗ ਫਰਮ ਆਰਮੈਕਸ ਮੀਡੀਆ ਨੇ ਦੇਸ਼ ਭਰ ’ਚ ਮਈ ਤੋਂ ਜੁਲਾਈ 2021 ਦਰਮਿਆਨ 12,000 ਲੋਕਾਂ ’ਤੇ ਸਰਵੇ ਕੀਤਾ ਹੈ ਜਿਸ ਤੋਂ ਬਾਅਦ ਭਾਰਤ ’ਚ ਪਹਿਲੀ ਵਾਰ ਵੀਡੀਓ ਸਟਰੀਮਿੰਗ ਦੇ ਦਰਸ਼ਕਾਂ ਦੀ ਗਿਣਤੀ ਦਾ ਆਕਲਨ ਕੀਤਾ ਗਿਆ ਹੈ। ਇਸ ਤੋਂ ਇਹ ਪਤਾ ਚਲਿਆ ਹੈ ਕਿ ਭਾਰਤ ’ਚ ਕੁੱਲ 35.3 ਕਰੋੜ ਮਾਸਿਕ ਓ.ਟੀ.ਟੀ. ਦਰਸ਼ਕ ਹਨ। ਰਿਪੋਰਟ ’ਚ ਸਾਹਮਣੇ ਆਇਆ ਕਿ ਦਰਸ਼ਕਾਂ ’ਚ ਆਨਲਾਈਨ ਡਰਾਮਾ ਅਤੇ ਸੀਰੀਜ਼ ਵੇਖਣ ਦਾ ਚਲਣ ਸਭ ਤੋਂ ਜ਼ਿਆਦਾ ਹੈ। ਇਨ੍ਹਾਂ ’ਚੋਂ 4.07 ਕਰੋੜ ਓ.ਟੀ.ਟੀ. ਦਰਸ਼ਕ ਅਜਿਹੇ ਹਨ, ਜੋ ਵੀਡੀਓ-ਆਨ-ਡਿਮਾਂਡ ਸਬਸਕ੍ਰਿਪਸ਼ਨ (ਐੱਸ.ਵੀ.ਓ.ਡੀ.) ਲਈ ਭੁਗਤਾਨ ਕਰਦੇ ਹਨ।