ਭਾਰਤ ''ਚ 5 ਕਾਰਾਂ ਲਾਂਚ ਕਰੇਗੀ ਇਹ ਜਰਮਨ ਕੰਪਨੀ, ਫਾਰਚੂਨਰ ਦੀ ਟੱਕਰ ''ਚ ਆਏਗਾ ਪਹਿਲਾ ਮਾਡਲ

ਆਟੋ ਡੈਸਕ- ਭਾਰਤ ਅਤੇ ਯੂਰਪੀਅਨ ਯੂਨੀਅਨ (EU) ਵਿਚਾਲੇ ਹੋਏ ਮੁਕਤ ਵਪਾਰ ਸਮਝੌਤੇ (FTA) ਤੋਂ ਬਾਅਦ ਜਰਮਨ ਦੀ ਦਿੱਗਜ ਆਟੋਮੋਬਾਈਲ ਕੰਪਨੀ ਫੌਕਸਵੈਗਨ ਨੇ ਭਾਰਤੀ ਬਾਜ਼ਾਰ ਲਈ ਵੱਡੇ ਧਮਾਕੇ ਦੀ ਤਿਆਰੀ ਕਰ ਲਈ ਹੈ। ਕੰਪਨੀ ਨੇ ਐਲਾਨ ਕੀਤਾ ਹੈ ਕਿ ਉਹ ਸਾਲ 2026 ਵਿੱਚ ਭਾਰਤ ਵਿੱਚ 5 ਨਵੀਆਂ ਗੱਡੀਆਂ ਲਾਂਚ ਕਰੇਗੀ। ਕੰਪਨੀ ਦੀ ਯੋਜਨਾ ਹਰ ਤਿਮਾਹੀ ਵਿੱਚ ਇੱਕ ਨਵਾਂ ਮਾਡਲ ਉਤਾਰਨ ਦੀ ਹੈ, ਜਿਸ ਵਿੱਚ ਐੱਸ.ਯੂ.ਵੀ. (SUV), ਸੇਡਾਨ ਅਤੇ ਹੈਚਬੈਕ ਸ਼ਾਮਲ ਹੋਣਗੀਆਂ।

ਪਹਿਲੇ ਨੰਬਰ 'ਤੇ ਆਵੇਗੀ Tayron R-Line 

ਫੌਕਸਵੈਗਨ ਦੇ ਇਸ ਵੱਡੇ ਪਲਾਨ ਦੀ ਅਗਵਾਈ Tayron R-Line ਕਰੇਗੀ, ਜਿਸ ਨੂੰ 2026 ਦੀ ਪਹਿਲੀ ਤਿਮਾਹੀ ਵਿੱਚ ਲਾਂਚ ਕੀਤਾ ਜਾਵੇਗਾ। ਇਹ ਕੰਪਨੀ ਦੀ ਫਲੈਗਸ਼ਿਪ 7-ਸੀਟਰ SUV ਹੋਵੇਗੀ, ਜੋ ਭਾਰਤੀ ਬਾਜ਼ਾਰ ਵਿੱਚ ਟੋਇਟਾ ਫਾਰਚੂਨਰ, ਸਕੋਡਾ ਕੋਡਿਏਕ ਅਤੇ ਜੀਪ ਮੇਰਿਡੀਅਨ ਵਰਗੀਆਂ ਦਿੱਗਜ ਗੱਡੀਆਂ ਨੂੰ ਸਿੱਧੀ ਟੱਕਰ ਦੇਵੇਗੀ। ਖਾਸ ਗੱਲ ਇਹ ਹੈ ਕਿ ਇਸ ਵਾਰ ਕੰਪਨੀ ਇਸ ਨੂੰ ਬਾਹਰੋਂ ਮੰਗਵਾਉਣ (CBU) ਦੀ ਬਜਾਏ ਭਾਰਤ ਵਿੱਚ ਹੀ ਅਸੈਂਬਲ ਕਰੇਗੀ, ਜਿਸ ਨਾਲ ਇਸ ਦੀ ਕੀਮਤ ਕਾਫੀ ਮੁਕਾਬਲੇਬਾਜ਼ ਹੋਣ ਦੀ ਉਮੀਦ ਹੈ।

ਲਗਜ਼ਰੀ ਫੀਚਰਜ਼ ਨਾਲ ਲੈਸ ਹੋਵੇਗੀ ਨਵੀਂ SUV 

Tayron R-Line ਨੂੰ MQB EVO ਪਲੇਟਫਾਰਮ 'ਤੇ ਤਿਆਰ ਕੀਤਾ ਗਿਆ ਹੈ ਅਤੇ ਇਸ ਨੂੰ ਸੁਰੱਖਿਆ ਦੇ ਲਿਹਾਜ਼ ਨਾਲ 5-ਸਟਾਰ ਯੂਰੋ NCAP ਰੇਟਿੰਗ ਮਿਲੀ ਹੈ। ਇਸ ਦੇ ਮੁੱਖ ਫੀਚਰਸ ਇਸ ਪ੍ਰਕਾਰ ਹਨ:

• ਮਸਾਜ ਵਾਲੀਆਂ ਸੀਟਾਂ: ਗੱਡੀ ਦੇ ਅੰਦਰ ਵੈਂਟੀਲੇਟਿਡ ਅਤੇ ਮਸਾਜ ਫੰਕਸ਼ਨ ਵਾਲੀਆਂ ਫਰੰਟ ਸੀਟਾਂ ਮਿਲਣਗੀਆਂ।
• ਵੱਡੀ ਡਿਸਪਲੇਅ: ਕੇਬਿਨ ਵਿੱਚ 15-ਇੰਚ ਦੀ ਟੱਚਸਕ੍ਰੀਨ ਅਤੇ ਡਿਜੀਟਲ ਇੰਸਟਰੂਮੈਂਟ ਕਲੱਸਟਰ ਦਿੱਤਾ ਗਿਆ ਹੈ।
• ਦਮਦਾਰ ਇੰਜਣ: ਇਸ ਵਿੱਚ 2.0 ਲੀਟਰ ਦਾ ਟਰਬੋ ਪੈਟਰੋਲ ਇੰਜਣ ਮਿਲਣ ਦੀ ਉਮੀਦ ਹੈ।
• ਹੋਰ ਸਹੂਲਤਾਂ: ਪੈਨੋਰਾਮਿਕ ਸਨਰੂਫ, ਮੈਟ੍ਰਿਕਸ LED ਹੈੱਡਲੈਂਪਸ ਅਤੇ 30 ਰੰਗਾਂ ਵਾਲੀ ਐਂਬੀਐਂਟ ਲਾਈਟਿੰਗ ਇਸ ਨੂੰ ਬੇਹੱਦ ਖਾਸ ਬਣਾਉਂਦੀ ਹੈ।

ਕੀ ਹੋਵੇਗੀ ਕੀਮਤ

ਮਾਹਰਾਂ ਅਨੁਸਾਰ, Tayron R-Line ਦੀ ਐਕਸ-ਸ਼ੋਅਰੂਮ ਕੀਮਤ 43 ਲੱਖ ਤੋਂ 50 ਲੱਖ ਰੁਪਏ ਦੇ ਵਿਚਕਾਰ ਹੋ ਸਕਦੀ ਹੈ। ਕੰਪਨੀ ਦਾ ਮੰਨਣਾ ਹੈ ਕਿ ਇਨ੍ਹਾਂ ਪ੍ਰੀਮੀਅਮ ਉਤਪਾਦਾਂ ਨਾਲ ਉਹ ਗਾਹਕਾਂ ਦੇ ਅਨੁਭਵ ਨੂੰ ਬਿਹਤਰ ਬਣਾਉਣ ਅਤੇ ਭਾਰਤੀ ਬਾਜ਼ਾਰ ਵਿੱਚ ਆਪਣੀ ਮੌਜੂਦਗੀ ਨੂੰ ਹੋਰ ਮਜ਼ਬੂਤ ਕਰਨ 'ਤੇ ਧਿਆਨ ਕੇਂਦਰਿਤ ਕਰ ਰਹੀ ਹੈ। ਹਾਲਾਂਕਿ ਬਾਕੀ ਚਾਰ ਮਾਡਲਾਂ ਬਾਰੇ ਅਜੇ ਕੋਈ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਗਈ ਹੈ।