BYD ਵੱਲੋਂ ਨਵੀਂ ਕੰਪੈਕਟ ਇਲੈਕਟ੍ਰਿਕ ਕਾਰ ''BYD Racco'' ਲਾਂਚ; ਜਾਣੋ ਖ਼ਾਸੀਅਤ

ਟੋਕੀਓ/ਨਵੀਂ ਦਿੱਲੀ : ਦੁਨੀਆ ਦੀ ਦਿੱਗਜ ਇਲੈਕਟ੍ਰਿਕ ਕਾਰ ਨਿਰਮਾਤਾ ਕੰਪਨੀ BYD ਹੁਣ ਜਾਪਾਨ ਦੇ ਬਾਜ਼ਾਰ ਵਿੱਚ ਆਪਣੀ ਨਵੀਂ ਛੋਟੀ ਇਲੈਕਟ੍ਰਿਕ ਕਾਰ 'BYD Racco' ਉਤਾਰਨ ਦੀ ਤਿਆਰੀ ਕਰ ਰਹੀ ਹੈ। ਕੰਪਨੀ ਨੇ ਇਸ ਕਾਰ ਨੂੰ ਖ਼ਾਸ ਤੌਰ 'ਤੇ ਜਾਪਾਨ ਦੇ ਭੀੜ-ਭੜੱਕੇ ਵਾਲੇ ਅਤੇ ਤੰਗ ਰਸਤਿਆਂ ਵਾਲੇ ਸ਼ਹਿਰਾਂ ਨੂੰ ਧਿਆਨ ਵਿੱਚ ਰੱਖ ਕੇ ਡਿਜ਼ਾਈਨ ਕੀਤਾ ਹੈ। ਦੱਸ ਦੇਈਏ ਕਿ 'Racco' ਦਾ ਅਰਥ ਸਮੁੰਦਰੀ ਜੀਵ 'ਸੀ ਓਟਰ' (Sea Otter) ਹੁੰਦਾ ਹੈ।

BYD Racco ਦੀ ਲੰਬਾਈ ਲਗਭਗ 3,395 ਮਿਲੀਮੀਟਰ ਹੈ, ਜੋ ਜਾਪਾਨ ਦੇ ਸਥਾਨਕ ਨਿਯਮਾਂ ਅਨੁਸਾਰ ਰੱਖੀ ਗਈ ਹੈ। ਹਾਲਾਂਕਿ ਬਾਹਰੋਂ ਇਹ ਕਾਰ ਬਾਕਸੀ ਡਿਜ਼ਾਈਨ ਵਿੱਚ ਨਜ਼ਰ ਆਉਂਦੀ ਹੈ, ਪਰ ਇਸ ਦੀ ਉਚਾਈ ਜ਼ਿਆਦਾ ਹੋਣ ਕਾਰਨ ਅੰਦਰ ਬੈਠਣ ਵਾਲਿਆਂ ਨੂੰ ਕਾਫ਼ੀ ਜਗ੍ਹਾ ਮਿਲਦੀ ਹੈ। ਇਸ ਦੇ ਛੋਟੇ ਸਾਈਜ਼ ਕਾਰਨ ਇਸ ਨੂੰ ਟ੍ਰੈਫਿਕ ਵਿੱਚ ਚਲਾਉਣਾ ਅਤੇ ਪਾਰਕ ਕਰਨਾ ਬੇਹੱਦ ਆਸਾਨ ਹੋਵੇਗਾ।

ਕਾਰ ਦੇ ਅੰਦਰੂਨੀ ਹਿੱਸੇ ਨੂੰ ਖ਼ਾਸ ਓਸ਼ੀਅਨ ਥੀਮ 'ਤੇ ਤਿਆਰ ਕੀਤਾ ਗਿਆ ਹੈ, ਜੋ ਇਸ ਨੂੰ ਪ੍ਰੀਮੀਅਮ ਲੁੱਕ ਦਿੰਦਾ ਹੈ। ਡੈਸ਼ਬੋਰਡ ਦੇ ਵਿਚਕਾਰ ਇੱਕ ਵੱਡੀ ਫਲੋਟਿੰਗ ਟੱਚਸਕ੍ਰੀਨ ਦਿੱਤੀ ਗਈ ਹੈ, ਜਿਸ ਰਾਹੀਂ ਕਾਰ ਦੇ ਜ਼ਿਆਦਾਤਰ ਫੀਚਰਸ ਨੂੰ ਕੰਟਰੋਲ ਕੀਤਾ ਜਾ ਸਕਦਾ ਹੈ। ਆਮ ਛੋਟੀਆਂ ਪੈਟਰੋਲ ਕਾਰਾਂ ਦੇ ਮੁਕਾਬਲੇ ਇਸ ਦਾ ਕੈਬਿਨ ਜ਼ਿਆਦਾ ਹਾਈ-ਟੈਕ ਮਹਿਸੂਸ ਹੁੰਦਾ ਹੈ।

ਇਸ ਕਾਰ ਨੂੰ ਦੋ ਵੱਖ-ਵੱਖ ਬੈਟਰੀ ਪੈਕਾਂ ਨਾਲ ਪੇਸ਼ ਕੀਤਾ ਜਾਵੇਗਾ। 20 kWh ਬੈਟਰੀ ਜੋ ਇੱਕ ਵਾਰ ਚਾਰਜ ਕਰਨ 'ਤੇ ਲਗਭਗ 180 ਤੋਂ 200 ਕਿਲੋਮੀਟਰ ਦੀ ਰੇਂਜ ਦੇਵੇਗੀ। 30 kWh ਬੈਟਰੀ ਜੋ ਲਗਭਗ 300 ਕਿਲੋਮੀਟਰ ਤੱਕ ਚੱਲ ਸਕਦੀ ਹੈ। ਇਹ ਕਾਰ 100 kW ਤੱਕ ਦੀ DC ਫਾਸਟ ਚਾਰਜਿੰਗ ਨੂੰ ਸਪੋਰਟ ਕਰਦੀ ਹੈ, ਜਿਸ ਨਾਲ ਬੈਟਰੀ ਬਹੁਤ ਘੱਟ ਸਮੇਂ ਵਿੱਚ ਚਾਰਜ ਹੋ ਜਾਵੇਗੀ।

ਜਾਪਾਨ ਵਿੱਚ ਇਸ ਕਾਰ ਦੀ ਸ਼ੁਰੂਆਤੀ ਕੀਮਤ ਕਰੀਬ 25 ਲੱਖ ਜਾਪਾਨੀ ਯੇਨ ਯਾਨੀ ਭਾਰਤੀ ਕਰੰਸੀ ਅਨੁਸਾਰ ਲਗਭਗ 13.5 ਤੋਂ 14 ਲੱਖ ਰੁਪਏ ਹੋ ਸਕਦੀ ਹੈ। ਇਸ ਕੀਮਤ ਦੇ ਨਾਲ ਇਹ ਕਾਰ ਹੌਂਡਾ, ਨਿਸਾਨ ਅਤੇ ਮਿਤਸੁਬੀਸ਼ੀ ਵਰਗੀਆਂ ਕੰਪਨੀਆਂ ਦੀਆਂ ਛੋਟੀਆਂ ਕਾਰਾਂ ਨੂੰ ਸਖ਼ਤ ਟੱਕਰ ਦੇਵੇਗੀ।