Google Maps ਦੱਸੇਗਾ ਕਿੱਥੇ ਖਾਲੀ ਹੈ ਪਾਰਕਿੰਗ ਦੀ ਜਗ੍ਹਾ, ਫੋਲੋ ਕਰੋ ਸੌਖੇ ਸਟੈੱਪ

ਨਵੀਂ ਦਿੱਲੀ—  ਇਹ ਅਕਸਰ ਹੁੰਦਾ ਹੈ ਜਦੋਂ ਤੁਸੀਂ ਕਿਤੇ ਬਾਹਰ ਜਾਂਦੇ ਹੋ ਅਤੇ ਤੁਹਾਨੂੰ ਕਾਰ ਪਾਰਕ ਕਰਨ ਲਈ ਖਾਲੀ ਜਗ੍ਹਾ ਨਹੀਂ ਮਿਲਦੀ। ਇਹ ਅਜਿਹੀ ਸਮੱਸਿਆ ਹੈ, ਜਿਸ ਨਾਲ ਹਰੇਕ ਨੂੰ ਦੋ-ਚਾਰ ਹੋਣਾ ਪੈਂਦਾ ਹੈ। ਅਜਿਹੀ ਸਥਿਤੀ ਵਿਚ ਜੇਕਰ ਤੁਸੀਂ ਪਾਰਕਿੰਗ ਲਈ ਜਗ੍ਹਾ ਨਹੀਂ ਲੱਭ ਪਾ ਰਹੇ ਹੋ ਤਾਂ ਗੂਗਲ ਮੈਪ ਦੀ ਇਕ ਵਿਸ਼ੇਸ਼ਤਾ ਬਹੁਤ ਲਾਭਦਾਇਕ ਸਿੱਧ ਹੋ ਸਕਦੀ ਹੈ। ਗੂਗਲ ਮੈਪ ਦੀ ਸਹਾਇਤਾ ਨਾਲ ਇਹ ਦੇਖਿਆ ਜਾ ਸਕਦਾ ਹੈ ਕਿ ਪਾਰਕਿੰਗ ਦੀ ਜਗ੍ਹਾ ਇਕ ਨਿਰਧਾਰਤ ਜਗ੍ਹਾ 'ਤੇ ਖਾਲੀ ਹੈ ਜਾਂ ਨਹੀਂ।

ਇਹ ਵੇਖਣ ਤੋਂ ਬਾਅਦ ਕਿ ਪਾਰਕਿੰਗ ਦੀ ਜਗ੍ਹਾ ਉਪਲੱਬਧ ਹੈ ਜਾਂ ਨਹੀਂ ਤੁਸੀਂ ਕਿਤੇ ਜਾਣ ਜਾਂ ਨਾ ਜਾਣ ਦਾ ਮਨ ਬਣਾ ਸਕਦੇ ਹੋ। ਜੇਕਰ ਤੁਸੀਂ ਗੂਗਲ ਮੈਪ 'ਤੇ ਇਸ ਵਿਸ਼ੇਸ਼ਤਾ ਦੀ ਵਰਤੋਂ ਅਜੇ ਨਹੀਂ ਕੀਤੀ ਹੈ, ਤਾਂ ਤੁਹਾਨੂੰ ਕਦਮ-ਦਰ-ਕਦਮ ਗਾਈਡ ਦਾ ਪਾਲਣ ਕਰਨਾ ਪਵੇਗਾ। ਹਾਲਾਂਕਿ, ਇਸ ਤੋਂ ਪਹਿਲਾਂ ਕੁਝ ਚੀਜ਼ਾਂ ਨੂੰ ਧਿਆਨ ਵਿਚ ਰੱਖਣਾ ਮਹੱਤਵਪੂਰਨ ਹੈ। ਗੂਗਲ ਮੈਪ ਤੁਹਾਨੂੰ ਬਿਲਕੁਲ ਉਹ ਜਗ੍ਹਾ ਨਹੀਂ ਦੱਸੇਗਾ ਕਿ ਤੁਸੀਂ ਕਾਰ ਕਿੱਥੇ ਪਾਰਕ ਕਰ ਸਕਦੇ ਹੋ ਪਰ ਅਜਿਹੀਆਂ ਥਾਵਾਂ ਬਾਰੇ ਜਾਣਕਾਰੀ ਮਿਲ ਜਾਂਦੀ ਹੈ ਜਿੱਥੇ ਪਾਰਕਿੰਗ ਦੀ ਜਗ੍ਹਾ ਲੱਭਣਾ ਬਹੁਤ ਮੁਸ਼ਕਲ ਹੈ।

ਸਭ ਤੋਂ ਪਹਿਲਾਂ, ਗੂਗਲ ਮੈਪ ਦਾ ਨਵੀਨਤਮ ਸੰਸਕਰਣ ਤੁਹਾਡੇ ਸਮਾਰਟ ਫੋਨ ਵਿਚ ਹੋਣਾ ਚਾਹੀਦਾ ਹੈ। ਜੇਕਰ ਇਹ ਨਹੀਂ ਹੈ, ਤਾਂ ਪਲੇ ਸਟੋਰ ਜਾਂ ਐਪ ਸਟੋਰ 'ਤੇ ਜਾਓ ਅਤੇ ਆਪਣੀ ਐਪ ਨੂੰ ਅਪਡੇਟ ਕਰੋ। ਇੰਟਰਨੈੱਟ ਕੁਨੈਕਟੀਵਿਟੀ ਤੋਂ ਇਲਾਵਾ ਸਮਾਰਟ ਫੋਨ ਵਿਚ ਲੋਕੇਸ਼ਨ ਸਰਵਿਸ ਵੀ ਐਕਟੀਵੇਟ ਹੋਣੀ ਚਾਹੀਦੀ ਹੈ। ਇਸ ਤੋਂ ਬਾਅਦ, ਤੁਹਾਨੂੰ ਕੁਝ ਸ਼ਰਤਾਂ ਦੀ ਪਾਲਣਾ ਕਰਨੀ ਹੋਵੇਗੀ।

- ਪਹਿਲਾਂ ਗੂਗਲ ਮੈਪ ਖੋਲ੍ਹੋ ਤੇ ਇਸ ਵਿਚ ਨਿਰਧਾਰਤ ਸਥਾਨ ਲਿਖੋ।
- ਹੁਣ ਦਿਸ਼ਾ ਬਟਨ 'ਤੇ ਟੈਪ ਕਰੋ ਜੋ ਹੇਠਾਂ ਦਿਖਾਈ ਦਿੰਦਾ ਹੈ।
- ਫਿਰ ਹੇਠਾਂ ਦਿਖਾਈ ਗਈ 'ਸਟਾਰਟ' ਬਾਰ ਨੂੰ ਸਲਾਇਡ ਕਰੋ।
- ਇਸ ਤੋਂ ਬਾਅਦ ਤੁਹਾਨੂੰ ਪਾਰਕਿੰਗ ਸਥਾਨ ਦਾ 'ਪੀ' ਸਿੰਬਲ ਦਿਸੇਗਾ, ਜੋ ਇਹ ਦੱਸੇਗਾ ਕਿ ਤੁਹਾਡੀ ਮੰਜ਼ਲ ਦੇ ਆਸਪਾਸ ਪਾਰਕਿੰਗ ਸਪੇਸ ਆਸਾਨੀ ਨਾਲ ਉਪਲੱਬਧ ਹੈ ਜਾਂ ਨਹੀਂ।