ਪਤੀ ਦੀ ਮੌਤ ਦੇ 4 ਦਿਨ ਬਾਅਦ ਹੀ ਸ਼ੂਟਿੰਗ ''ਤੇ ਪਰਤੀ ਮਸ਼ਹੂਰ ਅਦਾਕਾਰ

ਮਨੋਰੰਜਨ ਡੈਸਕ - ਦੱਖਣੀ ਭਾਰਤੀ ਸਿਨੇਮਾ ਦੀ ਮਸ਼ਹੂਰ ਅਦਾਕਾਰਾ ਵਿਨਿਆ ਪ੍ਰਸਾਦ ਦੀ ਜ਼ਿੰਦਗੀ ਸੰਘਰਸ਼ ਅਤੇ ਜਜ਼ਬੇ ਦੀ ਇਕ ਵੱਡੀ ਮਿਸਾਲ ਹੈ। ਕਰਨਾਟਕ ਦੇ ਉਡੁਪੀ ਦੀ ਰਹਿਣ ਵਾਲੀ ਵਿਨਿਆ ਨੇ ਆਪਣੇ ਕਲਾਤਮਕ ਸਫ਼ਰ ਦੀ ਸ਼ੁਰੂਆਤ ਇਕ ਵਾਇਸ ਆਰਟਿਸਟ ਵਜੋਂ ਕੀਤੀ ਸੀ। ਉਹ 1990 ਦੇ ਦਹਾਕੇ ਵਿਚ ਕੰਨੜ ਅਤੇ ਮਲਿਆਲਮ ਸਿਨੇਮਾ ਦੀ ਇਕ ਪ੍ਰਮੁੱਖ ਅਦਾਕਾਰਾ ਵਜੋਂ ਉਭਰੀ, ਪਰ ਉਸ ਦੀ ਨਿੱਜੀ ਜ਼ਿੰਦਗੀ ਵਿਚ ਉਦੋਂ ਦੁੱਖਾਂ ਦਾ ਪਹਾੜ ਟੁੱਟ ਪਿਆ ਜਦੋਂ ਉਹ ਸਿਰਫ਼ 28 ਸਾਲ ਦੀ ਸੀ ਅਤੇ ਉਸ ਦੇ ਪਤੀ ਪ੍ਰਸਾਦ (ਫ਼ਿਲਮ ਐਡੀਟਰ) ਦਾ ਦਿਹਾਂਤ ਹੋ ਗਿਆ।

ਪਤੀ ਦੀ ਮੌਤ ਤੋਂ ਬਾਅਦ ਵਿਨਿਆ ਨੇ ਜੋ ਹਿੰਮਤ ਦਿਖਾਈ, ਉਸ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ। ਉਹ ਆਪਣੇ ਪਤੀ ਦੇ ਜਾਣ ਦੇ ਮਹਿਜ਼ ਚਾਰ ਦਿਨਾਂ ਬਾਅਦ ਹੀ ਸ਼ੂਟਿੰਗ 'ਤੇ ਵਾਪਸ ਪਰਤ ਆਈ ਸੀ। ਹਾਲਾਂਕਿ ਇਸ ਫੈਸਲੇ ਲਈ ਉਸ ਦੀ ਆਲੋਚਨਾ ਵੀ ਹੋਈ, ਪਰ ਬਾਅਦ ਵਿਚ ਅਦਾਕਾਰਾ ਨੇ ਦੱਸਿਆ ਕਿ ਘਰ ਵਿਚ ਖਾਲੀ ਬੈਠਣਾ ਉਸ ਦੇ ਦੁੱਖ ਨੂੰ ਹੋਰ ਵਧਾ ਰਿਹਾ ਸੀ। ਇਸ ਤੋਂ ਇਲਾਵਾ, ਆਪਣੀ ਛੋਟੀ ਬੇਟੀ ਦੇ ਭਵਿੱਖ ਨੂੰ ਸੁਰੱਖਿਅਤ ਰੱਖਣ ਲਈ ਕੰਮ ਕਰਨਾ ਉਸ ਦੀ ਇਕ ਮਜਬੂਰੀ ਅਤੇ ਲੋੜ ਸੀ।

ਵਿਨਿਆ ਪ੍ਰਸਾਦ ਨੇ ਆਪਣੇ ਕਰੀਅਰ ਵਿਚ 100 ਤੋਂ ਵੱਧ ਫ਼ਿਲਮਾਂ ਵਿਚ ਕੰਮ ਕੀਤਾ ਹੈ। ਉਸ ਨੂੰ ਰਜਨੀਕਾਂਤ ਦੀ ਬਲਾਕਬਸਟਰ ਫ਼ਿਲਮ 'ਚੰਦਰਮੁਖੀ' ਵਿਚ ਨਾਸਰ ਦੀ ਪਤਨੀ ਦੇ ਕਿਰਦਾਰ ਅਤੇ ਮਲਿਆਲਮ ਕਲਾਸਿਕ ਫ਼ਿਲਮ 'ਮਣੀਚਿਤਰਥਾਜੂ' ਵਿਚ ਸ਼੍ਰੀਦੇਵੀ ਦੇ ਰੋਲ ਲਈ ਪੂਰੇ ਦੱਖਣ ਭਾਰਤ ਵਿਚ ਖਾਸ ਪਛਾਣ ਮਿਲੀ। ਫ਼ਿਲਮਾਂ ਦੇ ਨਾਲ-ਨਾਲ ਉਸ ਨੇ ਟੈਲੀਵਿਜ਼ਨ ਦੀ ਦੁਨੀਆ ਵਿਚ ਵੀ ਵੱਡੀ ਸਫਲਤਾ ਹਾਸਲ ਕੀਤੀ, ਖਾਸ ਕਰਕੇ ਹਿੱਟ ਸੀਰੀਅਲ 'ਸਤਰੀ' ਵਿਚ ਇੰਦੂ ਦੇ ਕਿਰਦਾਰ ਨਾਲ ਉਹ ਦਰਸ਼ਕਾਂ ਦੇ ਦਿਲਾਂ 'ਤੇ ਰਾਜ ਕਰਨ ਲੱਗੀ।

ਆਪਣੀ ਜ਼ਿੰਦਗੀ ਦੇ ਨਵੇਂ ਅਧਿਆਏ ਬਾਰੇ ਗੱਲ ਕਰਦਿਆਂ, ਵਿਨਿਆ ਨੇ ਕਈ ਸਾਲਾਂ ਬਾਅਦ ਜਯੋਤੀ ਪ੍ਰਕਾਸ਼ ਨਾਲ ਦੂਜਾ ਵਿਆਹ ਕੀਤਾ। ਦਿਲਚਸਪ ਗੱਲ ਇਹ ਹੈ ਕਿ ਉਸ ਨੇ ਅੱਜ ਵੀ ਆਪਣੇ ਪਹਿਲੇ ਪਤੀ ਦਾ ਨਾਮ 'ਪ੍ਰਸਾਦ' ਆਪਣੇ ਨਾਮ ਨਾਲ ਜੋੜ ਕੇ ਰੱਖਿਆ ਹੋਇਆ ਹੈ, ਜਿਸ ਵਿਚ ਉਸ ਦੇ ਦੂਜੇ ਪਤੀ ਨੇ ਵੀ ਪੂਰਾ ਸਹਿਯੋਗ ਦਿੱਤਾ। ਅੱਜ ਵੀ ਉਹ ਸਿਨੇਮਾ ਵਿਚ ਪੂਰੀ ਤਰ੍ਹਾਂ ਸਰਗਰਮ ਹੈ ਅਤੇ ਕਈ ਫ਼ਿਲਮੀ ਪ੍ਰੋਜੈਕਟਾਂ ਵਿਚ ਆਪਣੀ ਅਦਾਕਾਰੀ ਦੇ ਜੌਹਰ ਦਿਖਾ ਰਹੀ ਹੈ।