ਹੋਟਲ ਦੀ 14ਵੀਂ ਮੰਜ਼ਿਲ ਤੋਂ ਮਿਲੀ ਦਿੱਗਜ ਅਦਾਕਾਰ ਦੀ 34 ਸਾਲਾ ਧੀ ਦੀ ਲਾਸ਼; ਇੰਡਸਟਰੀ 'ਚ ਪਸਰਿਆ ਮਾਤਮ

ਸੈਨ ਫਰਾਂਸਿਸਕੋ: ਹਾਲੀਵੁੱਡ ਦੇ ਦਿੱਗਜ ਅਦਾਕਾਰ ਟੌਮੀ ਲੀ ਜੋਨਸ ਦੇ ਪਰਿਵਾਰ ਤੋਂ ਇੱਕ ਬਹੁਤ ਹੀ ਮੰਦਭਾਗੀ ਖ਼ਬਰ ਸਾਹਮਣੇ ਆਈ ਹੈ। ਉਨ੍ਹਾਂ ਦੀ 34 ਸਾਲਾ ਧੀ ਵਿਕਟੋਰੀਆ ਜੋਨਸ ਸੈਨ ਫਰਾਂਸਿਸਕੋ ਦੇ ਇੱਕ ਮਸ਼ਹੂਰ ਹੋਟਲ ਵਿੱਚ ਮ੍ਰਿਤਕ ਪਾਈ ਗਈ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਇਹ ਘਟਨਾ ਵੀਰਵਾਰ ਤੜਕੇ ਕਰੀਬ 3 ਵਜੇ ਦੀ ਹੈ, ਜਦੋਂ ਸੈਨ ਫਰਾਂਸਿਸਕੋ ਦੇ ਨੋਬ ਹਿਲ ਇਲਾਕੇ ਵਿੱਚ ਸਥਿਤ ਆਲੀਸ਼ਾਨ ਫੇਅਰਮੌਂਟ ਹੋਟਲ ਦੀ 14ਵੀਂ ਮੰਜ਼ਿਲ 'ਤੇ ਇੱਕ ਮਹਿਮਾਨ ਨੇ ਵਿਕਟੋਰੀਆ ਨੂੰ ਜ਼ਮੀਨ 'ਤੇ ਪਏ ਦੇਖਿਆ। ਸ਼ੁਰੂ ਵਿੱਚ ਮਹਿਮਾਨ ਨੂੰ ਲੱਗਿਆ ਕਿ ਉਹ ਸ਼ਰਾਬ ਪੀਣ ਕਾਰਨ ਬੇਹੋਸ਼ ਹੋ ਗਈ ਹੈ, ਜਿਸ ਤੋਂ ਬਾਅਦ ਹੋਟਲ ਸਟਾਫ ਨੂੰ ਸੂਚਿਤ ਕੀਤਾ ਗਿਆ। ਸਟਾਫ ਨੇ ਤੁਰੰਤ ਉਸ ਨੂੰ ਹੋਸ਼ ਵਿੱਚ ਲਿਆਉਣ ਲਈ ਸੀਪੀਆਰ (CPR) ਦਿੱਤੀ ਅਤੇ ਐਂਬੂਲੈਂਸ ਬੁਲਾਈ, ਪਰ ਮੌਕੇ 'ਤੇ ਪਹੁੰਚੇ ਪੈਰਾਮੈਡਿਕਸ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਇਹ ਵੀ ਪੜ੍ਹੋ: ਕਦੇ ਮਾਂ ਨਹੀਂ ਬਣੇਗੀ ਬਾਲੀਵੁੱਡ ਦੀ ਇਹ ਮਸ਼ਹੂਰ ਗਾਇਕਾ, ਖੁਦ ਕੀਤਾ ਵੱਡਾ ਖੁਲਾਸਾ

ਸੈਨ ਫਰਾਂਸਿਸਕੋ ਪੁਲਸ ਮੁਤਾਬਕ ਸ਼ੁਰੂਆਤੀ ਜਾਂਚ ਵਿੱਚ ਇਹ ਮੌਤ ਗੈਰ-ਸ਼ੱਕੀ ਲੱਗ ਰਹੀ ਹੈ। ਘਟਨਾ ਸਥਾਨ ਤੋਂ ਕਿਸੇ ਵੀ ਤਰ੍ਹਾਂ ਦੀ ਨਸ਼ੀਲੀ ਵਸਤੂ ਜਾਂ ਖੁਦਕੁਸ਼ੀ ਦੇ ਸੰਕੇਤ ਨਹੀਂ ਮਿਲੇ ਹਨ। ਹਾਲਾਂਕਿ, ਅਜੇ ਤੱਕ ਇਹ ਸਪੱਸ਼ਟ ਨਹੀਂ ਹੋ ਸਕਿਆ ਹੈ ਕਿ ਵਿਕਟੋਰੀਆ ਉਸ ਹੋਟਲ ਵਿੱਚ ਮਹਿਮਾਨ ਵਜੋਂ ਰੁਕੀ ਹੋਈ ਸੀ ਜਾਂ ਉਹ ਉੱਥੇ ਕਿਵੇਂ ਪਹੁੰਚੀ। ਫਿਲਹਾਲ ਮੈਡੀਕਲ ਐਗਜ਼ਾਮੀਨਰ ਮੌਤ ਦੇ ਅਸਲ ਕਾਰਨਾਂ ਦੀ ਜਾਂਚ ਕਰ ਰਹੇ ਹਨ। ਵਿਕਟੋਰੀਆ ਜੋਨਸ ਟੌਮੀ ਲੀ ਜੋਨਸ ਅਤੇ ਉਨ੍ਹਾਂ ਦੀ ਪਹਿਲੀ ਪਤਨੀ ਕਿੰਬਰਲੀ ਕਲੋਗਲੇ ਦੀ ਬੇਟੀ ਸੀ। ਉਸ ਨੇ ਆਪਣੇ ਪਿਤਾ ਦੇ ਨਕਸ਼ੇ-ਕਦਮਾਂ 'ਤੇ ਚੱਲਦਿਆਂ ਅਦਾਕਾਰੀ ਵਿੱਚ ਵੀ ਹੱਥ ਅਜ਼ਮਾਇਆ ਸੀ ਅਤੇ ਉਹ 'ਮੈਨ ਇਨ ਬਲੈਕ II', 'ਦਿ ਥ੍ਰੀ ਬਰੀਅਲਜ਼ ਆਫ਼ ਮੇਲਕੁਏਡਸ ਐਸਟਰਾਡਾ' ਅਤੇ ਪ੍ਰਸਿੱਧ ਸੀਰੀਅਲ 'ਵਨ ਟ੍ਰੀ ਹਿਲ' ਵਿੱਚ ਨਜ਼ਰ ਆ ਚੁੱਕੀ ਸੀ।

ਇਹ ਵੀ ਪੜ੍ਹੋ: ਮਾਂ ਦੇ ਦੂਜੇ ਵਿਆਹ ਬਾਰੇ ਬਿੱਗ ਬੌਸ ਫੇਮ ਫਰਹਾਨਾ ਭੱਟ ਨੇ ਕੀਤਾ ਖੁਲਾਸਾ; ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਇਆ ਬਿਆਨ