ਅਕਸ਼ੈ ਨੇ ਦਿਖਾਈ ਦਰਿਆਦਿਲੀ: ਹਾਦਸੇ ''ਚ ਜ਼ਖਮੀ ਆਟੋ ਚਾਲਕ ਦੇ ਇਲਾਜ ਦੀ ਚੁੱਕੀ ਜ਼ਿੰਮੇਵਾਰੀ

ਮੁੰਬਈ- ਬਾਲੀਵੁੱਡ ਦੇ ‘ਖਿਲਾੜੀ’ ਅਦਾਕਾਰ ਅਕਸ਼ੈ ਕੁਮਾਰ ਇੱਕ ਵਾਰ ਫਿਰ ਆਪਣੀ ਇਨਸਾਨੀਅਤ ਕਾਰਨ ਚਰਚਾ ਵਿੱਚ ਹਨ। ਸਰੋਤਾਂ ਅਨੁਸਾਰ ਅਕਸ਼ੈ ਕੁਮਾਰ ਦੀ ਟੀਮ ਨੇ ਮੁੰਬਈ ਵਿੱਚ ਹੋਏ ਇੱਕ ਸੜਕ ਹਾਦਸੇ ਵਿੱਚ ਜ਼ਖਮੀ ਹੋਏ ਆਟੋ ਚਾਲਕ ਦੇ ਇਲਾਜ ਦੀ ਪੂਰੀ ਜ਼ਿੰਮੇਵਾਰੀ ਚੁੱਕ ਲਈ ਹੈ।
ਕਿਵੇਂ ਹੋਇਆ ਹਾਦਸਾ?
ਸਰੋਤਾਂ ਮੁਤਾਬਕ ਇਹ ਹਾਦਸਾ 19 ਜਨਵਰੀ ਦੀ ਰਾਤ ਨੂੰ ਮੁੰਬਈ ਦੇ ਜੁਹੂ ਇਲਾਕੇ ਵਿੱਚ ਵਾਪਰਿਆ। ਇੱਕ ਤੇਜ਼ ਰਫ਼ਤਾਰ ਮਰਸੀਡੀਜ਼ ਕਾਰ ਨੇ ਇੱਕ ਆਟੋ ਰਿਕਸ਼ਾ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਤੋਂ ਬਾਅਦ ਆਟੋ ਬੇਕਾਬੂ ਹੋ ਕੇ ਅਕਸ਼ੈ ਕੁਮਾਰ ਦੇ ਕਾਫ਼ਲੇ ਦੀ ਇੱਕ ਕਾਰ ਨਾਲ ਜਾ ਟਕਰਾਇਆ। ਇਸ ਭਿਆਨਕ ਹਾਦਸੇ ਵਿੱਚ ਆਟੋ ਬੁਰੀ ਤਰ੍ਹਾਂ ਨੁਕਸਾਨਿਆ ਗਿਆ ਅਤੇ ਚਾਲਕ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਿਆ।
ਮੌਕੇ 'ਤੇ ਖੁਦ ਮਦਦ ਲਈ ਪਹੁੰਚੇ ਅਕਸ਼ੈ
ਹਾਦਸੇ ਦੇ ਤੁਰੰਤ ਬਾਅਦ ਅਕਸ਼ੈ ਕੁਮਾਰ ਨੇ ਆਪਣੀ ਗੱਡੀ ਵਿੱਚੋਂ ਨਿਕਲ ਕੇ ਜ਼ਖਮੀ ਚਾਲਕ ਨੂੰ ਹਸਪਤਾਲ ਪਹੁੰਚਾਉਣ ਵਿੱਚ ਮਦਦ ਕੀਤੀ। ਸਰੋਤਾਂ ਅਨੁਸਾਰ ਅਦਾਕਾਰ ਨੇ ਕੇਵਲ ਹਸਪਤਾਲ ਪਹੁੰਚਾਉਣ ਤੱਕ ਹੀ ਆਪਣੀ ਜ਼ਿੰਮੇਵਾਰੀ ਨਹੀਂ ਨਿਭਾਈ, ਸਗੋਂ ਉਨ੍ਹਾਂ ਦੀ ਟੀਮ ਲਗਾਤਾਰ ਜ਼ਖਮੀ ਚਾਲਕ ਦੇ ਪਰਿਵਾਰ ਨਾਲ ਸੰਪਰਕ ਵਿੱਚ ਹੈ।

ਪਰਿਵਾਰ ਨੇ ਦਿੱਤੀ ਜਾਣਕਾਰੀ
ਜ਼ਖਮੀ ਆਟੋ ਚਾਲਕ ਦੀ ਪਛਾਣ ਵਾਸ਼ਿਦ ਖਾਨ ਵਜੋਂ ਹੋਈ ਹੈ। ਉਸ ਦੇ ਭਰਾ ਨੇ ਮੀਡੀਆ ਨੂੰ ਦੱਸਿਆ ਕਿ: ਹਾਦਸੇ ਕਾਰਨ ਵਾਸ਼ਿਦ ਦੀ ਜੌਅ ਲਾਈਨ (ਜਬਾੜਾ) ਫ੍ਰੈਕਚਰ ਹੋ ਗਈ ਹੈ ਅਤੇ ਉਸ ਦੀ ਸਰਜਰੀ ਚੱਲ ਰਹੀ ਹੈ। ਅਕਸ਼ੈ ਕੁਮਾਰ ਦੀ ਟੀਮ ਲਗਾਤਾਰ ਮੈਡੀਕਲ ਖਰਚੇ ਅਤੇ ਵਾਸ਼ਿਦ ਦੀ ਸਿਹਤ ਬਾਰੇ ਅਪਡੇਟ ਲੈ ਰਹੀ ਹੈ। ਵਾਸ਼ਿਦ ਆਪਣੇ ਮਾਤਾ-ਪਿਤਾ ਨਾਲ ਰਹਿੰਦਾ ਹੈ ਅਤੇ ਹਾਦਸੇ ਵੇਲੇ ਉਹ ਸਵਾਰੀ ਛੱਡ ਕੇ ਵਾਪਸ ਆ ਰਿਹਾ ਸੀ।
ਪੁਲਸ ਦੀ ਕਾਰਵਾਈ
ਮੁੰਬਈ ਪੁਲਸ ਨੇ ਲਾਪਰਵਾਹੀ ਨਾਲ ਗੱਡੀ ਚਲਾਉਣ ਦੇ ਦੋਸ਼ ਵਿੱਚ ਮਰਸੀਡੀਜ਼ ਚਾਲਕ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਹਾਲਾਂਕਿ ਕੁਝ ਰਿਪੋਰਟਾਂ ਅਨੁਸਾਰ ਲਾਪਰਵਾਹੀ ਨਾਲ ਗੱਡੀ ਚਲਾਉਣ ਲਈ ਅਕਸ਼ੈ ਦੇ ਡਰਾਈਵਰ 'ਤੇ ਵੀ ਐਫ.ਆਈ.ਆਰ. ਦਰਜ ਕੀਤੀ ਗਈ ਹੈ।