ਬਾਇਓਕਾਨ ਮੁਖੀ ਦਾ ਸਰਕਾਰ ਨੂੰ ਸਵਾਲ, ਟੀਕੇ ਦੀ ਸਪਲਾਈ ਇੰਨੀ ਕਿਉਂ ਘਟੀ?

ਨਵੀਂ ਦਿੱਲੀ- ਬਾਇਓਕਾਨ ਦੀ ਕਾਰਜਕਾਰੀ ਮੁਖੀ ਕਿਰਣ ਮਜੂਮਦਾਰ ਸ਼ਾ ਨੇ ਕੋਵਿਡ-19 ਦੀ ਟੀਕੇ ਦੀ ਕਮੀ 'ਤੇ ਚਿੰਤਾ ਜਤਾਈ ਹੈ। ਉਨ੍ਹਾਂ ਨਾਲ ਹੀ ਸਰਕਾਰ ਨੂੰ ਇਸ ਦੀ ਉਪਲਬਧਤਾ ਵਿਚ ਪਾਰਦਰਸ਼ਤਾ ਦੀ ਮੰਗ ਕੀਤੀ ਹੈ, ਤਾਂ ਜੋ ਆਮ ਲੋਕ ਸੰਜਮ ਨਾਲ ਕੰਮ ਲੈਣ ਅਤੇ ਆਪਣੀ ਵਾਰੀ ਦੀ ਉਡੀਕ ਕਰਨ।

ਸਰਕਾਰ ਨੇ 1 ਮਈ ਤੋਂ ਕੋਵਿਡ-19 ਟੀਕਾਕਰਨ ਪ੍ਰੋਗਰਾਮ ਨੂੰ 18 ਸਾਲ ਤੋਂ ਉੱਪਰ ਦੇ ਸਾਰੇ ਲੋਕਾਂ ਲਈ ਖੋਲ੍ਹਣ ਦੀ ਘੋਸ਼ਣਾ ਕੀਤੀ ਸੀ। ਮਜੂਮਦਾਰ ਸ਼ਾ ਨੇ ਮੰਗਲਵਾਰ ਨੂੰ ਸਿਹਤ ਮੰਤਰਾਲਾ ਨੂੰ ਟੈਗ ਕਰਕੇ ਟਵੀਟ ਕੀਤਾ, ''ਇਸ ਗੱਲ ਨੂੰ ਲੈ ਕੇ ਬਹੁਤ ਚਿੰਤਤ ਹਾਂ ਕਿ ਟੀਕੇ ਦੀ ਸਪਲਾਈ ਇੰਨੀ ਘੱਟ ਕਿਉਂ ਹੈ। ਸਿਹਤ ਮੰਤਰਾਲ, ਕੀ ਅਸੀਂ ਇਹ ਜਾਣ ਸਕਦੇ ਹਾਂ ਕਿ ਹਰ ਮਹੀਨੇ ਸੱਤ ਕਰੋੜ ਖੁਰਾਕਾਂ ਕਿੱਥੇ ਜਾ ਰਹੀਆਂ ਹਨ? ਜੇਕਰ ਸਪਲਾਈ ਦੀ ਸਮਾਂ ਸਾਰਣੀ ਜਨਤਕ ਕੀਤੀ ਜਾਵੇ ਤਾਂ ਲੋਕ ਸੰਜਮ ਨਾਲ ਉਡੀਕ ਕਰ ਸਕਦੇ ਹਨ।"

Very concerned about why vaccines are in such short supply. Can we please know where the 70 million doses are being deployed every month? @MoHFW_INDIA We need better transparency to avoid the suspense. If a timetable of supplies is made public people can patiently wait their turn

— Kiran Mazumdar-Shaw (@kiranshaw) May 11, 2021

ਇਸ ਮਹੀਨੇ ਦੀ ਸ਼ੁਰੂਆਤ ਵਿਚ ਮੀਡੀਆ ਵਿਚ ਖ਼ਬਰਾਂ ਆਈਆਂ ਸਨ ਕਿ ਕੇਂਦਰ ਨੇ ਕੋਵਿਡ-19 ਟੀਕੇ ਲਈ ਕੋਈ ਨਵਾਂ ਆਰਡਰ ਨਹੀਂ ਦਿੱਤਾ ਹੈ, ਜਿਸ 'ਤੇ ਪ੍ਰਤੀਕਿਰਿਆ ਦਿੰਦੇ ਹੋਏ ਸਿਹਤ ਮੰਤਰਾਲਾ ਨੇ ਕਿਹਾ ਕਿ ਸੀਰਮ ਇੰਸਟੀਚਿਊਟ ਨੂੰ ਕੋਵੀਸ਼ੀਲਡ ਟੀਕੇ ਦੀਆਂ 11 ਕਰੋੜ ਖੁਰਾਕਾਂ ਲਈ 100 ਫ਼ੀਸਦੀ ਅਗਾਊਂ ਦੇ ਤੌਰ 'ਤੇ 1,732.50 ਕਰੋੜ ਰੁਪਏ 28 ਅਪ੍ਰੈਲ ਨੂੰ ਦੇ ਦਿੱਤੇ ਗਏ ਸਨ। ਸਿਹਤ ਮੰਤਰਾਲਾ ਨੇ ਕਿਹਾ ਕਿ ਇਸ ਤੋਂ ਇਲਾਵਾ ਭਾਰਤ ਬਾਇਓਟੈਕ ਇੰਡੀਆ ਲਿਮਟਿਡ ਨੂੰ ਕੋਵੈਕਸੀਨ ਦੀਆਂ ਪੰਜ ਕਰੋੜ ਖੁਰਾਕਾਂ ਲਈ 28 ਅਪ੍ਰੈਲ ਨੂੰ 787.50 ਕਰੋੜ ਰੁਪਏ ਜਾਰੀ ਕੀਤੇ ਗਏ।