ਦਲਿਤ ਵੋਟਾਂ : ਕਾਂਗਰਸ ਚਾਹੁੰਦੀ ਹੈ ਮਾਇਆਵਤੀ ਨੂੰ ਵਿਰੋਧੀ ਮੋਰਚੇ ’ਚ ਸ਼ਾਮਲ ਕਰਨਾ

2027 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਯੂ. ਪੀ. ’ਚ ਦਲਿਤਾਂ ਦੀਆਂ ਵੋਟਾਂ ਹਾਸਲ ਕਰਨ ਲਈ, ਯੂ. ਪੀ. ਕਾਂਗਰਸ ਦੇ ਆਗੂਆਂ ਦਾ ਇਕ ਹਿੱਸਾ ਮਾਇਆਵਤੀ ਨੂੰ ਭਾਜਪਾ ਵਿਰੁੱਧ ਵਿਰੋਧੀ ਮੋਰਚੇ ’ਚ ਸ਼ਾਮਲ ਕਰਨਾ ਚਾਹੁੰਦਾ ਹੈ। ਬਸਪਾ ਨਾਲ ਗੱਠਜੋੜ ਵਿਰੋਧੀ ਧਿਰ ਨੂੰ ਦਲਿਤ, ਮੁਸਲਿਮ ਅਤੇ ਓ. ਬੀ. ਸੀ. ਵੋਟਾਂ ਨੂੰ ਇਕਜੁੱਟ ਕਰਨ ’ਚ ਮਦਦ ਕਰ ਸਕਦਾ ਹੈ। ਇਸ ਸੰਦਰਭ ’ਚ, ਸੀਨੀਅਰ ਕਾਂਗਰਸੀ ਆਗੂਆਂ ਰਾਜੇਂਦਰ ਪਾਲ ਗੌਤਮ ਅਤੇ ਲੋਕ ਸਭਾ ਮੈਂਬਰ ਤਨੁਜ ਪੂਨੀਆ ਨੇ ਹਾਲ ਹੀ ’ਚ ਮਾਇਆਵਤੀ ਨਾਲ ਗੱਲਬਾਤ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ, ਪਰ ਕਥਿਤ ਤੌਰ ’ਤੇ ਉਨ੍ਹਾਂ ਵੱਲੋਂ ਕੋਈ ਹੁੰਗਾਰਾ ਨਾ ਮਿਲਣ ਤੋਂ ਬਾਅਦ ਉਹ ਉਨ੍ਹਾਂ ਨੂੰ ਮਿਲੇ ਬਿਨਾਂ ਹੀ ਵਾਪਸ ਪਰਤ ਆਏ।

ਹਾਲਾਂਕਿ, ਤਨੁਜ ਪੂਨੀਆ ਨੇ ਇਕ ਵੀਡੀਓ ਬਿਆਨ ’ਚ ਸਪੱਸ਼ਟ ਕੀਤਾ ਕਿ ਮਾਇਆਵਤੀ ਦੇ ਨਿਵਾਸ ਅਸਥਾਨ ’ਤੇ ਜਾਣਾ ਉਨ੍ਹਾਂ ਅਤੇ ਰਾਜੇਂਦਰ ਪਾਲ ਗੌਤਮ ਵਲੋਂ ਸ਼ੁਰੂ ਕੀਤਾ ਗਿਆ ਇਕ ਨਿੱਜੀ ਪ੍ਰੋਗਰਾਮ ਸੀ। ਉਨ੍ਹਾਂ ਅੱਗੇ ਕਿਹਾ ਕਿ ਭਾਰਤੀ ਰਾਸ਼ਟਰੀ ਕਾਂਗਰਸ ਨੇ ਮਾਇਆਵਤੀ ਨਾਲ ਕਿਸੇ ਵੀ ਮੁਲਾਕਾਤ ਨੂੰ ਅਧਿਕਾਰਤ ਤੌਰ ’ਤੇ ਮਨਜ਼ੂਰੀ ਨਹੀਂ ਦਿੱਤੀ ਸੀ। ਦੂਜੇ ਪਾਸੇ ਕਾਂਗਰਸ ਲੋਕ ਸਭਾ 2024 ’ਚ ਸੂਬੇ ’ਚ ਛੇ ਸੀਟਾਂ ਜਿੱਤ ਕੇ ਉਤਸ਼ਾਹਿਤ ਹੈ ਅਤੇ ਹੁਣ ਉਹ ਆਪਣੀਆਂ ਗੱਠਜੋੜ ਦੀਆਂ ਤਰਜੀਹਾਂ ਨੂੰ ਮੁੜ ਨਿਰਧਾਰਤ ਕਰਦੀ ਦਿਖਾਈ ਦੇ ਰਹੀ ਹੈ। ਸਿਆਸੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਕਾਂਗਰਸ ਅਤੇ ਸਪਾ ਵਿਚਾਲੇ ਵਧਦੀ ਦੂਰੀ ਬਸਪਾ ਲਈ ਮੌਕੇ ਦੀ ਕੁੰਜੀ ਹੋ ਸਕਦੀ ਹੈ। ਹਾਲਾਂਕਿ, ਅਜਿਹਾ ਗੱਠਜੋੜ ਬਣਾਉਣਾ ਆਸਾਨ ਨਹੀਂ ਹੋ ਸਕਦਾ, ਕਿਉਂਕਿ ਕਾਂਗਰਸ 2027 ਦੀਆਂ ਵਿਧਾਨ ਸਭਾ ਚੋਣਾਂ ’ਚ ਗੱਠਜੋੜ ’ਚ ਬਿਹਤਰ ਹਿੱਸੇਦਾਰੀ ਲਈ ਸਪਾ ’ਤੇ ਦਬਾਅ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ।

ਕਾਂਗਰਸ ’ਚ ਸੰਗਠਨਾਤਮਕ ਫੇਰਬਦਲ ਜਲਦੀ!

ਕਾਂਗਰਸ ’ਚ ਚਰਚਾ ਜ਼ੋਰਾਂ ’ਤੇ ਹੈ ਕਿ ਜਲਦੀ ਹੀ ਸੰਗਠਨਾਤਮਕ ਫੇਰਬਦਲ ਹੋਵੇਗਾ ਅਤੇ ਅੰਦਰੂਨੀ ਚਰਚਿਆਂ ’ਚ ਪਾਰਟੀ ਦੇ ਢਾਂਚੇ ’ਚ ਜ਼ਿੰਮੇਵਾਰੀਆਂ ਦੀ ਵੱਡੀ ਮੁੜ-ਵੰਡ ਹੋਣ ਦੇ ਸੰਕੇਤ ਹਨ। ਕਈ ਸੀਨੀਅਰ ਕਾਂਗਰਸੀ ਆਗੂ ਪਾਰਟੀ ਦੇ ਅੰਦਰ ਕਾਂਗਰਸ ਜਨਰਲ ਸਕੱਤਰ ਪ੍ਰਿਅੰਕਾ ਗਾਂਧੀ ਵਾਡਰਾ ਲਈ ਵੱਡੀ ਭੂਮਿਕਾ ਦੀ ਵਕਾਲਤ ਕਰ ਰਹੇ ਹਨ। ਦੂਜੇ ਪਾਸੇ, ਅਗਲੇ ਸਾਲ ਉੱਤਰ ਪ੍ਰਦੇਸ਼, ਉੱਤਰਾਖੰਡ, ਪੰਜਾਬ ਅਤੇ ਗੋਆ ’ਚ ਹੋਣ ਵਾਲੀਆਂ ਮਹੱਤਵਪੂਰਨ ਵਿਧਾਨ ਸਭਾ ਚੋਣਾਂ ਨੂੰ ਦੇਖਦੇ ਹੋਏ, ਪਾਰਟੀ ਪੁਨਰਗਠਨ ਦੀ ਪ੍ਰਕਿਰਿਆ ਨੂੰ ਸਮੇਂ ਤੋਂ ਪਹਿਲਾਂ ਪੂਰਾ ਕਰਨਾ ਚਾਹੁੰਦੀ ਹੈ। ਇਸ ’ਚ ਸੂਬਾ ਲੀਡਰਸ਼ਿਪ ’ਚ ਬਦਲਾਅ ਸ਼ਾਮਲ ਹੈ, ਜਿਸ ’ਚ ਇਕਾਈ ਮੁਖੀ ਅਤੇ ਪ੍ਰਮੁੱਖ ਸੰਗਠਨਾਤਮਕ ਅਹੁਦੇ ਆਉਂਦੇ ਹਨ।

ਕਾਂਗਰਸ ਦੀ ਸੂਬਾ ਇਕਾਈ ਦੇ ਪ੍ਰਧਾਨ ਅਜੇ ਰਾਏ, ਜਿਨ੍ਹਾਂ ਨੂੰ ਪ੍ਰਿਅੰਕਾ ਗਾਂਧੀ ਦੀ ‘ਅੱਖ ਅਤੇ ਕੰਨ’ ਮੰਨਿਆ ਜਾਂਦਾ ਹੈ, ਉਹ ਭੂਮੀਹਾਰ ਜਾਤੀ ਨਾਲ ਸਬੰਧਤ ਹਨ। ਇਹ ਇਕ ਅਜਿਹੀ ਜਾਤੀ ਹੈ ਜੋ ਪੂਰਬੀ ਯੂ. ਪੀ. ’ਚ ਘੱਟ ਆਬਾਦੀ ਵਾਲੀ ਹੈ ਅਤੇ ਜਿਨ੍ਹਾਂ ਦਾ ਪ੍ਰਭਾਵ ਸ਼ਾਇਦ ਹੀ ਪੰਜ ਸੰਸਦੀ ਖੇਤਰਾਂ ’ਚ ਹੈ। ਚਰਚੇ ਤੇਜ਼ ਹਨ ਕਿ ਪਾਰਟੀ ਇਕ ਨਵਾਂ ਸੂਬਾ ਪ੍ਰਧਾਨ ਨਿਯੁਕਤ ਕਰਨ ਦੀ ਯੋਜਨਾ ਬਣਾ ਰਹੀ ਹੈ ਅਤੇ ਉਨ੍ਹਾਂ ਨੂੰ ਬਦਲਣ ’ਤੇ ਵਿਚਾਰ ਕਰ ਰਹੀ ਹੈ, ਜਦੋਂ ਕਿ ਕਾਂਗਰਸ ਦੇ ਕਈ ਮੁਸਲਿਮ ਅਤੇ ਦਲਿਤ ਆਗੂ ਇਹ ਇੱਛਾ ਰੱਖ ਰਹੇ ਹਨ ਕਿ ਅਗਲਾ ਯੂ. ਪੀ. ਇਕਾਈ ਦਾ ਪ੍ਰਧਾਨ ਉਨ੍ਹਾਂ ਦੇ ਆਪਣੇ ਭਾਈਚਾਰੇ ’ਚੋਂ ਹੋਣਾ ਚਾਹੀਦਾ ਹੈ। ਅਜਿਹੀਆਂ ਅਟਕਲਾਂ ਵੀ ਹਨ ਕਿ ਸੂਬਾ ਏ. ਆਈ. ਸੀ. ਸੀ. ਇੰਚਾਰਜ ਅਵਿਨਾਸ਼ ਪਾਂਡੇ ਨੂੰ ਵੀ ਬਦਲਿਆ ਜਾ ਸਕਦਾ ਹੈ।

ਦੋਵਾਂ ਰਾਕਾਂਪਾ ’ਚ ਰਲੇਵੇਂ ਦੀ ਸੰਭਾਵਨਾ ਖਤਮ

ਦੋਵਾਂ ਰਾਕਾਂਪਾ ਦੇ ਰਲੇਵੇਂ ਦੀ ਚਰਚਾ ਦੇ ਵਿਚਾਲੇ, ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ-ਸ਼ਰਦਚੰਦਰ ਪਵਾਰ (ਰਾਕਾਂਪਾ-ਐੱਸ. ਪੀ.) ਨੇ ਮਹਾਰਾਸ਼ਟਰ ਦੀ ਉਪ ਮੁੱਖ ਮੰਤਰੀ ਸੁਨੇਤਰਾ ਪਵਾਰ ਦੀ ਅਗਵਾਈ ਵਾਲੀ ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ (ਰਾਕਾਂਪਾ) ਨਾਲ ਰਲੇਵੇਂ ਦੇ ਯਤਨਾਂ ਨੂੰ ਖ਼ਤਮ ਕਰ ਦਿੱਤਾ ਹੈ, ਇਹ ਕਹਿੰਦੇ ਹੋਏ ਕਿ ਉਹ ਇਕ ਵਧੇਰੇ ਪ੍ਰਮੁੱਖ ਵਿਰੋਧੀ ਪਾਰਟੀ ਵਜੋਂ ਆਪਣੀ ਭੂਮਿਕਾ ’ਤੇ ਜ਼ੋਰ ਦੇਵੇਗੀ, ਜਦੋਂ ਕਿ ਰਾਕਾਂਪਾ.-ਐੱਸ. ਪੀ. ਦੀ ਕਾਰਜਕਾਰੀ ਪ੍ਰਧਾਨ ਸੁਪ੍ਰਿਆ ਸੁਲੇ ਅਤੇ ਮਹਾਰਾਸ਼ਟਰ ਦੇ ਸਾਬਕਾ ਮੁਖੀ ਜਯੰਤ ਪਾਟਿਲ ਨੇ ਸਪੱਸ਼ਟ ਕੀਤਾ ਕਿ ਪਾਰਟੀ ਅੱਗੇ ਵਧ ਚੁੱਕੀ ਹੈ ਅਤੇ ਰਲੇਵੇਂ ਦੀ ਗੱਲਬਾਤ ਖ਼ਤਮ ਹੋ ਗਈ ਹੈ। ਸੁਨੇਤਰਾ ਪਵਾਰ ਵੱਲੋਂ ਮੁੰਬਈ ’ਚ ਚੋਣ ਰਣਨੀਤੀਕਾਰ ਪ੍ਰਸ਼ਾਂਤ ਕਿਸ਼ੋਰ ਨਾਲ ਬੰਦ ਕਮਰਾ ਮੀਟਿੰਗ ਕਰਨ ਤੋਂ ਬਾਅਦ ਸਿਆਸੀ ਅਸ਼ਾਂਤੀ ਦੀਆਂ ਅਟਕਲਾਂ ਹੋਰ ਵਧ ਗਈਆਂ। ਲਗਭਗ ਦੋ ਘੰਟੇ ਦੀ ਚਰਚਾ ਦੌਰਾਨ ਉਨ੍ਹਾਂ ਦੇ ਪੁੱਤਰ ਅਤੇ ਰਾਜ ਸਭਾ ਮੈਂਬਰ ਪਾਰਥ ਪਵਾਰ ਵੀ ਮੌਜੂਦ ਸਨ। ਸੂਤਰਾਂ ਅਨੁਸਾਰ, ਚਰਚਾਵਾਂ ’ਚ ਕਥਿਤ ਤੌਰ ’ਤੇ ਮਹਾਰਾਸ਼ਟਰ ’ਚ ਐੱਨ. ਸੀ. ਪੀ. ਸੰਗਠਨ ਨੂੰ ਮਜ਼ਬੂਤ ਕਰਨ ਦੀਆਂ ਰਣਨੀਤੀਆਂ ਸ਼ਾਮਲ ਸਨ।

ਰਾਜ ਸਭਾ ਚੋਣਾਂ ਦੀ ਤਿਆਰੀ

ਸਿਆਸੀ ਪਾਰਟੀਆਂ ਹੁਣ ਆਪਣਾ ਧਿਆਨ ਰਾਜ ਸਭਾ ਚੋਣਾਂ ਵੱਲ ਮੋੜ ਰਹੀਆਂ ਹਨ, ਜਿਸ ’ਚ 10 ਸੂਬਿਆਂ ਦੀਆਂ 24 ਰਾਜ ਸਭਾ ਸੀਟਾਂ ਲਈ ਚੋਣਾਂ, ਜਿਨ੍ਹਾਂ ’ਚ ਕਰਨਾਟਕ ਦੀਆਂ ਚਾਰ ਸੀਟਾਂ ਸ਼ਾਮਲ ਹਨ, 18 ਜੂਨ ਨੂੰ ਹੋਣਗੀਆਂ। ਇਸ ਨਾਲ ਸੱਤਾਧਾਰੀ ਐੱਨ. ਡੀ. ਏ. ਅਤੇ ਵਿਰੋਧੀ ਧਿਰ ਦੋਵਾਂ ਦੀ ਉਪਰਲੇ ਸਦਨ ’ਚ ਤਾਕਤ ਮਾਮੂਲੀ ਰੂਪ ’ਚ ਵਧਣ ਦੀ ਸੰਭਾਵਨਾ ਹੈ। ਇਸ ਦੇ ਨਾਲ ਹੀ, ਮਹਾਰਾਸ਼ਟਰ ਅਤੇ ਤਾਮਿਲਨਾਡੂ ’ਚ ਦੋ ਰਾਜ ਸਭਾ ਸੀਟਾਂ ਲਈ ਜ਼ਿਮਨੀ ਚੋਣਾਂ ਵੀ 18 ਜੂਨ ਨੂੰ ਹੋਣਗੀਆਂ, ਕਿਉਂਕਿ ਰਾਕਾਂਪਾ ਦੀ ਸੁਨੇਤਰਾ ਪਵਾਰ, ਜੋ ਮਹਾਰਾਸ਼ਟਰ ਦੀ ਉਪ ਮੁੱਖ ਮੰਤਰੀ ਬਣੀ ਅਤੇ ਅੰਨਾ. ਡੀ. ਐੱਮ. ਕੇ. ਦੇ ਸੀ. ਵੀ. ਸ਼ਨਮੁਗਮ, ਜੋ ਵਿਧਾਇਕ ਬਣੇ, ਨੇ ਅਸਤੀਫ਼ਾ ਦੇ ਦਿੱਤਾ ਹੈ। ਤਾਮਿਲਨਾਡੂ ਦੀ ਜ਼ਿਮਨੀ ਚੋਣ ’ਤੇ ਤਿੱਖੀ ਨਜ਼ਰ ਰਹੇਗੀ ਕਿਉਂਕਿ ਇਹ ਦੇਖਣਾ ਬਾਕੀ ਹੈ ਕਿ ਕੀ ਟੀ. ਵੀ. ਕੇ. ਉਪਰਲੇ ਸਦਨ ’ਚ ਪ੍ਰਵੇਸ਼ ਕਰਦੀ ਹੈ ਜਾਂ ਇਹ ਸੀਟ ਸਹਿਯੋਗੀ ਪਾਰਟੀ ਕਾਂਗਰਸ ਲਈ ਛੱਡਦੀ ਹੈ।

ਆਪਣਾ ਕਾਰਜਕਾਲ ਪੂਰਾ ਕਰਨ ਵਾਲਿਆਂ ’ਚ ਕਾਂਗਰਸ ਪ੍ਰਧਾਨ ਅਤੇ ਰਾਜ ਸਭਾ ’ਚ ਵਿਰੋਧੀ ਧਿਰ ਦੇ ਨੇਤਾ ਮੱਲਿਕਾਰਜੁਨ ਖੜਗੇ, ਸੀਨੀਅਰ ਕਾਂਗਰਸੀ ਆਗੂ ਦਿਗਵਿਜੇ ਸਿੰਘ, ਜਦ (ਐੱਸ) ਦੇ ਸਰਪ੍ਰਸਤ ਅਤੇ ਸਾਬਕਾ ਪ੍ਰਧਾਨ ਮੰਤਰੀ ਐੱਚ. ਡੀ. ਦੇਵੇਗੌੜਾ ਸ਼ਾਮਲ ਹਨ। ਕਰਨਾਟਕ ’ਚ ਖੜਗੇ, ਦੇਵੇਗੌੜਾ ਅਤੇ ਭਾਜਪਾ ਸੰਸਦ ਮੈਂਬਰ ਕੇ. ਨਾਰਾਇਣ ਅਤੇ ਐਰਾਨਾ ਕਡਾਦੀ ਕੋਲ ਮੌਜੂਦ ਸੀਟਾਂ ਸਮੇਤ ਚਾਰ ਸੀਟਾਂ ਖਾਲੀ ਹੋ ਰਹੀਆਂ ਹਨ।

ਕਾਂਗਰਸ 4 ’ਚੋਂ 3 ਸੀਟਾਂ ਹਾਸਲ ਕਰਨਾ ਚਾਹੁੰਦੀ ਹੈ, ਜੋ ਕਿ ਇਸ ਵੇਲੇ ਉਸ ਕੋਲ ਮੌਜੂਦ ਇਕਲੌਤੀ ਸੀਟ ਤੋਂ ਵੱਧ ਹੈ। ਖੜਗੇ ਨੂੰ ਦੁਬਾਰਾ ਨਾਮਜ਼ਦ ਕੀਤਾ ਜਾਣਾ ਤੈਅ ਹੈ। ਕਾਂਗਰਸ ਤੋਂ ਮੱਧ ਪ੍ਰਦੇਸ਼ ਅਤੇ ਰਾਜਸਥਾਨ ’ਚ ਵੀ ਇਕ-ਇਕ ਸੀਟ ਬਰਕਰਾਰ ਰੱਖਣ ਦੀ ਉਮੀਦ ਹੈ। ਰਾਜਸਥਾਨ ’ਚ ਜਿਨ੍ਹਾਂ ਆਗੂਆਂ ਦੇ ਨਾਵਾਂ ’ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ, ਉਨ੍ਹਾਂ ’ਚ ਸਾਬਕਾ ਮੁੱਖ ਮੰਤਰੀ ਅਸ਼ੋਕ ਗਹਿਲੋਤ ਅਤੇ ਕਾਂਗਰਸ ਬੁਲਾਰੇ ਪਵਨ ਖੇੜਾ ਸ਼ਾਮਲ ਹਨ। ਮੱਧ ਪ੍ਰਦੇਸ਼ ’ਚ ਸਾਬਕਾ ਮੁੱਖ ਮੰਤਰੀ ਕਮਲਨਾਥ ਅਤੇ ਮੀਨਾਕਸ਼ੀ ਨਟਰਾਜਨ ਦੇ ਨਾਵਾਂ ’ਤੇ ਚਰਚਾ ਕੀਤੀ ਜਾ ਰਹੀ ਹੈ।

ਵਾਈਕੋ ਦਾ ਤਿੰਨ-ਭਾਸ਼ਾ ਵਿਰੋਧ

ਮਰੂਮਲਾਰਚੀ ਦ੍ਰਵਿੜ ਮੁਨੇਤਰ ਕੜਗਮ (ਐੱਮ. ਐੱਮ. ਕੇ.) ਦੇ ਜਨਰਲ ਸਕੱਤਰ ਵਾਈਕੋ ਨੇ ‘ਪੀ. ਐੱਮ. ਸ਼੍ਰੀ’ ਤਿੰਨ-ਭਾਸ਼ਾ ਯੋਜਨਾ ’ਤੇ ਤਿੱਖਾ ਹਮਲਾ ਕੀਤਾ ਅਤੇ ਤਾਮਿਲਨਾਡੂ ਸਰਕਾਰ ਦੇ ਪ੍ਰੋਗਰਾਮਾਂ ’ਚ ‘ਵੰਦੇ ਮਾਤਰਮ’ ਨੂੰ ਸ਼ਾਮਲ ਕਰਨ ਦਾ ਜ਼ੋਰਦਾਰ ਵਿਰੋਧ ਕੀਤਾ। ਵਾਈਕੋ ਨੇ ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਵਿਜੇ ਨੂੰ ਸਿੱਧੀ ਅਪੀਲ ਕੀਤੀ ਕਿ ਉਹ ਸੂਬੇ ’ਚ ਇਸ ਨੂੰ ਲਾਗੂ ਕਰਨ ਦੀ ਇਜਾਜ਼ਤ ਨਾ ਦੇਣ। ਐੱਮ. ਡੀ. ਐੱਮ. ਕੇ. ਆਗੂ ਨੇ ਇਸ ਕਦਮ ਨੂੰ ਕੇਂਦਰ ਸਰਕਾਰ ਵੱਲੋਂ ਤਾਮਿਲਨਾਡੂ ’ਤੇ ਹਿੰਦੀ ਥੋਪਣ ਦੀ ਇਕ ਨਵੀਂ ਕੋਸ਼ਿਸ਼ ਕਰਾਰ ਦਿੱਤਾ।

—ਰਾਹਿਲ ਨੋਰਾ ਚੋਪੜਾ