ਦੁਨੀਆ ਦੀ ਸਭ ਤੋਂ ਉੱਚੀ ''ਲੱਦਾਖ ਮੈਰਾਥਨ'' ਸਤੰਬਰ ''ਚ; ਰਜਿਸਟ੍ਰੇਸ਼ਨ ਹੋਈ ਸ਼ੁਰੂ

ਨਵੀਂ ਦਿੱਲੀ : ਵਿਸ਼ਵ ਦੇ ਸਭ ਤੋਂ ਉੱਚਾਈ ਵਾਲੇ ਸਥਾਨ 'ਤੇ ਹੋਣ ਵਾਲੀ ਵੱਕਾਰੀ 'ਲੱਦਾਖ ਮੈਰਾਥਨ' ਇਸ ਸਾਲ 10 ਤੋਂ 13 ਸਤੰਬਰ ਤੱਕ ਆਯੋਜਿਤ ਕੀਤੀ ਜਾਵੇਗੀ। ਆਯੋਜਕਾਂ ਨੇ ਵੀਰਵਾਰ ਨੂੰ ਇਸ ਦੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਏ.ਆਈ.ਐੱਮ.ਐੱਸ. (AIMS) ਤੋਂ ਪ੍ਰਮਾਣਿਤ ਇਸ ਮੈਰਾਥਨ ਨੂੰ ਦੁਨੀਆ ਦੀ ਸਭ ਤੋਂ ਚੁਣੌਤੀਪੂਰਨ ਦੌੜ ਮੰਨਿਆ ਜਾਂਦਾ ਹੈ।

ਸਿਲਕ ਰੂਟ ਅਲਟਰਾ ਹੋਵੇਗੀ ਖਿੱਚ ਦਾ ਕੇਂਦਰ
ਇਸ ਸਾਲ ਦੀ ਮੈਰਾਥਨ ਵਿੱਚ ਸਿਲਕ ਰੂਟ ਅਲਟਰਾ (122 ਕਿਲੋਮੀਟਰ) ਅਤੇ ਖਾਰਦੁੰਗ ਲਾ ਚੈਲੇਂਜਰ ਅਲਟਰਾ ਰੇਸ (72 ਕਿਲੋਮੀਟਰ) ਮੁੱਖ ਖਿੱਚ ਦਾ ਕੇਂਦਰ ਹੋਣਗੇ। ਖਾਰਦੁੰਗ ਲਾ ਵਿੱਚ 17,618 ਫੁੱਟ ਦੀ ਭਾਰੀ ਉਚਾਈ 'ਤੇ ਹੋਣ ਵਾਲੀ ਇਸ ਦੌੜ ਵਿੱਚ ਸਿਰਫ਼ ਉਹੀ ਧਾਵਕ ਹਿੱਸਾ ਲੈ ਸਕਦੇ ਹਨ ਜਿਨ੍ਹਾਂ ਕੋਲ ਪਹਿਲਾਂ ਮੈਰਾਥਨ ਜਾਂ ਅਲਟਰਾ ਮੈਰਾਥਨ ਦਾ ਚੰਗਾ ਤਜਰਬਾ ਹੈ।

ਰਜਿਸਟ੍ਰੇਸ਼ਨ ਪ੍ਰਕਿਰਿਆ ਸ਼ੁਰੂ
ਆਯੋਜਕਾਂ ਅਨੁਸਾਰ, ਇਸ ਮੈਰਾਥਨ ਲਈ ਰਜਿਸਟ੍ਰੇਸ਼ਨ ਵੀਰਵਾਰ ਤੋਂ ਸ਼ੁਰੂ ਹੋ ਗਈ ਹੈ। ਇੱਛੁਕ ਉਮੀਦਵਾਰ ਅਧਿਕਾਰਤ ਵੈੱਬਸਾਈਟ ਰਾਹੀਂ ਅਪਲਾਈ ਕਰ ਸਕਦੇ ਹਨ। ਇਨ੍ਹਾਂ ਦੋ ਅਲਟਰਾ ਮੈਰਾਥਨਾਂ ਤੋਂ ਇਲਾਵਾ, ਪ੍ਰੋਗਰਾਮ ਵਿੱਚ ਹੋਰ ਦੌੜਾਂ ਵੀ ਸ਼ਾਮਲ ਹਨ:
ਮੈਰਾਥਨ : 42 ਕਿਲੋਮੀਟਰ
ਹਾਫ ਮੈਰਾਥਨ : 21 ਕਿਲੋਮੀਟਰ
ਹੋਰ ਦੌੜਾਂ : 11.2 ਕਿਲੋਮੀਟਰ ਅਤੇ 5 ਕਿਲੋਮੀਟਰ

10 ਦਿਨ ਪਹਿਲਾਂ ਪਹੁੰਚਣਾ ਹੋਵੇਗਾ ਲਾਜ਼ਮੀ 
ਮੈਰਾਥਨ ਦੇ ਸਖ਼ਤ ਨਿਯਮਾਂ ਅਨੁਸਾਰ, ਸਾਰੇ ਧਾਵਕਾਂ ਲਈ ਉੱਥੋਂ ਦੇ ਵਾਤਾਵਰਣ ਦੇ ਅਨੁਕੂਲ ਹੋਣਾ ਬੇਹੱਦ ਜ਼ਰੂਰੀ ਹੈ। ਅਲਟਰਾ ਮੈਰਾਥਨ ਵਿੱਚ ਭਾਗ ਲੈਣ ਵਾਲੇ ਖਿਡਾਰੀਆਂ ਨੂੰ ਦੌੜ ਵਾਲੇ ਦਿਨ ਤੋਂ ਘੱਟੋ-ਘੱਟ 10 ਦਿਨ ਪਹਿਲਾਂ ਲੇਹ ਪਹੁੰਚਣਾ ਹੋਵੇਗਾ ਤਾਂ ਜੋ ਉਨ੍ਹਾਂ ਦਾ ਸਰੀਰ ਉੱਚਾਈ ਵਾਲੇ ਮੌਸਮ ਅਤੇ ਘੱਟ ਆਕਸੀਜਨ ਦੇ ਅਨੁਕੂਲ ਹੋ ਸਕੇ।