ਖੁਲਾਸਾ : ਭਾਰਤੀ ਟੀਮ ਦੇ ਕੋਚ ਲਈ ਉਮੀਦਵਾਰਾਂ ਤੋਂ ਪੁੱਛੇ ਗਏ ਇਹ ਦੋ ਸਵਾਲ!

ਮੁੰਬਈ— ਸੋਮਵਾਰ ਸ਼ਾਮ ਨੂੰ ਕ੍ਰਿਕਟ ਐਡਵਾਇਜ਼ਰੀ ਕਾਉਂਸਿਲ (ਸੀ.ਏ.ਸੀ.) ਨੇ ਮੁੰਬਈ ਸਥਿਤ ਬੀ.ਸੀ.ਸੀ.ਆਈ. ਹੈੱਡਕੁਆਟਰ ਵਿੱਚ ਭਾਰਤੀ ਟੀਮ ਦੇ ਕੋਚ ਅਹੁਦੇ ਲਈ 5 ਲੋਕਾਂ ਦੇ ਇੰਟਰਵਿਊ ਲਏ ਸਨ, ਜਿਸ ਵਿੱਚ ਰਵੀ ਸ਼ਾਸਤਰੀ, ਟਾਮ ਮੂਡੀ, ਵਰਿੰਦਰ ਸਹਿਵਾਗ, ਰਿਚਰਡ ਪਾਇਬਸ ਅਤੇ ਲਾਲਚੰਦ ਰਾਜਪੂਤ ਦੇ ਨਾਂ ਸ਼ਾਮਲ ਹਨ। ਭਾਰਤੀ ਟੀਮ ਦੇ ਕੋਚ ਅਹੁਦੇ ਦੀ ਇੰਟਰਵਿਊ ਦੌਰਾਨ ਆਪਣੀ ਪ੍ਰੈਜੇਂਟੇਸ਼ਨ ਦੇਣ ਵਾਲੇ ਸਾਰੇ ਪੰਜ ਉਮੀਦਵਾਰਾਂ ਤੋਂ ਦੋ ਬੇਸਿਕ ਸਵਾਲ ਪੁੱਛੇ ਗਏ।
ਉਮੀਦਵਾਰਾਂ ਨੂੰ ਕੀਤੇ ਗਏ ਇਹ ਦੋ ਸਵਾਲ
ਇਨ੍ਹਾਂ ਉਮੀਦਵਾਰਾਂ ਲਈ ਸਭ ਤੋਂ ਅਹਿਮ ਦੋ ਸਵਾਲਾਂ ਵਿੱਚ ਪਹਿਲਾ ਸਵਾਲ ਇਹ ਸੀ ਕਿ ਇੰਗਲੈਂਡ ਵਿੱਚ ਹੋਣ ਵਾਲੇ 2019 ਵਰਲਡ ਕੱਪ ਲਈ ਉਨ੍ਹਾਂ ਦੀ ਸੋਚ ਕੀ ਹੈ ਅਤੇ ਦੂਜਾ ਸਵਾਲ ਸੀ ਕਿ ਕਪਤਾਨ ਦੀ ਤੁਲਨਾ ਵਿੱਚ ਕੋਚ ਦੀ ਭੂਮਿਕਾ ਕੀ ਹੁੰਦੀ ਹੈ। ਇਸਦੇ ਨਾਲ ਹੀ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਕਿਸੇ ਨਾਜ਼ੁਕ ਹਾਲਤ ਯਾਨੀ ਕੋਚ ਬਨਾਮ ਕਪਤਾਨ ਵਰਗੀ ਹਾਲਤ ਦੇ ਸਾਹਮਣੇ ਆਉਣ ਉੱਤੇ ਉਹ ਇਸ ਨੂੰ ਕਿਵੇਂ ਸੁਲਝਾਉਣਗੇ। ਬੀ.ਸੀ.ਸੀ.ਆਈ. ਦੀ ਕ੍ਰਿਕਟ ਸਲਾਹਕਾਰ ਕਮੇਟੀ (ਸੀ.ਏ.ਸੀ.) ਨੇ ਇੰਟਰਵਿਊ ਦੇ ਬਾਅਦ ਕਿਹਾ ਕਿ ਨਵੇਂ ਕੋਚ ਦੇ ਨਾਂ ਦੀ ਘੋਸ਼ਣਾ ਕਰਨ ਤੋਂ ਪਹਿਲਾਂ ਉਹ ਵਿਰਾਟ ਕੋਹਲੀ ਨਾਲ ਗੱਲ ਕਰਨਗੇ। ਹਾਲਾਂਕਿ, ਕਪਤਾਨ ਨੂੰ ਸਿਰਫ ਕਮੇਟੀ ਦੇ ਫੈਸਲੇ ਦੇ ਪਿੱਛੇ ਦਾ ਕਾਰਨ ਦੱਸਿਆ ਜਾਵੇਗਾ। ਇਸ ਮਾਮਲੇ ਉੱਤੇ ਉਨ੍ਹਾਂ ਦਾ ਨਜ਼ਰੀਆ ਨਹੀਂ ਲਿਆ ਜਾਵੇਗਾ।
ਅੰਤਮ ਫੈਸਲਾ ਸੀ.ਏ.ਸੀ. ਦਾ ਹੋਵੇਗਾ ਵਿਰਾਟ ਦਾ ਨਹੀਂ
ਨਵੇਂ ਕੋਚ ਦੇ ਉਮੀਦਵਾਰਾਂ ਨੂੰ ਇਹ ਦੋ ਸਵਾਲ ਪੁੱਛਣ ਦੀ ਮੁੱਖ ਵਜ੍ਹਾ ਇਹ ਰਹੀ ਕਿ ਅਨਿਲ ਕੁੰਬਲੇ ਨੂੰ ਵਿਵਾਦਾਂ ਦੇ ਚਲਦੇ ਹਾਲਾਤਾਂ ਵਿੱਚ ਆਪਣਾ ਅਸਤੀਫਾ ਦੇਣਾ ਪਿਆ ਸੀ। ਉਨ੍ਹਾਂ ਦਾ ਕਪਤਾਨ ਵਿਰਾਟ ਨਾਲ ਵਿਵਾਦ ਸਾਹਮਣੇ ਆ ਗਿਆ ਸੀ। ਇਸ ਸੰਬੰਧ ਵਿੱਚ ਜਾਣਕਾਰੀ ਰੱਖਣ ਵਾਲੇ ਬੀ.ਸੀ.ਸੀ.ਆਈ. ਦੇ ਇੱਕ ਮੁੱਖ ਅਧਿਕਾਰੀ ਨੇ ਪੀ.ਟੀ.ਆਈ. ਨੂੰ ਕਿਹਾ, ''ਇੱਕ ਚੀਜ ਸਾਫ਼ ਕਰ ਦੇਵੋ। ਅੰਤਮ ਫੈਸਲਾ ਸੀ.ਏ.ਸੀ. ਦਾ ਹੋਵੇਗਾ, ਵਿਰਾਟ ਕੋਹਲੀ ਦਾ ਨਹੀਂ।'' ਜਦੋਂ ਸੌਰਵ ਨੇ ਕਿਹਾ ਕਿ ਉਹ ਵਿਰਾਟ ਨਾਲ ਗੱਲ ਕਰਨਗੇ ਤਾਂ ਉਨ੍ਹਾਂ ਦਾ ਮਤਲਬ ਸੀ ਕਿ ਉਸਦੇ ਬ੍ਰੇਕ ਤੋਂ ਪਰਤਣ ਦੇ ਬਾਅਦ ਉਸਨੂੰ ਦੱਸਿਆ ਜਾਵੇਗਾ ਕਿ ਸੀ.ਏ.ਸੀ. ਨੂੰ ਹਰ ਇੱਕ ਉਮੀਦਵਾਰ ਦੇ ਬਾਰੇ ਵਿੱਚ ਕੀ ਲੱਗਦਾ ਹੈ ਜਿਨ੍ਹਾਂ ਦਾ ਉਨ੍ਹਾਂ ਨੇ ਇੰਟਰਵਿਊ ਲਿਆ ਅਤੇ ਆਖਰ ਕਿਉਂ ਉਹ ਕਿਸੇ ਉਮੀਦਵਾਰ ਨੂੰ ਚੁਣ ਰਹੇ ਹਨ।