ਪੇਗੁਲਾ ਨੇ ਮੌਜੂਦਾ ਚੈਂਪੀਅਨ ਮੈਡੀਸਨ ਕੀਜ਼ ਨੂੰ ਆਸਟ੍ਰੇਲੀਅਨ ਓਪਨ ਤੋਂ ਕੀਤਾ ਬਾਹਰ

ਸਪੋਰਟਸ ਡੈਸਕ : ਆਸਟ੍ਰੇਲੀਅਨ ਓਪਨ ਟੈਨਿਸ ਟੂਰਨਾਮੈਂਟ ਵਿੱਚ ਅਮਰੀਕੀ ਮਹਿਲਾ ਖਿਡਾਰਨਾਂ ਦਾ ਜ਼ਬਰਦਸਤ ਦਬਦਬਾ ਦੇਖਣ ਨੂੰ ਮਿਲ ਰਿਹਾ ਹੈ। ਸੋਮਵਾਰ ਨੂੰ ਖੇਡੇ ਗਏ ਮੁਕਾਬਲਿਆਂ ਵਿੱਚ ਜੈਸਿਕਾ ਪੇਗੁਲਾ ਅਤੇ ਅਮਾਂਡਾ ਅਨੀਸੀਮੋਵਾ ਨੇ ਆਪਣੇ-ਆਪਣੇ ਮੈਚ ਜਿੱਤ ਕੇ ਕੁਆਰਟਰ ਫਾਈਨਲ ਵਿੱਚ ਜਗ੍ਹਾ ਪੱਕੀ ਕਰ ਲਈ ਹੈ।

ਅਮਰੀਕੀ ਖਿਡਾਰਨਾਂ ਦਾ ਇਤਿਹਾਸਕ ਪ੍ਰਦਰਸ਼ਨ 
ਇਹ 2001 ਤੋਂ ਬਾਅਦ ਪਹਿਲੀ ਵਾਰ ਹੈ ਜਦੋਂ ਅਮਰੀਕਾ ਦੀਆਂ ਘੱਟੋ-ਘੱਟ ਚਾਰ ਮਹਿਲਾ ਖਿਡਾਰਨਾਂ ਆਸਟ੍ਰੇਲੀਅਨ ਓਪਨ ਦੇ ਕੁਆਰਟਰ ਫਾਈਨਲ ਵਿੱਚ ਪਹੁੰਚੀਆਂ ਹਨ। ਪੇਗੁਲਾ ਅਤੇ ਅਨੀਸੀਮੋਵਾ ਤੋਂ ਇਲਾਵਾ ਕੋਕੋ ਗੌਫ ਅਤੇ 18 ਸਾਲਾ ਇਵਾ ਜੋਵਿਚ ਪਹਿਲਾਂ ਹੀ ਅੰਤਿਮ ਅੱਠ ਵਿੱਚ ਪ੍ਰਵੇਸ਼ ਕਰ ਚੁੱਕੀਆਂ ਹਨ। ਸਾਲ 2001 ਵਿੱਚ ਵੀਨਸ ਅਤੇ ਸੇਰੇਨਾ ਵਿਲੀਅਮਜ਼ ਵਰਗੀਆਂ ਦਿੱਗਜ ਖਿਡਾਰਨਾਂ ਨੇ ਇਹ ਉਪਲਬਧੀ ਹਾਸਲ ਕੀਤੀ ਸੀ।

ਪੇਗੁਲਾ ਅਤੇ ਅਨੀਸੀਮੋਵਾ ਵਿਚਾਲੇ ਹੋਵੇਗੀ ਟੱਕਰ 
ਛੇਵੀਂ ਸੀਡ ਜੈਸਿਕਾ ਪੇਗੁਲਾ ਨੇ ਸ਼ਾਨਦਾਰ ਖੇਡ ਦਾ ਪ੍ਰਦਰਸ਼ਨ ਕਰਦਿਆਂ ਮੌਜੂਦਾ ਚੈਂਪੀਅਨ ਅਤੇ ਆਪਣੀ ਹੀ ਪੌਡਕਾਸਟ ਸਹਿਯੋਗੀ ਮੈਡਿਸਨ ਕੀਜ਼ ਨੂੰ ਸਿੱਧੇ ਸੈੱਟਾਂ ਵਿੱਚ 6-3, 6-4 ਨਾਲ ਮਾਤ ਦਿੱਤੀ। ਪੇਗੁਲਾ ਨੇ ਪਹਿਲਾ ਸੈੱਟ ਸਿਰਫ਼ 32 ਮਿੰਟਾਂ ਵਿੱਚ ਜਿੱਤ ਲਿਆ ਸੀ। ਹੁਣ ਕੁਆਰਟਰ ਫਾਈਨਲ ਵਿੱਚ ਉਨ੍ਹਾਂ ਦਾ ਮੁਕਾਬਲਾ ਹਮਵਤਨ ਅਮਾਂਡਾ ਅਨੀਸੀਮੋਵਾ ਨਾਲ ਹੋਵੇਗਾ, ਜਿਸ ਨੇ ਚੌਥੇ ਦੌਰ ਵਿੱਚ ਵਾਂਗ ਸ਼ਿਨਯੂ ਨੂੰ 7-6 (4), 6-4 ਨਾਲ ਹਰਾ ਕੇ ਬਾਹਰ ਦਾ ਰਸਤਾ ਦਿਖਾਇਆ।