ਥੌਮਸ ਕੱਪ: ਭਾਰਤ ਦਾ ਸ਼ਾਨਦਾਰ ਆਗਾਜ਼, ਕੈਨੇਡਾ ਨੂੰ 4-1 ਨਾਲ ਚਟਾਈ ਧੂੜ; ਸਾਤਵਿਕ-ਚਿਰਾਗ ਤੇ ਸ੍ਰੀਕਾਂਤ ਚਮਕੇ

ਸਪੋਰਟਸ ਡੈਸਕ : ਸਾਲ 2022 ਦੇ ਚੈਂਪੀਅਨ ਭਾਰਤ ਨੇ ਥੌਮਸ ਕੱਪ ਫਾਈਨਲ ਦੇ ਆਪਣੇ ਪਹਿਲੇ ਗਰੁੱਪ-ਏ ਮੁਕਾਬਲੇ ਵਿੱਚ ਕੈਨੇਡਾ ਵਿਰੁੱਧ ਧਮਾਕੇਦਾਰ ਪ੍ਰਦਰਸ਼ਨ ਕਰਦਿਆਂ 4-1 ਨਾਲ ਸ਼ਾਨਦਾਰ ਜਿੱਤ ਦਰਜ ਕੀਤੀ ਹੈ। ਹਾਲਾਂਕਿ ਸਟਾਰ ਖਿਡਾਰੀ ਲਕਸ਼ੈ ਸੈਨ ਨੂੰ ਆਪਣੇ ਸਿੰਗਲਜ਼ ਮੈਚ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਪਰ ਬਾਕੀ ਖਿਡਾਰੀਆਂ ਨੇ ਜ਼ਬਰਦਸਤ ਵਾਪਸੀ ਕਰਦਿਆਂ ਭਾਰਤ ਦੀ ਝੋਲੀ ਵਿੱਚ ਜਿੱਤ ਪਾਈ।

ਲਕਸ਼ੈ ਸੈਨ ਦੀ ਸਖ਼ਤ ਟੱਕਰ ਤੋਂ ਬਾਅਦ ਹਾਰ 
ਮੈਚ ਦੀ ਸ਼ੁਰੂਆਤ ਭਾਰਤ ਲਈ ਕੁਝ ਨਿਰਾਸ਼ਾਜਨਕ ਰਹੀ। ਦੁਨੀਆ ਦੇ 13ਵੇਂ ਨੰਬਰ ਦੇ ਖਿਡਾਰੀ ਵਿਕਟਰ ਲਾਈ ਨੇ ਲਕਸ਼ੈ ਸੈਨ ਨੂੰ ਇੱਕ ਬੇਹੱਦ ਰੋਮਾਂਚਕ ਅਤੇ ਥਕਾ ਦੇਣ ਵਾਲੇ ਮੁਕਾਬਲੇ ਵਿੱਚ 18-21, 21-19, 21-10 ਨਾਲ ਹਰਾ ਦਿੱਤਾ,। ਲਕਸ਼ੈ ਨੇ ਪਹਿਲਾ ਗੇਮ ਜਿੱਤ ਕੇ ਚੰਗੀ ਸ਼ੁਰੂਆਤ ਕੀਤੀ ਸੀ, ਪਰ ਲਾਈ ਨੇ ਅਗਲੇ ਦੋਵਾਂ ਗੇਮਾਂ ਵਿੱਚ ਆਪਣਾ ਦਬਦਬਾ ਬਣਾਉਂਦਿਆਂ ਜਿੱਤ ਹਾਸਲ ਕੀਤੀ।

ਸਾਤਵਿਕ-ਚਿਰਾਗ ਦੀ ਜੋੜੀ ਨੇ ਕੀਤੀ ਬਰਾਬਰੀ
 ਲਕਸ਼ੈ ਦੀ ਹਾਰ ਤੋਂ ਬਾਅਦ ਵਿਸ਼ਵ ਰੈਂਕਿੰਗ ਵਿੱਚ ਚੌਥੇ ਸਥਾਨ 'ਤੇ ਕਾਬਜ਼ ਸਾਤਵਿਕਸਾਈਰਾਜ ਰੰਕੀਰੇਡੀ ਅਤੇ ਚਿਰਾਗ ਸ਼ੈੱਟੀ ਦੀ ਜੋੜੀ ਨੇ ਮੋਰਚਾ ਸੰਭਾਲਿਆ। ਉਨ੍ਹਾਂ ਨੇ ਕੈਨੇਡਾ ਦੇ ਜੋਨਾਥਨ ਬਿੰਗ ਤਸਾਨ ਲਾਈ ਅਤੇ ਕੇਵਿਨ ਲੀ ਨੂੰ ਮਹਿਜ਼ 21-10, 21-11 ਨਾਲ ਮਾਤ ਦੇ ਕੇ ਮੁਕਾਬਲੇ ਨੂੰ 1-1 ਦੀ ਬਰਾਬਰੀ 'ਤੇ ਲਿਆਂਦਾ।

ਆਯੁਸ਼ ਸ਼ੈੱਟੀ ਅਤੇ ਦੂਜੀ ਜੋੜੀ ਨੇ ਦਿਵਾਈ ਬੜ੍ਹਤ 
ਏਸ਼ੀਆ ਚੈਂਪੀਅਨਸ਼ਿਪ ਦੇ ਉਪ-ਵਿਜੇਤਾ 20 ਸਾਲਾ ਆਯੁਸ਼ ਸ਼ੈੱਟੀ ਨੇ ਦੁਨੀਆ ਦੇ 33ਵੇਂ ਨੰਬਰ ਦੇ ਖਿਡਾਰੀ ਬ੍ਰਾਇਨ ਯਾਂਗ ਨੂੰ 39 ਮਿੰਟਾਂ ਵਿੱਚ 21-13, 21-17 ਨਾਲ ਹਰਾ ਕੇ ਭਾਰਤ ਨੂੰ 2-1 ਦੀ ਬੜ੍ਹਤ ਦਿਵਾਈ। ਇਸ ਤੋਂ ਬਾਅਦ ਦੂਜੀ ਜੋੜੀ ਹਰੀਹਰਨ ਅਮਸਕਰੁਣਨ ਅਤੇ ਐਮ.ਆਰ. ਅਰਜੁਨ ਨੇ ਟਾਈ ਅਲੈਗਜ਼ੈਂਡਰ ਲਿੰਡੇਮੈਨ ਅਤੇ ਨਾਈਲ ਯਾਕੁਰਾ ਨੂੰ 21-7, 21-15 ਨਾਲ ਹਰਾ ਕੇ ਭਾਰਤ ਦੀ ਜਿੱਤ ਯਕੀਨੀ ਕਰ ਦਿੱਤੀ।

ਕਿਦਾਂਬੀ ਸ੍ਰੀਕਾਂਤ ਨੇ ਲਗਾਇਆ ਜਿੱਤ ਦਾ ਚੌਕਾ
 ਪੰਜਵੇਂ ਅਤੇ ਆਖਰੀ ਮੈਚ ਵਿੱਚ ਕਿਦਾਂਬੀ ਸ੍ਰੀਕਾਂਤ ਨੇ ਦੁਨੀਆ ਦੇ 77ਵੇਂ ਨੰਬਰ ਦੇ ਖਿਡਾਰੀ ਜੋਸ਼ੂਆ ਗੁਯੇਨ ਨੂੰ 21-17, 21-12 ਨਾਲ ਮਾਤ ਦੇ ਕੇ ਭਾਰਤ ਨੂੰ 4-1 ਨਾਲ ਜਿੱਤ ਦਿਵਾਈ। ਇਸ ਜਿੱਤ ਦੇ ਨਾਲ ਹੀ ਭਾਰਤ ਗਰੁੱਪ ਵਿੱਚ ਚੀਨ ਤੋਂ ਬਾਅਦ ਦੂਜੇ ਸਥਾਨ 'ਤੇ ਪਹੁੰਚ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਚੀਨ ਨੇ ਆਸਟ੍ਰੇਲੀਆ ਨੂੰ 5-0 ਨਾਲ ਹਰਾਇਆ ਸੀ। ਹੁਣ ਭਾਰਤੀ ਮਹਿਲਾ ਟੀਮ ਦਾ ਸਾਹਮਣਾ ਡੈਨਮਾਰਕ ਨਾਲ ਹੋਵੇਗਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e