ਨਿਸ਼ਾਂਤ ਨੇ ਓਟਗੋਂਬਾਟਾਰ ਨੂੰ ਦੋ ਮਿੰਟਾਂ ਵਿੱਚ ਹਰਾਇਆ, ਜਾਮਵਾਲ ਹਾਰਿਆ

ਬੈਂਕਾਕ, (ਭਾਸ਼ਾ) ਭਾਰਤ ਦੇ ਨਿਸ਼ਾਂਤ ਦੇਵ ਨੇ ਮੰਗੋਲੀਆ ਦੇ ਓਟਗੋਂਬਾਟਾਰ ਬਿਆਮਬਾ ਅਰਡੇਨਾਟੋ ਨੂੰ ਸਿਰਫ਼ ਦੋ ਮਿੰਟਾਂ ਵਿੱਚ ਹਰਾ ਕੇ ਦੂਜੇ ਮੁੱਕੇਬਾਜ਼ੀ ਵਿਸ਼ਵ ਕੁਆਲੀਫਾਇਰ 71 ਕਿਲੋ ਦੇ ਪ੍ਰੀ ਕੁਆਰਟਰ ਫਾਈਨਲ 'ਚ ਪ੍ਰਵੇਸ਼ ਕਰ ਲਿਆ ਲਿਆ ਜਦਕਿ ਅਬਿਨਾਸ਼ ਜਾਮਵਾਲ ਹਾਰ ਕੇ ਬਾਹਰ ਹੋ ਗਏ। ਪਿਛਲੇ ਕੁਆਲੀਫਾਇਰ 'ਚ ਓਲੰਪਿਕ ਕੋਟਾ ਤੋਂ ਖੁੰਝਣ ਵਾਲੇ ਦੇਵ ਨੇ ਪਹਿਲੇ ਹੀ ਮਿੰਟ 'ਚ ਆਪਣੇ ਵਿਰੋਧੀ 'ਤੇ ਘਸੁੰਨਾਂ ਦਾ ਮੀਂਹ ਵਰ੍ਹਾ ਦਿੱਤਾ। 

ਰੈਫਰੀ ਨੇ ਪਹਿਲੇ ਦੌਰ 'ਚ 58 ਸਕਿੰਟ ਬਾਕੀ ਰਹਿੰਦੇ ਕੇ ਮੈਚ ਰੋਕ ਦਿੱਤਾ। ਇਸ ਤੋਂ ਪਹਿਲਾਂ ਜਾਮਵਾਲ ਨੂੰ 63.5 ਕਿਲੋਗ੍ਰਾਮ ਦੇ ਮੁਕਾਬਲੇ 'ਚ ਉਸ ਨੂੰ ਕੋਲੰਬੀਆ ਦੇ ਜੋਸ ਮੈਨੁਅਲ ਵੀਆਫਾਰਾ ਫੋਰੀ ਨੇ ਹਰਾਇਆ। ਜਮਵਾਲ ਨੇ ਤੀਜੇ ਅਤੇ ਆਖਰੀ ਦੌਰ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਅੰਕਾਂ ਦੇ ਆਧਾਰ ’ਤੇ ਬਰਾਬਰੀ ਕਰ ਲਈ। ਨਿਯਮਾਂ ਦੇ ਤਹਿਤ, ਜੱਜਾਂ ਨੂੰ ਫਿਰ ਪ੍ਰਦਰਸ਼ਨ ਦਾ ਮੁੜ ਮੁਲਾਂਕਣ ਕਰਨ ਲਈ ਕਿਹਾ ਗਿਆ ਸੀ। ਸਾਰਿਆਂ ਨੇ ਫੋਰੀ ਦੇ ਹੱਕ ਵਿੱਚ ਵੋਟ ਦਿੱਤੀ ਜੋ 5-0 ਨਾਲ ਜਿੱਤਿਆ।