ਲਕਸ਼, ਸਿੰਧੂ ਸਿੰਗਾਪੁਰ ਓਪਨ ’ਚ ਭਾਰਤੀ ਚੁਣੌਤੀ ਪੇਸ਼ ਕਰਨਗੇ

ਸਿੰਗਾਪੁਰ- ਭਾਰਤ ਦੇ ਚੋਟੀ ਦਾ ਬੈਡਮਿੰਟਨ ਖਿਡਾਰੀ ਲਕਸ਼ ਸੇਨ ਅਤੇ ਪੀ. ਵੀ. ਸਿੰਧੂ ਮੰਗਲਵਾਰ ਤੋਂ ਇਥੇ ਸ਼ੁਰੂ ਹੋ ਰਹੇ 10 ਲੱਖ ਡਾਲਰ ਇਨਾਮੀ ਰਾਸ਼ੀ ਦੇ ਸਿੰਗਾਪੁਰ ਓਪਨ ਸੁਪਰ 750 ਟੂਰਨਾਮੈਂਟ ’ਚ ਲੈਅ ਹਾਸਲ ਕਰ ਕੇ ਖਿਤਾਬ ਦਾ ਸੋਕਾ ਖਤਮ ਕਰਨ ਦੀ ਕੋਸ਼ਿਸ਼ ਕਰੇਗਾ। ਰਾਸ਼ਟਰ ਮੰਡਲ ਖੇਡ ਚੈਂਪੀਅਨ ਲਕਸ਼ ਪਿਛਲੇ ਹਫ਼ਤੇ ਪਹਿਲੇ ਦੌਰ ਤੋਂ ਬਾਹਰ ਹੋ ਗਿਆ ਸੀ। ਉਹ ਪਹਿਲੇ ਮੈਚ ’ਚ ਚੀਨ ਦੇ ਲੂ ਗੁਆਂਗ ਝੂ ਨਾਲ ਖੇਡੇਗਾ। ਉਹ ਆਲ ਇੰਗਲੈਂਡ ਚੈਂਪੀਅਨਸ਼ਿਪ ’ਚ ਖਿਤਾਬ ਜਿੱਤਣ ਦੇ ਨੇੜੇ ਪਹੁੰਚ ਕੇ ਫਾਈਨਲ ’ਚ ਹਾਰ ਗਿਆ ਸੀ।

ਮਹਿਲਾ ਸਿੰਗਲਜ਼ ’ਚ 2 ਵਾਰ ਦੀ ਓਲੰਪਿਕ ਤਮਗਾ ਜੇਤੂ ਸਿੰਧੂ ਪਹਿਲੇ ਦੌਰ ’ਚ ਇੰਡੋਨੇਸ਼ੀਆ ਦੀ 5ਵੀਂ ਦਰਜਾ ਪ੍ਰਾਪਤ ਪੁੱਤਰੀ ਕੁਸੁਮਾ ਵਰਦਾਨੀ ਨਾਲ ਖੇਡੇਗੀ। ਥਾਈਲੈਂਡ ਓਪਨ ’ਚ ਕੁਆਰਟਰ ਫਾਈਨਲ ਤੱਕ ਪਹੁੰਚੀ ਸਿੰਧੂ ਵੱਖ-ਵੱਖ ਟੂਰਨਾਮੈਂਟਾਂ ਤੋਂ ਜਲਦੀ ਬਾਹਰ ਹੁੰਦੀ ਆਈ ਹੈ। ਏਸ਼ੀਆਈ ਚੈਂਪੀਅਨਸ਼ਿਪ ਉੱਪ-ਜੇਤੂ ਤੇ ਥਾਮਸ ਕੱਪ ’ਚ ਕਾਂਸੀ ਤਮਗਾ ਜਿੱਤਣ ’ਚ ਅਹਿਮ ਭੂਮਿਕਾ ਨਿਭਾਉਣ ਵਾਲਾ ਆਯੂਸ਼ ਸ਼ੈੱਟੀ ਕੈਨੇਡਾ ਦੇ ਵਿਕਟਰ ਲਾਈ ਨਾਲ ਖੇਡੇਗਾ, ਜਿਸ ਨੇ ਪਿਛਲੇ ਸਾਲ ਵਿਸ਼ਵ ਚੈਂਪੀਅਨਸ਼ਿਪ ’ਚ ਕਾਂਸੀ ਤਮਗਾ ਜਿੱਤਿਆ ਸੀ।

ਦੁਨੀਆ ਦੇ ਸਾਬਕਾ ਨੰਬਰ ਇਕ ਖਿਡਾਰੀ ਕਿਦਾਂਬੀ ਸ਼੍ਰੀਕਾਂਤ ਦਾ ਸਾਹਮਣਾ 2021 ਵਿਸ਼ਵ ਚੈਂਪੀਅਨ ਲੋਹ ਕੀਨ ਯੂ ਨਾਲ ਹੋਵੇਗਾ।

ਉੱਥੇ ਹੀ ਵਿਸ਼ਵ ਚੈਂਪੀਅਨਸ਼ਿਪ 2023 ਦੇ ਕਾਂਸੀ ਤਮਗਾ ਜੇਤੂ ਐੱਚ. ਐੱਸ. ਪ੍ਰਣਯ ਇੰਡੋਨੇਸ਼ੀਆ ਦੇ 5ਵੀਂ ਵੇਰੀਅਤਾ ਪ੍ਰਾਪਤ ਜੋਨਾਥਨ ਕ੍ਰਿਸਟੀ ਨਾਲ ਖੇਡੇਗਾ। ਉੱਨਤੀ ਹੁੱਡਾ ਦਾ ਸਾਹਮਣਾ ਸਾਬਕਾ ਜੂਨੀਅਰ ਵਿਸ਼ਵ ਚੈਂਪੀਅਨ ਜਾਪਾਨ ਦੀ ਤੋਮੋਕਾ ਮਿਆਜ਼ਾਕੀ ਨਾਲ ਹੋਵੇਗਾ। ਮਾਲਵਿਕਾ ਬੰਸੋੜ ਚੀਨੀ ਤਾਈਪੇ ਦੀ ਲਿਨ ਸਿਆਂਗ ਤਿ ਨਾਲ ਖੇਡੇਗੀ। ਪੁਰਸ਼ ਡਬਲਜ਼ ’ਚ ਸਾਤਵਿਕ ਸਾਈਰਾਜ ਰੰਕੀਰੈੱਡੀ ਤੇ ਚਿਰਾਗ ਸ਼ੈੱਟੀ ਦਾ ਸਾਹਮਣਾ ਅਮਰੀਕਾ ਦੇ ਚੇਨ ਝਿ ਯਿ ਤੇ ਪ੍ਰੈਸਲੀ ਸਮਿੱਥ ਨਾਲ ਹੋਵੇਗਾ।