ਵਿਸ਼ਵ ਤੀਰਅੰਦਾਜ਼ੀ ਪੈਰਾ ਸੀਰੀਜ਼ : ਸ਼ੀਤਲ ਫਾਈਨਲ ’ਚ ਪੁੱਜੀ, ਸੋਨ ਤਮਗੇ ਲਈ ਸਾਹਮਣੇ ਐਜ਼ਾਦਾ ਸੇਡਾਨ ਦੀ ਚੁਣੌਤੀ

ਅਹਿਮਦਾਬਾਦ– ਮੌਜੂਦਾ ਵਿਸ਼ਵ ਚੈਂਪੀਅਨ ਸ਼ੀਤਲ ਦੇਵੀ ਨੇ ਵਿਸ਼ਵ ਤੀਰਅੰਦਾਜ਼ੀ ਪੈਰਾ ਸੀਰੀਜ਼ (ਤੀਜਾ ਪੜਾਅ) ਦੇ ਤੀਜੇ ਦਿਨ ਸੋਮਵਾਰ ਨੂੰ ਮਹਿਲਾ ਕੰਪਾਊਂਡ ਵਿਅਕਤੀਗਤ ਵਰਗ ਦੇ ਫਾਈਨਲ ’ਚ ਪ੍ਰਵੇਸ਼ ਕਰ ਲਿਆ। ਜੰਮੂ-ਕਸ਼ਮੀਰ ਦੀ ਬਿਨਾਂ ਬਾਹਾਂ ਵਾਲੀ ਤੀਰਅੰਦਾਜ਼ ਸ਼ੀਤਲ ਨੇ ਸਰਿਤਾ ਨੂੰ 145-143 ਨਾਲ ਹਰਾ ਕੇ ਖਿਤਾਬੀ ਮੁਕਾਬਲੇ ’ਚ ਜਗ੍ਹਾ ਬਣਾਈ। ਹੁਣ ਉਸ ਦਾ ਸਾਹਮਣਾ ਕਜ਼ਾਖਿਸਤਾਨ ਦੀ ਐਜ਼ਾਦਾ ਸੇਡਾਨ ਨਾਲ ਹੋਵੇਗਾ। ਸਰਿਤਾ ਕਾਂਸੀ ਤਮਗੇ ਦੇ ਮੁਕਾਬਲੇ ’ਚ ਚੀਨ ਦੀ ਵਾਂਗ ਹੁਈਤਿੰਗ ਨਾਲ ਖੇਡੇਗੀ।

ਕੰਪਾਊਂਡ ਪੁਰਸ਼ ਵਰਗ ’ਚ ਮੌਜੂਦਾ ਵਿਸ਼ਵ ਚੈਂਪੀਅਨ ਤੇ ਦੁਨੀਆ ਦੇ ਨੰਬਰ-1 ਖਿਡਾਰੀ ਤੋਮਾਨ ਕੁਮਾਰ ਨੂੰ ਚੋਟੀ ਦਰਜਾ ਪ੍ਰਾਪਤ ਇੰਡੋਨੇਸ਼ੀਆ ਦੇ ਕੇਨ ਸਵਾਗੁਮਿਲਾਂਗ ਨੇ 146-144 ਨਾਲ ਹਰਾਇਆ। ਹੁਣ ਉਹ ਕਾਂਸੀ ਤਮਗੇ ਲਈ ਇਰਾਕ ਦੇ ਅੱਬਾਸ ਖਾਦਿਮ ਨਾਲ ਖੇਡੇਗਾ। ਕੇਨ ਨੇ ਭਾਰਤ ਦੇ ਗੁਰਵਿੰਦਰ ਸਿੰਘ ਨੂੰ ਕੁਆਰਟਰ ਫਾਈਨਲ ’ਚ 143-141 ਨਾਲ ਹਰਾਇਆ।

ਪੁਰਸ਼ਾਂ ਦੇ ਡਬਲਯੂ-1 ਵਰਗ ’ਚ ਭਾਰਤ ਦੀ ਚੁਣੌਤੀ ਖਤਮ ਹੋ ਗਈ ਜਦੋਂ 5ਵਾਂ ਦਰਜਾ ਪ੍ਰਾਪਤ ਆਦਿਲ ਮੁਹੰਮਦ ਨਜ਼ੀਰ ਅੰਸਾਰੀ ਤੇ 9ਵਾਂ ਦਰਜਾ ਪ੍ਰਾਪਤ ਨੁਰਉੱਦੀਨ ਆਪਣੇ-ਆਪਣੇ ਮੁਕਾਬਲੇ ਹਾਰ ਗਏ। ਮਹਿਲਾ ਵਰਗ ’ਚ ਦੂਜਾ ਦਰਜਾ ਪ੍ਰਾਪਤ ਸਵਾਤੀ ਚੌਧਰੀ ਕਾਂਸੀ ਤਮਗੇ ਲਈ ਖੇਡੇਗੀ। ਉਹ ਚੀਨ ਦੀ 6ਵਾਂ ਦਰਜਾ ਪ੍ਰਾਪਤ ਲਿਊ ਜਿੰਗ ਹੱਥੋਂ 1-7 ਨਾਲ ਹਾਰ ਗਈ ਸੀ।

ਡਬਲਯੂ-1 ਵਰਗ ਦੇ ਐਥਲੈਟਿਕਸ ਦੇ ਸਰੀਰ ਦੇ ਉੱਪਰਲੇ ਅਤੇ ਹੇਠਲੇ ਹਿੱਸਿਆਂ, ਧੜ ਅਤੇ ਘੱਟੋ-ਘੱਟ 3 ਅੰਗਾਂ ’ਚ ਅਪੰਗਤਾ ਹੁੰਦੀ ਹੈ। ਕੁਝ ਨੂੰ ਧਨੁਸ਼ ਲੋਡ ਕਰਨ ’ਚ ਮਦਦ ਲਈ ਇਕ ਸਹਾਇਕ ਦੀ ਲੋੜ ਹੁੰਦੀ ਹੈ।