ਭਾਰਤੀ ਮਹਿਲਾ ਟੀਮ ਦੀਆਂ ਨਜ਼ਰਾਂ ਦੱਖਣੀ ਅਫਰੀਕਾ ਖਿਲਾਫ ਕਲੀਨ ਸਵੀਪ ਕਰਨ ''ਤੇ

ਬੈਂਗਲੁਰੂ, (ਭਾਸ਼ਾ) ਪਹਿਲੇ ਦੋ ਮੈਚਾਂ ਵਿਚ ਹਰ ਤਰ੍ਹਾਂ ਦੀ ਚੁਣੌਤੀ ਦਾ ਦਲੇਰੀ ਨਾਲ ਸਾਹਮਣਾ ਕਰਨ ਵਾਲੀ ਭਾਰਤੀ ਮਹਿਲਾ ਟੀਮ ਐਤਵਾਰ ਨੂੰ ਹੋਣ ਵਾਲੇ ਤੀਜੇ ਅਤੇ ਆਖਰੀ ਵਨ ਡੇ ਵਿਚ ਦੱਖਣੀ ਅਫਰੀਕਾ ਖਿਲਾਫ ਕ੍ਰਿਕਟ ਮੈਚ ਜਿੱਤ ਕੇ ਸੀਰੀਜ਼ 'ਚ ਕਲੀਨ ਸਵੀਪ ਕਰਨ ਦੇ ਇਰਾਦੇ ਨਾਲ ਮੈਦਾਨ 'ਚ ਉਤਰੇਗੀ। ਭਾਰਤ ਨੇ ਸੀਰੀਜ਼ ਦਾ ਪਹਿਲਾ ਮੈਚ ਆਸਾਨੀ ਨਾਲ ਜਿੱਤ ਲਿਆ ਪਰ ਦੂਜੇ ਮੈਚ 'ਚ ਉਸ ਨੂੰ ਸਖਤ ਸੰਘਰਸ਼ ਕਰਨਾ ਪਿਆ। ਪਹਿਲੇ ਮੈਚ 'ਚ ਭਾਰਤੀ ਟੀਮ ਨੇ ਪੰਜ ਵਿਕਟਾਂ 'ਤੇ 99 ਦੌੜਾਂ ਦੇ ਸਕੋਰ ਤੋਂ ਉਭਰਦੇ ਹੋਏ 260 ਤੋਂ ਜ਼ਿਆਦਾ ਦੌੜਾਂ ਬਣਾਈਆਂ। ਇਸ ਤੋਂ ਬਾਅਦ ਭਾਰਤੀ ਗੇਂਦਬਾਜ਼ਾਂ ਨੇ ਇਸ ਸਕੋਰ ਦਾ ਚੰਗੀ ਤਰ੍ਹਾਂ ਬਚਾਅ ਕੀਤਾ। ਹਾਲਾਂਕਿ ਆਖਰੀ ਮੈਚ 'ਚ ਲੌਰਾ ਵੋਲਵਾਰਡ ਅਤੇ ਮਾਰਿਜਨ ਕੈਪ ਨੇ ਸੈਂਕੜੇ ਲਗਾ ਕੇ ਭਾਰਤੀ ਗੇਂਦਬਾਜ਼ਾਂ ਨੂੰ ਚੱਲਣ ਨਹੀਂ ਦਿੱਤਾ ਅਤੇ ਆਖਰੀ ਗੇਂਦ ਤੱਕ ਮੈਚ ਨੂੰ ਰੋਮਾਂਚਕ ਬਣਾਈ ਰੱਖਿਆ। 

ਸਲਾਮੀ ਬੱਲੇਬਾਜ਼ ਸਮ੍ਰਿਤੀ ਮੰਧਾਨਾ ਨੇ ਭਾਰਤ ਲਈ ਹੁਣ ਤੱਕ ਚੰਗਾ ਪ੍ਰਦਰਸ਼ਨ ਕੀਤਾ ਹੈ। ਉਸਨੇ ਪਹਿਲੇ ਦੋ ਮੈਚਾਂ ਵਿੱਚ 117 ਅਤੇ 136 ਦੌੜਾਂ ਬਣਾਈਆਂ ਅਤੇ ਇਸ ਤਰ੍ਹਾਂ ਉਹ ਲਗਾਤਾਰ ਦੋ ਇੱਕ ਰੋਜ਼ਾ ਮੈਚਾਂ ਵਿੱਚ ਸੈਂਕੜੇ ਲਗਾਉਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਖਿਡਾਰਨ ਬਣ ਗਈ। ਭਾਰਤੀ ਉਪ ਕਪਤਾਨ ਆਪਣੇ ਰਿਕਾਰਡ ਨੂੰ ਹੋਰ ਸੁਧਾਰਨ ਲਈ ਕੋਈ ਕਸਰ ਬਾਕੀ ਨਹੀਂ ਛੱਡੇਗੀ। ਕਪਤਾਨ ਹਰਮਨਪ੍ਰੀਤ ਕੌਰ ਨੇ ਪਿਛਲੇ ਮੈਚ ਵਿੱਚ 88 ਗੇਂਦਾਂ ਵਿੱਚ 103 ਦੌੜਾਂ ਬਣਾ ਕੇ ਫਾਰਮ ਵਿੱਚ ਵਾਪਸੀ ਕੀਤੀ ਸੀ ਪਰ ਓਪਨਰ ਸ਼ੈਫਾਲੀ ਵਰਮਾ ਦੌੜਾਂ ਬਣਾਉਣ ਲਈ ਸੰਘਰਸ਼ ਕਰ ਰਹੀ ਹੈ ਜੋ ਭਾਰਤੀ ਟੀਮ ਪ੍ਰਬੰਧਨ ਲਈ ਵੀ ਚਿੰਤਾ ਦਾ ਵਿਸ਼ਾ ਹੋਵੇਗਾ। 

ਭਾਰਤ ਪਹਿਲਾਂ ਹੀ ਸੀਰੀਜ਼ ਜਿੱਤ ਚੁੱਕਾ ਹੈ ਅਤੇ ਇਸ ਲਈ ਟੀਮ ਪ੍ਰਬੰਧਨ ਗੇਂਦਬਾਜ਼ਾਂ ਸ਼੍ਰੇਅੰਕਾ ਪਾਟਿਲ, ਸਾਈਕਾ ਇਸ਼ਾਕ ਅਤੇ ਚੋਟੀ ਦੇ ਕ੍ਰਮ ਦੀ ਬੱਲੇਬਾਜ਼ ਪ੍ਰਿਆ ਪੂਨੀਆ ਨੂੰ ਮੌਕਾ ਦੇ ਸਕਦਾ ਹੈ। ਜਿੱਥੋਂ ਤੱਕ ਦੱਖਣੀ ਅਫਰੀਕਾ ਦਾ ਸਵਾਲ ਹੈ, ਇਹ ਮੈਚ ਜਿੱਤ ਕੇ ਉਹ ਆਈਸੀਸੀ ਮਹਿਲਾ ਵਨਡੇ ਚੈਂਪੀਅਨਸ਼ਿਪ ਲਈ ਘੱਟੋ-ਘੱਟ ਦੋ ਅੰਕ ਹਾਸਲ ਕਰਨ ਦੀ ਕੋਸ਼ਿਸ਼ ਕਰੇਗਾ, ਜੋ ਅਗਲੇ ਸਾਲ ਹੋਣ ਵਾਲੇ ਵਿਸ਼ਵ ਕੱਪ ਵਿੱਚ ਥਾਂ ਬਣਾਉਣ ਲਈ ਅਹਿਮ ਹੋ ਸਕਦਾ ਹੈ। 

ਟੀਮਾਂ ਇਸ ਪ੍ਰਕਾਰ ਹਨ:

ਭਾਰਤ : ਹਰਮਨਪ੍ਰੀਤ ਕੌਰ (ਕਪਤਾਨ), ਸਮ੍ਰਿਤੀ ਮੰਧਾਨਾ (ਉਪ-ਕਪਤਾਨ), ਸ਼ੈਫਾਲੀ ਵਰਮਾ, ਦੀਪਤੀ ਸ਼ਰਮਾ, ਜੇਮਿਮਾ ਰੌਡਰਿਗਜ਼, ਰਿਚਾ ਘੋਸ਼ (ਵਿਕਟਕੀਪਰ), ਉਮਾ ਛੇਤਰੀ (ਵਿਕਟਕੀਪਰ), ਦਿਆਲਨ ਹੇਮਲਤਾ, ਰਾਧਾ ਯਾਦਵ, ਆਸ਼ਾ ਸ਼ੋਭਨਾ, ਸ਼੍ਰੇਅੰਕਾ ਪਾਟਿਲ, ਸਾਈਕਾ ਇਸਹਾਕ, ਪੂਜਾ ਵਸਤਰਕਾਰ, ਰੇਣੁਕਾ ਸਿੰਘ ਠਾਕੁਰ, ਅਰੁੰਧਤੀ ਰੈਡੀ, ਪ੍ਰਿਆ ਪੂਨੀਆ। 

ਦੱਖਣੀ ਅਫ਼ਰੀਕਾ: ਲੌਰਾ ਵੋਲਵਾਰਡਟ (ਕਪਤਾਨ), ਐਨੇਕੇ ਬੋਸ਼, ਤਾਜਮਿਨ ਬ੍ਰਿਟਸ, ਨਦੀਨ ਡੀ ਕਲਰਕ, ਐਨੇ ਡੇਰਕਸਨ, ਮੀਕੇ ਡੀ ਰਿਡਰ, ਸਿਨਾਲੋ ਜਾਫਟਾ, ਮਾਰੀਜਾਨੇ ਕਪ, ਅਯਾਬੋਂਗ ਖਾਕਾ, ਮਸਾਬਾਟਾ ਕਲਾਸ, ਸੁਨੇ ਲੁਅਸ, ਏਲੀਸ-ਮੈਰੀ ਮਾਰਜ, ਨੋਨਕੁਲੁਲੇਕੋ ਮਲਾਬਾ, ਤੁਮੀ ਸੇਖੁਕੁਨੇ, ਨੋਂਦੁਮਿਸੋ ਸ਼ਾਂਗਸੇ, ਡੇਲਮੀ ਟੱਕਰ। 

ਮੈਚ ਦੁਪਹਿਰ 1.30 ਵਜੇ ਸ਼ੁਰੂ ਹੋਵੇਗਾ।