ਭਾਰਤ ਨੇ ਇੰਗਲੈਂਡ ਨਾਲ ਖੇਡਿਆ 1-1 ਦਾ ਡਰਾਅ

ਲੰਡਨ— ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਮਹਿਲਾ ਵਿਸ਼ਵ ਕੱਪ ਹਾਕੀ ਟੂਰਨਾਮੈਂਟ ਵਿਚ ਸ਼ਨੀਵਾਰ ਨੂੰ ਸਨਸਨੀਖੇਜ਼ ਪ੍ਰਦਰਸ਼ਨ ਕਰਦਿਆਂ ਮੇਜ਼ਬਾਨ, ਵਿਸ਼ਵ ਦੀ ਦੂਜੇ ਨੰਬਰ ਦੀ ਟੀਮ ਤੇ ਓਲੰਪਿਕ ਚੈਂਪੀਅਨ ਇੰਗਲੈਂਡ ਨਾਲ 1-1 ਨਾਲ ਡਰਾਅ ਖੇਡ ਕੇ ਅੰਕ ਵੰਡ ਲਏ।
ਵਿਸ਼ਵ ਰੈਂਕਿੰਗ ਵਿਚ 10ਵੇਂ ਨੰਬਰ ਦੀ ਟੀਮ ਭਾਰਤ ਨੇ ਮੈਚ ਵਿਚ ਸ਼ਲਾਘਾਯੋਗ ਪ੍ਰਦਰਸ਼ਨ ਕੀਤਾ ਤੇ ਆਪਣੇ ਤੋਂ ਰੈਂਕਿੰਗ ਵਿਚ 8 ਸਥਾਨ ਉਪਰ ਦੀ ਟੀਮ ਇੰਗਲੈਂਡ ਦੇ ਮੱਥੇ 'ਤੇ ਤਰੇਲੀਆਂ  ਲਿਆ ਦਿੱਤੀਆਂ। ਹਾਲਾਂਕਿ ਉਸ ਨੂੰ ਆਖਰੀ ਪਲਾਂ ਵਿਚ ਡਿਫੈਂਸ ਦੇ ਡਗਮਗਾਉਣ ਦਾ ਖਮਿਆਜ਼ਾ ਡਰਾਅ ਦੇ ਰੂਪ ਵਿਚ ਭੁਗਤਣਾ ਪਿਆ। 
ਭਾਰਤੀ ਹਾਕੀ ਟੀਮ ਨੇ 8 ਸਾਲ ਬਾਅਦ ਟੂਰਨਾਮੈਂਟ ਲਈ ਕੁਆਲੀਫਾਈ ਕੀਤਾ ਹੈ। ਪੂਲ-ਬੀ ਦੇ ਪਹਿਲੇ ਮੁਕਾਬਲੇ ਵਿਚ ਦੁਨੀਆ ਦੀ ਦੂਜੇ ਨੰਬਰ ਦੀ ਟੀਮ ਨਾਲ ਖੇਡਦੇ ਹੋਏ ਭਾਰਤ ਦੀ ਸ਼ੁਰੂਆਤ ਕਾਫੀ ਹਮਲਾਵਰ ਰਹੀ ਤੇ 25ਵੇਂ ਮਿੰਟ ਵਿਚ ਹੀ ਨੇਹਾ ਗੋਇਲ ਨੇ ਫੀਲਡ ਗੋਲ ਕਰ ਕੇ ਉਸ ਨੂੰ ਬੜ੍ਹਤ ਦਿਵਾ ਦਿੱਤੀ। ਭਾਰਤ ਨੇ ਤੀਜੇ ਕੁਆਰਟਰ ਦੇ ਅੰਤ ਤਕ ਬੜ੍ਹਤ ਬਰਕਰਾਰ ਰੱਖੀ  ਪਰ ਆਖਰੀ ਕੁਆਰਟਰ ਵਿਚ ਇੰਗਲੈਂਡ ਨੇ ਜੰਮ ਕੇ ਹੱਲਾ ਬੋਲਿਆ। ਇਸਦਾ ਫਾਇਦਾ 53ਵੇਂ ਮਿੰਟ ਵਿਚ ਮਿਲਿਆ, ਜਦੋਂ ਲਿਲੀ ਓਸਲੇ ਨੇ ਭਾਰਤੀ ਡਿਫੈਂਡਰਾਂ ਨੂੰ ਪੂਰੀ ਤਰ੍ਹਾਂ ਨਾਲ ਝਕਾਨੀ ਦੇ ਕੇ ਗੋਲ ਕਰ ਦਿੱਤਾ। ਭਾਰਤ ਦਾ ਹੁਣ 26 ਜੁਲਾਈ ਨੂੰ ਆਇਰਲੈਂਡ ਨਾਲ ਮੁਕਾਬਲਾ ਹੋਵੇਗਾ।