ਦੇਵਿਕਾ ਸਿਹਾਗ ਨੇ ਥਾਈਲੈਂਡ ਮਾਸਟਰਜ਼ ''ਚ ਜਿੱਤਿਆ ਪਹਿਲਾ ਸੁਪਰ 300 ਖਿਤਾਬ

ਸਪੋਰਟਸ ਡੈਸਕ : ਭਾਰਤ ਦੀ 20 ਸਾਲਾ ਉੱਭਰਦੀ ਬੈਡਮਿੰਟਨ ਸਟਾਰ ਦੇਵਿਕਾ ਸਿਹਾਗ ਨੇ ਬੈਂਕਾਕ ਵਿੱਚ ਖੇਡੇ ਗਏ 2,50,000 ਡਾਲਰ ਇਨਾਮੀ ਰਾਸ਼ੀ ਵਾਲੇ ਥਾਈਲੈਂਡ ਮਾਸਟਰਜ਼ ਵਿੱਚ ਇਤਿਹਾਸ ਰਚ ਦਿੱਤਾ ਹੈ। ਹਰਿਆਣਾ ਦੀ ਰਹਿਣ ਵਾਲੀ ਦੇਵਿਕਾ ਨੇ ਐਤਵਾਰ ਨੂੰ ਮਹਿਲਾ ਸਿੰਗਲਜ਼ ਦੇ ਫਾਈਨਲ ਵਿੱਚ ਮਲੇਸ਼ੀਆ ਦੀ ਗੋਹ ਜਿਨ ਵੇਈ ਨੂੰ ਹਰਾ ਕੇ ਆਪਣੇ ਕਰੀਅਰ ਦਾ ਪਹਿਲਾ ਬੀਡਬਲਯੂਐਫ (BWF) ਸੁਪਰ 300 ਖਿਤਾਬ ਆਪਣੇ ਨਾਮ ਕੀਤਾ। ਫਾਈਨਲ ਮੁਕਾਬਲੇ ਵਿੱਚ ਦੇਵਿਕਾ 21-8, 6-3 ਨਾਲ ਅੱਗੇ ਚੱਲ ਰਹੀ ਸੀ, ਜਦੋਂ ਵਿਸ਼ਵ ਦੀ 68ਵੇਂ ਨੰਬਰ ਦੀ ਖਿਡਾਰਨ ਗੋਹ ਜਿਨ ਵੇਈ ਨੇ ਹੈਮਸਟ੍ਰਿੰਗ ਵਿੱਚ ਖਿੱਚ ਕਾਰਨ ਮੈਚ ਦੇ ਵਿਚਕਾਰੋਂ ਹਟਣ ਦਾ ਫੈਸਲਾ ਕੀਤਾ।

ਵਿਸ਼ਵ ਰੈਂਕਿੰਗ ਵਿੱਚ 63ਵੇਂ ਸਥਾਨ 'ਤੇ ਕਾਬਜ਼ ਦੇਵਿਕਾ ਬੇਂਗਲੁਰੂ ਵਿੱਚ ਕੋਚ ਉਮੇਂਦਰ ਰਾਣਾ ਦੀ ਦੇਖ-ਰੇਖ ਵਿੱਚ ਸਿਖਲਾਈ ਲੈ ਰਹੀ ਹੈ ਅਤੇ ਦੋ ਵਾਰ ਦੀ ਓਲੰਪਿਕ ਤਮਗਾ ਜੇਤੂ ਪੀਵੀ ਸਿੰਧੂ ਦੇ ਨਾਲ ਕੋਚ ਇਰਵਾਨਸਿਆਹ ਆਦਿ ਪ੍ਰਤਾਮਾ ਦੇ ਮਾਰਗਦਰਸ਼ਨ ਵਿੱਚ ਆਪਣੇ ਖੇਡ ਨੂੰ ਨਿਖਾਰ ਰਹੀ ਹੈ। ਦੇਵਿਕਾ ਨੇ ਪਿਛਲੇ ਸਾਲਾਂ ਵਿੱਚ ਲਗਾਤਾਰ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ, ਜਿਸ ਵਿੱਚ 2025 ਮਲੇਸ਼ੀਆ ਇੰਟਰਨੈਸ਼ਨਲ ਖਿਤਾਬ ਅਤੇ ਵਿਸ਼ਵ ਯੂਨੀਵਰਸਿਟੀ ਖੇਡਾਂ ਵਿੱਚ ਕਾਂਸੀ ਦਾ ਤਮਗਾ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਉਹ ਸਵੀਡਿਸ਼ ਓਪਨ ਅਤੇ ਪੁਰਤਗਾਲ ਇੰਟਰਨੈਸ਼ਨਲ ਵਿੱਚ ਵੀ ਜੇਤੂ ਰਹੀ ਹੈ।