ਏਸ਼ੀਆਈ ਪੈਰਾ ਖੇਡਾਂ: ਨਿਸ਼ਾਨੇਬਾਜ਼ੀ 'ਚ ਛਾ ਗਈਆਂ ਭਾਰਤ ਦੀਆਂ ਧੀਆਂ, ਮੋਨਾ ਨੇ ਜਿੱਤਿਆ ਗੋਲਡ, ਅਵਨੀ ਨੇ ਸਿਲਵਰ

ਨਾਗੋਆ : ਭਾਰਤ ਦੀ ਨਿਸ਼ਾਨੇਬਾਜ਼ ਮੋਨਾ ਅਗਰਵਾਲ ਨੇ ਏਸ਼ੀਆਈ ਪੈਰਾ ਖੇਡਾਂ ਵਿੱਚ ਮਹਿਲਾਵਾਂ ਦੀ 10 ਮੀਟਰ ਏਅਰ ਰਾਈਫਲ SH1 ਸਪਰਧਾ ਵਿੱਚ ਨਵਾਂ ਗੇਮਜ਼ ਰਿਕਾਰਡ ਬਣਾਉਂਦੇ ਹੋਏ ਸ਼ਾਨਦਾਰ ਸੋਨ ਤਗਮਾ ਹਾਸਲ ਕੀਤਾ ਹੈ। ਪੈਰਿਸ ਪੈਰਾ-ਓਲੰਪਿਕ 2024 ਦੀ ਕਾਂਸੀ ਤਗਮਾ ਜੇਤੂ ਮੋਨਾ ਨੇ 250.0 ਦਾ ਰਿਕਾਰਡ ਸਕੋਰ ਬਣਾ ਕੇ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਉਨ੍ਹਾਂ ਨੇ ਆਪਣੀ ਹਮਵਤਨ ਅਤੇ ਦੋ ਵਾਰ ਦੀ ਪੈਰਾ-ਓਲੰਪਿਕ ਸੋਨ ਤਗਮਾ ਜੇਤੂ ਅਵਨੀ ਲੇਖਰਾ ਨੂੰ 0.4 ਅੰਕਾਂ ਦੇ ਫਰਕ ਨਾਲ ਪਿੱਛੇ ਛੱਡਿਆ।

ਅਵਨੀ ਲੇਖਰਾ ਨੇ 249.6 ਅੰਕਾਂ ਦੇ ਸਕੋਰ ਨਾਲ ਚਾਂਦੀ ਦਾ ਤਗਮਾ ਆਪਣੇ ਨਾਂ ਕੀਤਾ। ਇਹ ਮੁਕਾਬਲਾ ਆਖਰੀ ਪਲਾਂ ਤੱਕ ਬੇਹੱਦ ਰੋਮਾਂਚਕ ਰਿਹਾ, ਜਿੱਥੇ ਆਖਰੀ ਸ਼ਾਟ ਤੋਂ ਪਹਿਲਾਂ ਮੋਨਾ ਕੋਲ ਅਵਨੀ 'ਤੇ ਮਹਿਜ਼ 0.1 ਅੰਕ ਦੀ ਬੜ੍ਹਤ ਸੀ। ਇਸੇ ਸਪਰਧਾ ਵਿੱਚ ਦੱਖਣੀ ਕੋਰੀਆ ਦੀ ਯੂਨਰੀ ਲੀ ਨੇ ਕਾਂਸੀ ਦਾ ਤਗਮਾ ਜਿੱਤਿਆ। ਦੱਸਣਯੋਗ ਹੈ ਕਿ SH1 ਸ਼੍ਰੇਣੀ ਹੇਠਲੇ ਅੰਗਾਂ ਦੀ ਅਪਾਹਜਤਾ ਵਾਲੇ ਨਿਸ਼ਾਨੇਬਾਜ਼ਾਂ ਲਈ ਹੁੰਦੀ ਹੈ।