ਵੱਡੀ ਖ਼ਬਰ ; World Cup ਖ਼ਤਮ ਹੁੰਦਿਆਂ ਹੀ 24 ਸਾਲਾ ਸਟਾਰ ਕ੍ਰਿਕਟਰ ਨੇ ਲੈ ਲਿਆ ਸੰਨਿਆਸ

ਸਪੋਰਟਸ ਡੈਸਕ : ਟੀ-20 ਵਿਸ਼ਵ ਕੱਪ 2026 ਦੇ ਫਾਈਨਲ ਤੋਂ ਤੁਰੰਤ ਬਾਅਦ ਪਾਕਿਸਤਾਨੀ ਕ੍ਰਿਕਟ ਜਗਤ ਤੋਂ ਇੱਕ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਪਾਕਿਸਤਾਨ ਦੇ ਨੌਜਵਾਨ ਅਤੇ ਉਭਰਦੇ ਸਟਾਰ ਖਿਡਾਰੀ ਸ਼ਾਹਜ਼ੇਬ ਭੱਟੀ ਨੇ ਸਿਰਫ਼ 24 ਸਾਲ ਦੀ ਉਮਰ ਵਿੱਚ ਅਚਾਨਕ ਕ੍ਰਿਕਟ ਨੂੰ ਹਮੇਸ਼ਾ ਲਈ ਅਲਵਿਦਾ ਕਹਿ ਦਿੱਤਾ ਹੈ। ਇਸ ਖਿਡਾਰੀ ਨੇ ਪਾਕਿਸਤਾਨ ਕ੍ਰਿਕਟ ਬੋਰਡ ਅਤੇ ਪ੍ਰਬੰਧਨ ਵਿੱਚ ਫੈਲੀ ਸਿਆਸਤ ਨੂੰ ਆਪਣੇ ਸੰਨਿਆਸ ਦਾ ਮੁੱਖ ਕਾਰਨ ਦੱਸਿਆ ਹੈ।

ਸੋਸ਼ਲ ਮੀਡੀਆ 'ਤੇ ਭਾਵੁਕ ਪੋਸਟ ਰਾਹੀਂ ਦਿੱਤੀ ਜਾਣਕਾਰੀ 
ਸ਼ਾਹਜ਼ੇਬ ਭੱਟੀ ਨੇ 9 ਮਾਰਚ 2026 ਨੂੰ ਆਪਣੇ ਸੋਸ਼ਲ ਮੀਡੀਆ ਹੈਂਡਲ 'ਤੇ ਇੱਕ ਪੋਸਟ ਸਾਂਝੀ ਕਰਦਿਆਂ ਲਿਖਿਆ, "ਅਲਵਿਦਾ ਪਾਕਿਸਤਾਨ ਕ੍ਰਿਕਟ। ਮੈਂ 24 ਸਾਲ ਦੀ ਉਮਰ ਵਿੱਚ ਪਾਕਿਸਤਾਨ ਕ੍ਰਿਕਟ ਛੱਡ ਰਿਹਾ ਹਾਂ"। ਉਨ੍ਹਾਂ ਨੇ ਦੋਸ਼ ਲਾਇਆ ਕਿ ਪਾਕਿਸਤਾਨੀ ਕ੍ਰਿਕਟ ਵਿੱਚ ਚੱਲ ਰਹੀ ਗੰਦੀ ਰਾਜਨੀਤੀ, ਭ੍ਰਿਸ਼ਟਾਚਾਰ ਅਤੇ ਬੁਨਿਆਦੀ ਸਹੂਲਤਾਂ ਦੀ ਘਾਟ ਨੇ ਉਨ੍ਹਾਂ ਦਾ ਕਰੀਅਰ ਤਬਾਹ ਕਰ ਦਿੱਤਾ ਹੈ। ਭੱਟੀ ਅਨੁਸਾਰ, ਉਹ ਇਕੱਲੇ ਅਜਿਹੇ ਖਿਡਾਰੀ ਨਹੀਂ ਹਨ, ਬਲਕਿ ਕਈ ਹੋਰ ਵੀ ਇਸੇ ਕਾਰਨ ਪਾਕਿਸਤਾਨ ਕ੍ਰਿਕਟ ਛੱਡ ਰਹੇ ਹਨ।

ਲਗਾਤਾਰ 40 ਮੈਚਾਂ ਤੋਂ ਬੈਂਚ 'ਤੇ ਬੈਠਣ ਦਾ ਦਰਦ 
ਸ਼ਾਹਜ਼ੇਬ ਨੇ ਆਪਣੇ ਦਰਦ ਨੂੰ ਬਿਆਨ ਕਰਦਿਆਂ ਦੱਸਿਆ ਕਿ ਪਿਛਲੇ ਸਾਲ ਉਨ੍ਹਾਂ ਨੇ ਆਪਣੀ ਟੀਮ 'ਸਿਆਲਕੋਟ' ਲਈ ਕਾਇਦੇ-ਆਜ਼ਮ ਟਰਾਫੀ ਜਿੱਤਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ, ਜਿਸ ਦਾ ਸਿੱਧਾ ਪ੍ਰਸਾਰਣ ਟੀਵੀ 'ਤੇ ਹੋਇਆ ਸੀ। ਉਨ੍ਹਾਂ ਨੇ ਉਸ ਖ਼ਿਤਾਬੀ ਮੁਕਾਬਲੇ ਵਿੱਚ 9ਵੀਂ ਵਿਕਟ ਲਈ 21 ਦੌੜਾਂ ਦੀ ਅਹਿਮ ਸਾਂਝੇਦਾਰੀ ਕੀਤੀ ਸੀ ਅਤੇ 32 ਦੌੜਾਂ ਬਣਾ ਕੇ ਨਾਬਾਦ ਰਹੇ ਸਨ। ਪਰ ਇੰਨੇ ਸ਼ਾਨਦਾਰ ਪ੍ਰਦਰਸ਼ਨ ਦੇ ਬਾਵਜੂਦ, ਉਨ੍ਹਾਂ ਨੂੰ ਪਿਛਲੇ ਲਗਾਤਾਰ 40 ਮੈਚਾਂ ਤੋਂ ਬੈਂਚ 'ਤੇ ਬਿਠਾਇਆ ਗਿਆ ਅਤੇ ਪਲੇਇੰਗ ਇਲੈਵਨ ਵਿੱਚ ਮੌਕਾ ਨਹੀਂ ਦਿੱਤਾ ਗਿਆ।

ਅਜਿਹਾ ਰਿਹਾ ਹੈ ਕਰੀਅਰ
ਸ਼ਾਹਜ਼ੇਬ ਭੱਟੀ ਦੇ ਕ੍ਰਿਕਟ ਕਰੀਅਰ 'ਤੇ ਨਜ਼ਰ ਮਾਰੀਏ ਤਾਂ ਉਨ੍ਹਾਂ ਨੇ :
ਫਰਸਟ ਕਲਾਸ ਕ੍ਰਿਕਟ: 2 ਮੈਚਾਂ ਵਿੱਚ 38 ਦੀ ਔਸਤ ਨਾਲ 76 ਦੌੜਾਂ ਬਣਾਈਆਂ ਅਤੇ 5 ਵਿਕਟਾਂ ਹਾਸਲ ਕੀਤੀਆਂ।

ਲਿਸਟ A: 1 ਮੈਚ ਖੇਡਿਆ ਜਿਸ ਵਿੱਚ 2 ਵਿਕਟਾਂ ਲਈਆਂ।

ਟੀ-20: 1 ਮੈਚ ਵਿੱਚ 1 ਵਿਕਟ ਹਾਸਲ ਕੀਤੀ।

ਉਨ੍ਹਾਂ ਦਾ ਇਕਲੌਤਾ ਸੁਪਨਾ ਪਾਕਿਸਤਾਨ ਦੀ ਰਾਸ਼ਟਰੀ ਟੀਮ ਦੀ ਨੁਮਾਇੰਦਗੀ ਕਰਨਾ ਸੀ, ਜੋ ਕਿ ਬੋਰਡ ਦੀ ਅੰਦਰੂਨੀ ਸਿਆਸਤ ਕਾਰਨ ਅਧੂਰਾ ਰਹਿ ਗਿਆ। ਜ਼ਿਕਰਯੋਗ ਹੈ ਕਿ ਟੀ-20 ਵਿਸ਼ਵ ਕੱਪ 2026 ਵਿੱਚ ਪਾਕਿਸਤਾਨੀ ਟੀਮ ਦੇ ਖ਼ਰਾਬ ਪ੍ਰਦਰਸ਼ਨ ਤੋਂ ਬਾਅਦ ਪਹਿਲਾਂ ਹੀ ਕਾਫ਼ੀ ਆਲੋਚਨਾ ਹੋ ਰਹੀ ਹੈ ਅਤੇ ਹੁਣ ਇਸ ਨੌਜਵਾਨ ਖਿਡਾਰੀ ਦੇ ਸੰਨਿਆਸ ਨੇ ਇੱਕ ਨਵਾਂ ਵਿਵਾਦ ਛੇੜ ਦਿੱਤਾ ਹੈ।