T20 WC ਫਾਈਨਲ ਤੋਂ ਪਹਿਲਾਂ ਧਾਕੜ ਗੇਂਦਬਾਜ਼ ਨੇ ਲਿਆ ਸੰਨਿਆਸ, ਕ੍ਰਿਕਟ ਜਗਤ ਹੈਰਾਨ

ਸਪੋਰਟਸ ਡੈਸਕ : ਟੀ-20 ਵਿਸ਼ਵ ਕੱਪ ਦੇ ਫਾਈਨਲ ਮੁਕਾਬਲੇ ਤੋਂ ਪਹਿਲਾਂ ਨਿਊਜ਼ੀਲੈਂਡ ਮਹਿਲਾ ਕ੍ਰਿਕਟ ਟੀਮ ਲਈ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਟੀਮ ਦੀ ਅਨੁਭਵੀ ਅਤੇ ਦਿੱਗਜ ਤੇਜ਼ ਗੇਂਦਬਾਜ਼ ਲੀ ਤਾਹੂਹੂ (Lea Tahuhu) ਨੇ ਵਨਡੇ (ODI) ਕ੍ਰਿਕਟ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਹੈ। ਲਗਭਗ 15 ਸਾਲ ਲੰਬੇ ਸ਼ਾਨਦਾਰ ਵਨਡੇ ਕਰੀਅਰ ਤੋਂ ਬਾਅਦ ਉਨ੍ਹਾਂ ਨੇ ਇਸ ਫਾਰਮੈਟ ਨੂੰ ਅਲਵਿਦਾ ਕਹਿਣ ਦਾ ਫੈਸਲਾ ਕੀਤਾ ਹੈ। ਹਾਲਾਂਕਿ, ਉਹ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਪੂਰੀ ਤਰ੍ਹਾਂ ਦੂਰ ਨਹੀਂ ਹੋਣਗੇ ਅਤੇ ਟੀ-20 ਅੰਤਰਰਾਸ਼ਟਰੀ ਮੈਚਾਂ ਵਿੱਚ ਨਿਊਜ਼ੀਲੈਂਡ ਲਈ ਖੇਡਣਾ ਜਾਰੀ ਰੱਖਣਗੇ।

ਭਾਵੁਕ ਹੋਏ ਲੀ ਤਾਹੂਹੂ; ਦੇਸ਼ ਲਈ ਖੇਡਣਾ ਦੱਸਿਆ ਮਾਣ ਵਾਲੀ ਗੱਲ 
ਆਪਣੇ ਸੰਨਿਆਸ ਦਾ ਐਲਾਨ ਕਰਦਿਆਂ ਤਾਹੂਹੂ ਕਾਫ਼ੀ ਭਾਵੁਕ ਨਜ਼ਰ ਆਈ। ਉਨ੍ਹਾਂ ਕਿਹਾ ਕਿ 'ਵਾਈਟ ਫਰਨਜ਼' (ਨਿਊਜ਼ੀਲੈਂਡ ਟੀਮ) ਦੀ ਜਰਸੀ ਪਹਿਨ ਕੇ ਵਨਡੇ ਕ੍ਰਿਕਟ ਖੇਡਣਾ ਉਨ੍ਹਾਂ ਲਈ ਹਮੇਸ਼ਾ ਸਨਮਾਨ ਅਤੇ ਮਾਣ ਦੀ ਗੱਲ ਰਹੀ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਆਪਣੇ ਦੇਸ਼ ਅਤੇ ਪਰਿਵਾਰ ਦੀ ਨੁਮਾਇੰਦਗੀ ਕਰਦੇ ਹੋਏ 100 ਤੋਂ ਵੱਧ ਮੈਚ ਖੇਡਣਾ ਉਨ੍ਹਾਂ ਲਈ ਕਿਸੇ ਸੁਪਨੇ ਦੇ ਸੱਚ ਹੋਣ ਵਾਂਗ ਹੈ ਅਤੇ ਉਹ ਹਰ ਪਲ ਨੂੰ ਹਮੇਸ਼ਾ ਯਾਦ ਰੱਖਣਗੇ।

ਸ਼ਾਨਦਾਰ ਰਿਹਾ ਵਨਡੇ ਕਰੀਅਰ 
ਲੀ ਤਾਹੂਹੂ ਨੇ ਆਪਣੇ ਵਨਡੇ ਕਰੀਅਰ ਦੀ ਸ਼ੁਰੂਆਤ ਸਾਲ 2011 ਵਿੱਚ ਆਸਟ੍ਰੇਲੀਆ ਵਿਰੁੱਧ ਕੀਤੀ ਸੀ। ਉਨ੍ਹਾਂ ਦੇ ਕਰੀਅਰ ਦੇ ਅਹਿਮ ਅੰਕੜੇ ਇਸ ਪ੍ਰਕਾਰ ਹਨ:
ਮੈਚ: 103
ਕੁੱਲ ਵਿਕਟਾਂ: 125
ਸਰਵੋਤਮ ਪ੍ਰਦਰਸ਼ਨ: ਇੱਕ ਵਾਰ 5 ਵਿਕਟਾਂ ਅਤੇ ਤਿੰਨ ਵਾਰ 4 ਵਿਕਟਾਂ ਹਾਸਲ ਕੀਤੀਆਂ
ਬੱਲੇਬਾਜ਼ੀ: 69 ਪਾਰੀਆਂ ਵਿੱਚ 442 ਦੌੜਾਂ ਬਣਾਈਆਂ

ਉਨ੍ਹਾਂ ਦੀ ਬਿਹਤਰੀਨ ਪ੍ਰਦਰਸ਼ਨ ਸਦਕਾ ਉਨ੍ਹਾਂ ਨੂੰ ਸਾਲ 2023 ਦੀ 'ਓਡੀਆਈ ਟੀਮ ਆਫ ਦ ਈਅਰ' ਵਿੱਚ ਵੀ ਸ਼ਾਮਲ ਕੀਤਾ ਗਿਆ ਸੀ। ਉਨ੍ਹਾਂ ਨੇ ਆਪਣਾ ਆਖਰੀ ਵਨਡੇ ਮੈਚ 2025 ਦੇ ਮਹਿਲਾ ਵਨਡੇ ਵਿਸ਼ਵ ਕੱਪ ਵਿੱਚ ਇੰਗਲੈਂਡ ਵਿਰੁੱਧ ਖੇਡਿਆ ਸੀ। ਹੁਣ ਟੀ-20 ਵਿਸ਼ਵ ਕੱਪ 2026 'ਤੇ ਨਜ਼ਰ ਵਨਡੇ ਤੋਂ ਸੰਨਿਆਸ ਲੈਣ ਤੋਂ ਬਾਅਦ ਤਾਹੂਹੂ ਹੁਣ ਆਪਣਾ ਪੂਰਾ ਧਿਆਨ ਟੀ-20 ਫਾਰਮੈਟ 'ਤੇ ਲਗਾਉਣਾ ਚਾਹੁੰਦੇ ਹਨ। ਉਨ੍ਹਾਂ ਦਾ ਮੁੱਖ ਟੀਚਾ ਟੀ-20 ਵਿਸ਼ਵ ਕੱਪ 2026 ਵਿੱਚ ਨਿਊਜ਼ੀਲੈਂਡ ਦੇ ਖ਼ਿਤਾਬ ਦਾ ਬਚਾਅ ਕਰਨਾ ਹੈ। ਜ਼ਿਕਰਯੋਗ ਹੈ ਕਿ ਨਿਊਜ਼ੀਲੈਂਡ ਨੇ ਸਾਲ 2024 ਵਿੱਚ ਟੀ-20 ਵਿਸ਼ਵ ਕੱਪ ਜਿੱਤਿਆ ਸੀ। ਇਸ ਤੋਂ ਇਲਾਵਾ, ਤਾਹੂਹੂ ਟੀ-20 ਅੰਤਰਰਾਸ਼ਟਰੀ ਕ੍ਰਿਕਟ ਵਿੱਚ 100 ਵਿਕਟਾਂ ਪੂਰੀਆਂ ਕਰਨ ਦੇ ਬਹੁਤ ਕਰੀਬ ਹਨ। ਜੇਕਰ ਉਹ ਦੱਖਣੀ ਅਫ਼ਰੀਕਾ ਵਿਰੁੱਧ ਆਉਣ ਵਾਲੀ ਸੀਰੀਜ਼ ਵਿੱਚ 5 ਵਿਕਟਾਂ ਲੈ ਲੈਂਦੇ ਹਨ, ਤਾਂ ਉਹ ਇਹ ਵੱਡਾ ਰਿਕਾਰਡ ਆਪਣੇ ਨਾਮ ਕਰ ਲਵੇਗੀ।