ਦਿਨ-ਦਿਹਾਡ਼ੇ 2 ਘਰਾਂ ’ਚੋਂ ਨਕਦੀ ਤੇ ਗਹਿਣੇ ਚੋਰੀ

ਕੋਟ ਈਸੇ ਖਾਂ, (ਗਰੋਵਰ, ਸੰਜੀਵ, ਗਾਂਧੀ)-ਅੱਜ ਚੋਰਾਂ ਵੱਲੋਂ ਦਿਨ-ਦਿਹਾਡ਼ੇ ਪਲਤਾ ਮੁਹੱਲਾ, ਕੋਟ ਈਸੇ ਖਾਂ ’ਚ ਦੋ ਘਰਾਂ ’ਚ ਚੋਰੀ ਕਰਨ  ਦਾ  ਸਮਾਚਾਰ  ਹੈ। ਪ੍ਰਾਪਤ ਜਾਣਕਾਰੀ  ਅਨੁਸਾਰ ਗੁਰਦੇਵ ਚਾਵਲਾ ਦਾ ਪਰਿਵਾਰ ਅੱਜ ਮਾਤਾ ਚਿੰਤਪੂਰਨੀ ਵਿਖੇ ਮਹਾਮਾਈ ਦੇ ਦਰਸ਼ਨਾਂ ਲਈ ਗਿਆ ਹੋਇਆ ਸੀ ਅਤੇ ਉਨ੍ਹਾਂ ਦਾ ਬੇਟਾ ਦੁਕਾਨ ’ਤੇ ਗਿਆ ਹੋਇਆ ਸੀ, ਜਦੋਂ ਤਕਰੀਬਨ 12 ਵਜੇ ਉਨ੍ਹਾਂ ਦਾ ਲਡ਼ਕਾ ਘਰ ਆਇਆ ਤਾਂ  ਉਸ  ਨੇ ਦੇਖਿਆ  ਕਿ ਘਰ ਦਾ ਦਰਵਾਜ਼ਾ ਖੁੱਲ੍ਹਾ ਪਿਆ ਸੀ ਅਤੇ ਅਲਮਾਰੀ ਅੰਦਰਲਾ ਸਾਮਾਨ ਖਿੱਲਰਿਆ ਪਿਆ ਸੀ ਅਤੇ 65 ਹਜ਼ਾਰ ਦੇ ਕਰੀਬ ਨਕਦੀ ਅਤੇ 6 ਤੋਲੇ ਸੋਨੇ ਦੇ ਗਹਿਣੇ ਗਾਇਬ ਸਨ।  ਇਸ ਤੋਂ ਇਲਾਵਾ ਇਸੇ ਘਰ ਦੇ ਸਾਹਮਣੇ ਪੈਂਦੇ ਅਸ਼ਵਨੀ ਕੁਮਾਰ ਉਰਫ ਆਸ਼ੂ ਮੈਡੀਕਲ ਵਾਲੇ ਦੇ ਘਰ ਦਾ ਦਰਵਾਜ਼ਾ ਵੀ ਖੁੱਲ੍ਹਾ ਪਿਆ ਸੀ, ਜਿਨ੍ਹਾਂ ਦੇ ਘਰੋਂ 7-8 ਹਜ਼ਾਰ ਰੁਪਏ ਗਾਇਬ ਸਨ। ਜਾਣਕਾਰੀ ਦਿੰਦਿਆਂ  ਉਨ੍ਹਾਂ ਦੱਸਿਆ ਕਿ ਹਰ ਰੋਜ਼ ਦੀ ਤਰ੍ਹਾਂ ਉਹ ਸਵੇਰੇ ਘਰੋਂ ਦੁਕਾਨ ’ਤੇ ਗਏ ਅਤੇ ਉਨ੍ਹਾਂ ਦੀ ਪਤਨੀ  ਪੜ੍ਹਾਉਣ  ਲਈ  ਸਕੂਲ  ਚਲੀ ਗਈ, ਦੁਪਹਿਰ ਤਕਰੀਬਨ 12:30 ਵਜੇ ਦੇ ਕਰੀਬ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਉਨ੍ਹਾਂ ਦੇ ਘਰ ਦਾ ਦਰਵਾਜ਼ਾ ਖੁੱਲ੍ਹਾ ਪਿਆ  ਹੈ ਤਾਂ ਉਨ੍ਹਾਂ ਨੇ ਘਰ ਆ ਕੇ ਦੇਖਿਆ ਤਾਂ ਘਰ ਦੀ ਅਲਮਾਰੀ ’ਚ ਪਿਆ ਸਾਮਾਨ ਖਿਲਰਿਆ ਪਿਆ ਸੀ ਤੇ ਉਕਤ ਨਕਦੀ ਗਾਇਬ ਸੀ। ਉਨ੍ਹਾਂ  ਦੱਸਿਆ ਕਿ ਇਸ ਸਬੰਧੀ ਪੁਲਸ ਨੂੰ ਇਤਲਾਹ ਦੇ ਦਿੱਤੀ ਗਈ ਹੈ।