ਰੂਸ ''ਚ ਲਾਪਤਾ ਹੋਏ 2 ਪੰਜਾਬੀ ਮੁੰਡੇ, ਅਮਨਜੋਤ ਕੌਰ ਰਾਮੂਵਾਲੀਆ ਨੇ ਵਿਦੇਸ਼ ਮੰਤਰਾਲੇ ਕੋਲ ਕੀਤੀ ਪੈਰਵਾਈ

ਮੋਹਾਲੀ: ਭਾਰਤੀ ਜਨਤਾ ਪਾਰਟੀ ਦੀ ਕੇਂਦਰੀ ਕਮੇਟੀ ਦੀ ਮੈਂਬਰ ਬੀਬਾ ਅਮਨਜੋਤ ਕੌਰ ਰਾਮੂਵਾਲੀਆ ਨੇ ਕੇਂਦਰੀ ਵਿਦੇਸ਼ ਰਾਜ ਮੰਤਰੀ ਪਬਿਤ੍ਰ ਮਾਰਗੇਰੀਟਾ ਨਾਲ ਮੁਲਾਕਾਤ ਕੀਤੀ। ਇਸ ਦੌਰਾਨ ਉਨ੍ਹਾਂ ਨੇ ਰੋਜ਼ਗਾਰ ਦੀ ਭਾਲ ਵਿਚ ਰਸ਼ੀਆ ਗਏ ਮਾਲੇਰਕੋਟਲਾ ਦੇ ਬੁੱਧਰਾਮ ਨਾਂ ਦੇ ਨੌਜਵਾਨ ਅਤੇ ਹਿਸਾਰ ਤੋਂ ਅਮਨ ਨਾਂ ਦੇ ਨੌਜਵਾਨ ਦੇ ਲਾਪਤਾ ਹੋਣ ਦੇ ਮਸਲੇ 'ਤੇ ਗੱਲਬਾਤ ਕੀਤੀ। ਅਮਨਜੋਤ ਨੇ ਕਿਹਾ ਕਿ ਹਿਸਾਰ  ਦੇ ਅਮਨ ਦਾ ਇਕ ਸਾਥੀ ਸੋਨੂੰ ਰਸ਼ੀਆ ਵਿਚ ਫੌਜ ਦੇ ਵਿਚ ਭਰਤੀ ਕਰ ਲਿਆ ਗਿਆ, ਜਿਸ ਦੌਰਾਨ ਉਸ ਦੀ ਮੌਤ ਹੋ ਗਈ। ਉਸ ਦੀ ਲਾਸ਼ ਹਿਸਾਰ ਪਹੁੰਚਾਈ ਗਈ। ਸੋਨੂੰ ਦਾ ਅਜੇ ਤੱਕ ਕੋਈ ਪਤਾ ਨਹੀਂ ਲੱਗਾ।

ਅਮਨਜੋਤ ਨੇ ਦੱਸਿਆ ਕੇਂਦਰੀ ਮੰਤਰਾਲਾ ਪੂਰੀ ਤਰ੍ਹਾਂ ਇਸ ਕੰਮ ਵਿਚ ਲੱਗਾ ਹੈ ਕਿ ਰੂਸ ਵਿਚ ਫਸੇ ਭਾਰਤੀ ਨੌਜਵਾਨਾਂ ਨੂੰ ਸੁਰੱਖਿਅਤ ਵਾਪਸ ਲਿਆਂਦਾ ਜਾਵੇ। ਅਮਨਜੋਤ ਰਾਮੂਵਾਲੀਆ ਨੇ ਦੱਸਿਆ ਕਿ ਕੇਂਦਰੀ ਮੰਤਰਾਲੇ ਰਾਹੀਂ ਪਤਾ ਲੱਗਾ ਕਿ ਸੈਂਕੜੇ ਨੌਜਵਾਨ ਰਸ਼ੀਆ ਵਿਚ ਫਸੇ ਹੋਏ ਹਨ। ਉਨ੍ਹਾਂ ਨੇ ਕਿਹਾ ਕਿ ਉਹ ਨੌਜਵਾਨਾਂ ਦੇ ਮਾਤਾ-ਪਿਤਾ ਨੂੰ ਅਪੀਲ ਕਰਦੇ ਹਨ ਤੇ ਭਵਿੱਖ ਵਿਚ ਕਿਸੇ ਵੀ ਨੌਜਵਾਨ ਨੂੰ ਰੂਸ ਅਤੇ ਯੂਕਰੇਨ ਤਦ ਤੱਕ ਨਾ ਭੇਜਿਆ ਜਾਵੇ ਜਦ ਤੱਕ ਇਨ੍ਹਾਂ ਮੁਲਕਾਂ ਵਿਚ ਸ਼ਾਂਤੀ ਸਥਾਪਿਤ ਨਹੀਂ ਹੋ ਜਾਂਦੀ। ਉਨ੍ਹਾਂ ਦੇਸ਼ਾਂ ਵਿਚ ਰੁਜ਼ਗਾਰ ਦੇ ਨਾਂ 'ਤੇ ਫ਼ੌਜ ਵਿਚ ਭਰਤੀ ਕਰਕੇ ਜੰਗ ਵਿਚ ਧੱਕਿਆ ਜਾ ਰਿਹਾ ਹੈ, ਜਿੱਥੇ ਅਜਾਈਂ ਜਾਨਾਂ ਜਾ ਰਹੀਆਂ ਹਨ। ਅਮਨਜੋਤ ਨੇ ਕਿਹਾ ਕਿ ਪੈਸੇ ਦੀ ਚਕਾਚੌਂਧ ਕਾਰਨ ਆਪਣੇ ਧੀਆਂ ਪੁੱਤਾਂ ਨੂੰ ਮੌਤ ਦੇ ਮੂੰਹ ਵਿਚ ਨਾ ਧੱਕੋ, ਕਿਉਂਕਿ ਇਨ੍ਹਾਂ ਦੇਸ਼ਾਂ ਵਿਚ ਗਏ ਬੱਚਿਆਂ ਦਾ ਵਾਪਸ ਆਉਣਾ ਵੀ ਬਹੁਤ ਮੁਸ਼ਕਲ ਹੈ ਤੇ ਉਸ ਨਾਲ ਤੁਹਾਡੇ ਘਰਾਂ ਦੇ ਦੀਵੇ ਬੁਝ ਜਾਣਗੇ। ਸੋ ਵੱਧ ਪੈਸਿਆਂ ਨਾਲੋਂ ਘਰ ਦੀ ਘੱਟ ਖਾ ਲਓ, ਲੇਕਿਨ ਇਨ੍ਹਾਂ ਦੇਸ਼ਾਂ ਵੱਲ ਨਾ ਜਾਓ।