ਬਸੰਤ ਵਾਲੇ ਦਿਨ ਹੋਈ ਬਾਰਸ਼ ਨੇ ਲੋਕਾਂ ਲਈ ਦੁਬਾਰਾ ਲਿਆਂਦੀ ਠੰਡ

ਤਲਵੰਡੀ ਭਾਈ (ਪਾਲ) : ਬਸੰਤ ਦਾ ਤਿਉਹਾਰ ਆਉਂਦਿਆਂ ਹੀ ਇਲਾਕੇ ਦੇ ਬਜ਼ੁਰਗਾਂ ਦੇ ਮੂੰਹੋਂ ‘ਆਈ ਬਸੰਤ ਪਾਲਾ ਉਡੰਤ’ ਦਾ ਮੁਹਾਵਰਾ ਲੋਕਾਂ ਵੱਲੋਂ ਆਮ ਹੀ ਸੁਣਿਆ ਜਾਂਦਾ ਹੈ ਪਰ ਇਸ ਵਾਰ ਕਾਫੀ ਦੇਰ ਬਾਅਦ ਹੋ ਰਹੀ ਬਾਰਸ਼ ਕਾਰਨ ਮੁੜ-ਮੁੜ ਵੱਧ ਰਹੀ ਸਰਦੀ ਦੇ ਮੌਸਮ ਨੇ ਲੋਕਾਂ ਨੂੰ ਸੋਚਣ ਲਈ ਮਜਬੂਰ ਕਰ ਦਿੱਤਾ ਹੈ ਕਿ ਬਸੰਤ ਪੰਚਮੀ ਦਾ ਦਿਨ ਲੰਘਣ ਦੇ ਬਾਵਜੂਦ ਸਰਦੀ ਦਾ ਸੁਹਾਵਣਾ ਮੌਸਮ ਵੱਧਦਾ ਹੀ ਜਾ ਰਿਹਾ ਹੈ। ਸਦੀਆਂ ਤੋਂ ਚਲੇ ਆ ਰਹੇ ਮੁਹਾਵਰੇ ਦੇ ਅਰਥ ਹੁਣ ਬਦਲਦੇ ਨਜ਼ਰ ਆ ਰਹੇ ਹਨ, ਜਿਸ ਦੀ ਪਛਾਣ ਹੁਣ ‘ਆਈ ਬਸੰਤ ਪਾਲਾ ਵਧੰਤ’ ਵਜੋਂ ਜ਼ਿਆਦਾ ਦੇਖਣ ਨੂੰ ਮਿਲ ਰਹੀ ਹੈ। ਬਸੰਤ ਲੰਘਣ ਤੋਂ ਵੀ ਪੈ ਰਹੀ ਸਰਦੀ ਬਾਰੇ ਅਗਾਂਹ ਵਧੂ ਕਿਸਾਨ ਨਿਰਮਲ ਸਿੰਘ ਬਰਾੜ ਅਤੇ ਗੁਰਦੀਪ ਸਿੰਘ ਦੀਪਾ ਨੇ ਦੱਸਿਆ ਕਿ ਕਣਕ ਦੀ ਖੇਤੀ ਕਰਨ ਵਾਲੇ ਕਿਸਾਨ ਇਸ ਪੈ ਰਹੀ ਠੰਡ ਤੋਂ ਬਹੁਤ ਖੁਸ਼ ਨਜ਼ਰ ਆ ਰਹੇ ਹਨ ਕਿਉਂਕਿ ਇਸ ਰੁੱਤ ਦੀ ਬਾਰਸ਼ ਅਤੇ ਠੰਡ ਕਣਕ ਦੀ ਫ਼ਸਲ ਨੂੰ ਦੇਸੀ ਘਿਓ ਵਾਂਗ ਲੱਗਦੀ ਹੈ ਅਤੇ ਕਣਕ ਦੀ ਫ਼ਸਲ ਭਰਵੇਂ ਰੂਪ ’ਚ ਹੋਣ ਦੀ ਸੰਭਾਵਨਾ ਵੱਧ ਜਾਂਦੀ ਹੈ।

ਮੌਸਮ ਵਿਗਿਆਨੀਆਂ ਦੇ ਦੱਸਣ ਮੁਤਾਬਕ ਇਹ ਸਭ ਕੁੱਝ ਦਿਨੋਂ-ਦਿਨ ਬਦਲ ਰਹੇ ਵਾਤਾਵਰਣ ਅਨੁਸਾਰ ਹੀ ਹੋ ਰਿਹਾ ਹੈ ਕਿਉਂਕਿ ਕੁਦਰਤੀ ਚੀਜ਼ਾਂ ਨਾਲ ਖਿਲਵਾੜ ਕਰਦੇ ਹੋਏ ਇਨਸਾਨਾਂ ਵੱਲੋਂ ਰੁੱਖਾਂ ਦਾ ਘਾਣ ਕੀਤਾ ਜਾ ਰਿਹਾ ਹੈ। ਖੇਤੀ ਲਈ ਮਿਹਨਤ ਨਾਲ ਜ਼ਮੀਨਾਂ ਵਾਹੁਣ ਦੀ ਬਜਾਏ ਫ਼ਸਲਾਂ ਦੀ ਰਹਿੰਦ-ਖੂੰਹਦ ਨੂੰ ਖੇਤਾਂ ’ਚ ਲਾਂਬੂ ਲਾਇਆ ਜਾਂਦਾ ਹੈ। ਜ਼ਮੀਨਾਂ ਦੀ ਉਪਜਾਊ ਸ਼ਕਤੀ ਤੇ ਪੰਛੀਆਂ ਦੀ ਕੀਤੀ ਜਾ ਰਹੀ ਤਬਾਹੀ ਕਾਰਨ ਆਉਣ ਵਾਲੇ ਸਮੇਂ ’ਚ ਮੌਸਮ ਨਾਲ ਸਬੰਧਿਤ ਬਜ਼ੁਰਗਾਂ ਵੱਲੋਂ ਵਰਤੇ ਜਾਂਦੇ ਅਖਾਣਾਂ ਦੇ ਅਰਥ ਹੋਰ ਵੀ ਬਦਲਦੇ ਨਜ਼ਰ ਆਉਣਗੇ ਕਿਉਂਕਿ ਇਹ ਸਭ ਕੁਝ ਮਨੁੱਖ ਵੱਲੋਂ ਕੁਦਰਤ ਦੇ ਨਿਯਮਾਂ ਦੀ ਉਲੰਘਣਾ ਦਾ ਹੀ ਨਤੀਜਾ ਹੈ, ਜਿਸ ਦੇ ਲਾਭ ਘੱਟ ਅਤੇ ਨੁਕਸਾਨ ਵੱਧ ਹੁੰਦੇ ਸਭ ਨੂੰ ਨਜ਼ਰ ਆਉਣਗੇ।