ਰੇਲਵੇ ਫਾਟਕ ''ਤੇ ਤਾਇਨਾਤ ਕਰਮਚਾਰੀ ਦੀ ਅਣਪਛਾਤੇ ਵਿਅਕਤੀਆਂ ਵੱਲੋਂ ਗੋਲੀ ਮਾਰ ਕੇ ਹੱਤਿਆ

ਵੈਰੋਵਾਲ (ਗਿੱਲ, ਕੁਲਾਰ)-  ਪਿੰਡ ਰਾਮਪੁਰ ਭੂਤਵਿੰਡ ਦੇ ਨੇੜੇ ਪੈਂਦੇ ਰੇਲਵੇ ਫਾਟਕ ਉਪਰ ਰਾਤ ਦੀ ਡਿਊਟੀ 'ਤੇ ਤਾਇਨਾਤ ਰੇਲਵੇ ਕਰਮਚਾਰੀ ਦੀ ਅਣਪਛਾਤੇ ਵਿਅਕਤੀਆਂ ਵੱਲੋਂ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। ਮੌਕੇ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਰਾਜੀਵ ਕੁਮਾਰ ਸਿੰਘ ਪੁੱਤਰ ਸ਼ਿਵ ਨਰਾਇਣ ਸਿੰਘ ਵਾਸੀ ਪਿੰਡ ਸੋਨਪੁਰ ਜ਼ਿਲਾ ਛਪਰਾ (ਬਿਹਾਰ) ਜੋ ਰੇਲਵੇ ਵਿਭਾਗ ਬਿਆਸ ਵਿÎਖੇ ਨੌਕਰੀ ਕਰਦਾ ਸੀ ਤੇ ਪਰਿਵਾਰ ਸਮੇਤ ਬਿਆਸ ਵਿਖੇ ਹੀ ਰਹਿੰਦਾ ਸੀ, ਰਾਤ ਸਮੇਂ ਫਾਟਕ ਨੰਬਰ ਸੀ. 21 ਨੇੜੇ ਰਾਮਪੁਰ ਭੂਤਵਿੰਡ ਵਿਖੇ ਡਿਊਟੀ ਕਰ ਰਿਹਾ ਸੀ ਤੇ ਉਸ ਸਮੇਂ ਕੁਝ ਅਣਪਛਾਤੇ ਹਥਿਆਰਬੰਦ ਵਿਅਕਤੀਆਂ ਵੱਲੋਂ ਕਿਸੇ ਕਾਰਨ ਇਸ ਨੂੰ ਗੋਲੀ ਮਾਰ ਦਿੱਤੀ ਗਈ, ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ। ਘਟਨਾਂ ਦਾ ਪਤਾ ਉਸ ਵੇਲੇ ਲੱਗਾ ਜਦੋਂ ਸਵੇਰੇ ਰੇਲਵੇ ਵਿਭਾਗ ਬਿਆਸ ਦੇ ਅਧਿਕਾਰੀ ਉਕਤ ਵਿਅਕਤੀ ਨੂੰ ਗੱਡੀ ਚੱਲਣ ਦੀ ਸੂਚਨਾਂ ਦੇਣ ਸੰਬੰਧੀ ਫੋਨ ਲਗਾ ਰਹੇ ਸਨ ਅਤੇ ਇਸ ਵੱਲੋਂ ਫੋਨ ਨਾ ਚੁੱਕਣ ਤੇ ਰੇਲਵੇ ਅਧਿਕਾਰੀਆਂ ਨੇ ਆਪਣੇ ਦੂਸਰੇ ਕਰਮਚਾਰੀ ਰੇਸ਼ਮ ਸਿੰਘ ਪੁੱਤਰ ਨਰੰਜਣ ਸਿੰਘ ਵਾਸੀ ਖੋਜਕੀਪੁਰ ਨੂੰ ਮੌਕੇ 'ਤੇ ਭੇਜਿਆ। ਜਦੋਂ ਰੇਸ਼ਮ ਸਿੰਘ ਮੌਕੇ 'ਤੇ ਪੁੱਜਾ ਤਾਂ ਉਸ ਨੇ ਦੇਖਿਆ ਕਿ ਰਾਜੀਵ ਕੁਮਾਰ ਮ੍ਰਿਤਕ ਹਾਲਤ 'ਚ ਫ਼ਾਟਕ ਉੱਪਰ ਬਣੇਂ ਡਿਊਟੀ ਰੂਮ 'ਚ ਜ਼ਮੀਨ 'ਤੇ ਡਿੱਗਾ ਹੋਇਆ ਸੀ। ਅਜਿਹਾ ਦ੍ਰਿਸ਼ ਦੇਖ ਕੇ ਰੇਸ਼ਮ ਸਿੰਘ ਨੇ ਤੁਰੰਤ ਰੇਲਵੇ ਵਿਭਾਗ ਅਤੇ ਸਥਾਨਿਕ ਪੁਲਸ ਨੂੰ ਸੂਚਿਤ ਕੀਤਾ, ਜਿਸ ਉਪਰੰਤ ਥਾਣਾਂ ਵੈਰੋਵਾਲ ਦੀ ਐੱਸ.ਐੱਚ.ਓ. ਸੋਨਮਦੀਪ ਕੌਰ ਸਮੇਤ ਪੁਲਸ ਪਾਰਟੀ ਅਤੇ ਰੇਲਵੇ ਦੇ ਅਧਿਕਾਰੀਆਂ ਨੇ ਮੌਕੇ 'ਤੇ ਪੁੱਜ ਕੇ ਜਾਂਚ ਸ਼ੁਰੂ ਕਰ ਦਿੱਤੀ। 

ਇਸ ਉਪਰੰਤ ਮੌਤ ਦੀ ਖਬਰ ਫੈਲਣ ਤੋਂ ਬਾਅਦ ਵੱਡੀ ਗਿਣਤੀ 'ਚ ਉੱਤਰੀ ਰੇਲਵੇ ਮਜ਼ਦੂਰ ਯੂਨੀਅਨ ਦੇ ਮੁਲਾਜ਼ਮਾਂ ਨੇ ਮੌਕੇ 'ਤੇ ਪਹੁੰਚ ਕੇ ਘਟਨਾ ਦੇ ਵਿਰੋਧ 'ਚ ਰੋਸ ਪ੍ਰਗਟ ਕਰਦਿਆਂ ਆਪਣੀਆਂ ਮੰਗਾਂ ਅਤੇ ਫਾਟਕਾਂ ਤੇ ਤਾਇਨਾਤ ਕਰਮਚਾਰੀਆਂ ਦੀ ਸੁਰੱਖਿਆ ਨੂੰ ਲੈ ਕੇ ਉਕਤ ਰੇਲਵੇ ਫਾਟਕ ਬੰਦ ਕਰ ਦਿੱਤਾ। ਉਨ੍ਹਾਂ ਨੇ ਗੋਇੰਦਵਾਲ ਸਾਹਿਬ ਤੋ ਬਿਆਸ ਨੂੰ ਜਾ ਰਹੀ ਰੇਲ ਗੱਡੀ ਰੋਕ ਕੇ ਸੰਬੰਧਿਤ ਮਹਿਕਮੇ ਖਿਲਾਫ਼ ਨਾਅਰੇਬਾਜ਼ੀ ਕੀਤੀ ਅਤੇ ਮੰਗ ਕੀਤੀ ਕਿ ਮ੍ਰਿਤਕ ਦੇ ਪਰਿਵਾਰ ਨੂੰ 50 ਲੱਖ ਰੁਪਏ ਅਤੇ ਪਰਿਵਾਰਕ ਮੈਂਬਰ ਨੂੰ ਸਰਕਾਰੀ ਨੌਕਰੀ ਦਿੱਤੀ ਜਾਵੇ। ਇਸ ਮੌਕੇ ਡੀ.ਐੱਮ. ਫ਼ਿਰੋਜ਼ਪੁਰ ਵੱਲੋਂ ਕਰਮਚਾਰੀਆਂ ਨੂੰ ਵਿਸ਼ਵਾਸ਼ ਦਿਵਾਇਆ ਗਿਆ ਕਿ ਜੋ ਵੀ ਮਹਿਕਮੇ ਵੱਲੋਂ ਬਣਦੀ ਸਹਾਇਤਾ ਹੋਵੇਗੀ ਉਹ ਮ੍ਰਿਤਕ ਦੇ ਪਰਿਵਾਰ ਨੂੰ ਦਿੱਤੀ ਜਾਵੇਗੀ । ਡੀ.ਐੱਮ. ਦੇ ਭਰੋਸਾ ਦਿਵਾਉਣ ਉਪਰੰਤ ਧਰਨਾਕਾਰੀਆਂ ਵੱਲੋਂ ਧਰਨਾ ਚੁੱਕ ਲਿਆ ਗਿਆ ਅਤੇ ਅਵਾਜਾਈ ਬਹਾਲ ਹੋ ਸਕੀ।