ਹੱਜ 2025 ਦੀ ਯਾਤਰਾ ਲਈ ਹੱਜ ਕਮੇਟੀਆਂ ਨੂੰ 25 ਜਨਵਰੀ ਤਕ ਜਮ੍ਹਾਂ ਕਰਾਉਣੇ ਪੈਣਗੇ ਦਸਤਾਵੇਜ਼

ਜੈਤੋ (ਰਘੁਨੰਦਨ ਪਰਾਸ਼ਰ) - ਭਾਰਤ ਸਰਕਾਰ ਦੇ ਘੱਟ ਗਿਣਤੀ ਮਾਮਲਿਆਂ ਦੇ ਮੰਤਰਾਲੇ ਅਧੀਨ ਕੰਮ ਕਰ ਰਹੀ ਹੱਜ ਕਮੇਟੀ ਆਫ ਇੰਡੀਆ ਨੇ ਹੱਜ 2025 ਲਈ ਦੂਜੀ ਵੇਟਿੰਗ ਲਿਸਟ ਜਾਰੀ ਕਰਨ ਦਾ ਐਲਾਨ ਕੀਤਾ ਹੈ। ਵੱਖ-ਵੱਖ ਸੂਬਿਆਂ ਤੋਂ 3,676 ਬਿਨੈਕਾਰਾਂ ਨੂੰ ਅਸਥਾਈ ਸੀਟਾਂ ਅਲਾਟ ਕੀਤੀਆਂ ਗਈਆਂ ਹਨ। ਸਰਕੂਲਰ ਨੰਬਰ 25 ਮਿਤੀ 10 ਜਨਵਰੀ 2025 ਦੇ ਅਨੁਸਾਰ, ਇਹਨਾਂ ਬਿਨੈਕਾਰਾਂ ਨੂੰ 23 ਜਨਵਰੀ 2025 ਨੂੰ ਜਾਂ ਇਸ ਤੋਂ ਪਹਿਲਾਂ ਹੱਜ ਦੀ ਰਕਮ ਲਈ 2,72,300/- ਰੁਪਏ (ਰੁ. 1,30,300/- ਦੀ ​​ਪਹਿਲੀ ਕਿਸ਼ਤ ਅਤੇ 1,42,000/- ਰੁਪਏ ਦੀ ਦੂਜੀ ਕਿਸ਼ਤ ਸਮੇਤ) ਜਮ੍ਹਾ ਕਰਵਾਉਣਾ ਹੋਵੇਗਾ। 

ਇਸ ਤੋਂ ਇਲਾਵਾ, ਬਿਨੈਕਾਰਾਂ ਨੂੰ ਸਰਕੂਲਰ ਨੰਬਰ 25 ਵਿੱਚ ਵੇਰਵੇ ਅਨੁਸਾਰ 25 ਜਨਵਰੀ 2025 ਤੱਕ ਆਪਣੇ ਸਬੰਧਤ ਰਾਜ/ਯੂਟੀ ਹੱਜ ਕਮੇਟੀਆਂ ਵਿੱਚ ਲੋੜੀਂਦੇ ਦਸਤਾਵੇਜ਼ ਜਮ੍ਹਾਂ ਕਰਾਉਣੇ ਪੈਣਗੇ। ਸਾਊਦੀ ਅਰਬ ਵਿੱਚ ਹਵਾਈ ਕਿਰਾਏ ਅਤੇ ਖਰਚਿਆਂ ਨੂੰ ਅੰਤਿਮ ਰੂਪ ਦੇਣ ਦੇ ਆਧਾਰ 'ਤੇ ਬਾਕੀ ਹੱਜ ਰਾਸ਼ੀ (ਤੀਜੀ ਕਿਸ਼ਤ) ਦੇ ਵੇਰਵਿਆਂ ਨੂੰ ਬਾਅਦ ਵਿੱਚ ਸੂਚਿਤ ਕੀਤਾ ਜਾਵੇਗਾ।

ਵਧੇਰੇ ਜਾਣਕਾਰੀ ਲਈ, ਬਿਨੈਕਾਰਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਹੱਜ ਕਮੇਟੀ ਆਫ਼ ਇੰਡੀਆ ਦੀ ਅਧਿਕਾਰਤ ਵੈੱਬਸਾਈਟ https://www.hajcommittee.gov.in 'ਤੇ ਉਪਲਬਧ ਸਰਕੂਲਰ ਨੰ. 25 ਦਾ ਹਵਾਲਾ ਦੇਣ ਜਾਂ ਆਪਣੀਆਂ ਸਬੰਧਤ ਰਾਜ/ਯੂਟੀ ਹੱਜ ਕਮੇਟੀਆਂ ਨਾਲ ਸੰਪਰਕ ਕਰਨ। ਹੱਜ ਯਾਤਰਾ 29 ਅਪ੍ਰੈਲ ਤੋਂ ਸ਼ੁਰੂ ਹੋ ਕੇ 30 ਮਈ ਤੱਕ ਚੱਲੇਗੀ। ਹੱਜ ਯਾਤਰਾ ਲਈ ਪਹਿਲੀ ਉਡਾਣ 29 ਅਪ੍ਰੈਲ ਨੂੰ ਹੋਵੇਗੀ। ਸ਼ਰਧਾਲੂਆਂ ਦੀ ਵਾਪਸੀ 10 ਤੋਂ 11 ਜੂਨ ਦਰਮਿਆਨ ਹੋਵੇਗੀ।