ਟੀ. ਵੀ. ਸੀਰੀਅਲ ਦੇਖ ਕੇ ਨੂੰਹ ਨੇ ਆਪਣੇ ਹੀ ਘਰ ਕੀਤੀ ਚੋਰੀ

ਫਿਲੌਰ (ਭਾਖੜੀ) : ਆਪਣੇ ਹੀ ਸਹੁਰੇ ਘਰ 'ਚ ਫਿਲਮੀ ਅੰਦਾਜ਼ 'ਚ ਗਹਿਣੇ ਚੋਰੀ ਕਰ ਕੇ ਆਪਣੇ ਪ੍ਰੇਮੀ ਨੂੰ ਦੇਣ ਵਾਲੀ ਨੂੰਹ ਅਤੇ ਉਸ ਦੇ ਆਸ਼ਕ ਨੂੰ ਪੁਲਸ ਨੇ ਗ੍ਰਿਫਤਾਰ ਕਰ ਕੇ 3 ਲੱਖ ਦੇ ਗਹਿਣੇ ਬਰਾਮਦ ਕੀਤੇ ਹਨ। ਥਾਣਾ ਮੁਖੀ ਇੰਸਪੈਕਟਰ ਪ੍ਰੇਮ ਸਿੰਘ ਨੇ ਦੱਸਿਆ ਕਿ ਬੀਤੇ ਦਿਨ ਰਾਤ 1 ਵਜੇ ਮਥੁਰਾਪੁਰੀ ਦੇ ਰਹਿਣ ਵਾਲੇ ਜਸਵੰਤ ਸਿੰਘ ਨੇ ਪੁਲਸ ਨੂੰ ਫੋਨ ਕਰ ਕੇ ਸੂਚਿਤ ਕੀਤਾ ਕਿ ਉਨ੍ਹਾਂ ਦੇ ਘਰ ਚੋਰ ਵੜ ਆਏ ਸਨ, ਜੋ 3 ਲੱਖ ਰੁਪਏ ਦੇ ਸੋਨੇ ਦੇ ਗਹਿਣੇ ਲੈ ਗਏ ਹਨ। ਜਦੋਂ ਪੁਲਸ ਉੱਥੇ ਪੁੱਜੀ ਤਾਂ ਉਨ੍ਹਾਂ ਨੂੰ ਕੇਸ ਸ਼ੱਕੀ ਲੱਗਿਆ। ਸਵੇਰੇ ਉਹ ਪੁਲਸ ਪਾਰਟੀ ਨਾਲ ਮੁੜ ਜਸਵੰਤ ਸਿੰਘ ਦੇ ਘਰ ਪੁੱਜੇ। ਮੌਕਾ ਦੇਖਿਆ ਤਾਂ ਉਨ੍ਹਾਂ ਨੂੰ ਸਮਝਦੇ ਦੇਰ ਨਾ ਲੱਗੀ ਕਿ ਚੋਰ ਕੋਈ ਬਾਹਰ ਦਾ ਨਹੀਂ, ਸਗੋਂ ਘਰ ਦਾ ਹੀ ਕੋਈ ਮੈਂਬਰ ਹੈ। ਉਨ੍ਹਾਂ ਨੇ ਚੋਰ ਫੜਨ ਲਈ ਨਾਟਕ ਰਚਿਆ ਅਤੇ ਪਰਿਵਾਰ ਵਾਲਿਆਂ ਨੂੰ ਕਿਹਾ ਕਿ ਉਨ੍ਹਾਂ ਨੇ ਫਿੰਗਰ ਪ੍ਰਿੰਟ ਮਾਹਰ ਦੀ ਟੀਮ ਬੁਲਾ ਲਈ ਹੈ।

ਸਾਰੇ ਇਕੱਠੇ ਹੋ ਕੇ ਆਪਣੇ ਹੱਥਾਂ ਦੇ ਨਿਸ਼ਾਨ ਦੇਣਗੇ ਤਾਂ ਜਸਵੰਤ ਦੀ ਨੂੰਹ ਮੀਨਾ ਜਿਸ ਦੇ 2 ਬੱਚੇ ਹਨ, ਘਬਰਾ ਗਈ ਅਤੇ ਉਸ ਨੇ ਆਪਣੀ ਸੱਸ ਦੇ ਕੰਨ 'ਚ ਕਿਹਾ ਕਿ ਉਸ ਦੇ ਹੱਥਾਂ ਦੇ ਨਿਸ਼ਾਨ ਨਾ ਦਿੱਤੇ ਜਾਣ ਕਿਉਂਕਿ ਗਹਿਣੇ ਉਸ ਨੇ ਚੋਰੀ ਕਰ ਕੇ ਆਪਣੇ ਪ੍ਰੇਮੀ ਅਮਿਤ ਨੂੰ ਦੇ ਦਿੱਤੇ ਹਨ। ਥਾਣਾ ਮੁਖੀ ਪ੍ਰੇਮ ਸਿੰਘ ਨੇ ਦੱਸਿਆ ਕਿ ਜਦੋਂ ਮੀਨਾ ਨੂੰ ਫੜ ਕੇ ਪੁਲਸ ਥਾਣੇ ਲੈ ਆਈ ਤਾਂ ਉਸ ਨੇ ਪੁੱਛਗਿਛ ਦੌਰਾਨ ਦੱਸਿਆ ਕਿ ਉਸ ਦਾ ਪਤੀ ਕੰਮ ਸਬੰਧੀ ਵਿਦੇਸ਼ ਚਲਾ ਗਿਆ ਸੀ। ਪਹਿਲਾਂ ਵੀ ਉਸ ਨੇ ਕਈ ਵਾਰ ਛੋਟੀਆਂ-ਮੋਟੀਆਂ ਚੋਰੀਆਂ ਰੁਪਏ ਆਪਣੇ ਪ੍ਰੇਮੀ ਨੂੰ ਦਿੱਤੇ ਸਨ। ਪਤੀ ਦੇ ਵਾਪਸ ਆਉਣ ਤੋਂ ਬਾਅਦ ਵੀ ਉਸ ਦਾ ਅਮਿਤ ਨਾਲ ਪ੍ਰੇਮ ਪ੍ਰਸੰਗ ਜਾਰੀ ਰਿਹਾ। ਉਹ ਰੋਜ਼ਾਨਾ ਟੀ.ਵੀ. 'ਤੇ ਆਉਣ ਵਾਲਾ ਪ੍ਰੋਗਰਾਮ ਕ੍ਰਾਇਮ ਪੈਟਰੋਲ ਦੇਖਦੀ ਸੀ। ਉਸੇ ਪ੍ਰੋਗਰਾਮ ਨੂੰ ਦੇਖ ਕੇ ਉਸ ਦੇ ਦਿਮਾਗ 'ਚ ਚੋਰੀ ਕਰਨ ਦਾ ਆਈਡੀਆ ਆਇਆ। ਉਸ ਨੇ ਪਹਿਲਾਂ ਘਰੋਂ ਗਹਿਣੇ ਚੋਰੀ ਕਰ ਕੇ ਆਪਣੇ ਪ੍ਰੇਮੀ ਅਮਿਤ ਨੂੰ ਦਿੱਤੇ ਅਤੇ ਰਾਤ ਨੂੰ ਪੂਰੇ ਘਰ ਦਾ ਸਾਮਾਨ ਖਿਲਾਰ ਕੇ ਚੋਰੀ ਦਾ ਨਾਟਕ ਰਚ ਦਿੱਤਾ ਅਤੇ ਖੁਦ ਹੀ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ ਕਿ ਘਰ 'ਚ ਚੋਰ ਦਾਖਲ ਹੋ ਗਏ ਹਨ। ਉਹ ਆਪਣੇ ਮਕਸਦ ਵਿਚ ਕਾਮਯਾਬ ਹੋ ਜਾਂਦੀ ਜੇਕਰ ਪੁਲਸ ਫਿੰਗਰ ਪ੍ਰਿੰਟ ਮਾਹਰ ਬੁਲਾਉਣ ਦਾ ਨਾਟਕ ਨਾ ਕਰਦੀ। ਪੁਲਸ ਨੇ ਸਿਰਫ 12 ਘੰਟੇ ਵਿਚ ਮੀਨਾ ਅਤੇ ਉਸ ਦੇ ਆਸ਼ਕ ਨੂੰ ਫੜ ਕੇ ਚੋਰੀ ਦੇ ਗਹਿਣੇ ਬਰਾਮਦ ਕਰਨ ਵਿਚ ਸਫਲਤਾ ਹਾਸਲ ਕਰ ਲਈ। ਦੋਵਾਂ ਨੂੰ ਅਦਾਲਤ ਵਿਚ ਪੇਸ਼ ਕਰਕੇ ਜੇਲ ਭੇਜਿਆ ਜਾਵੇਗਾ।