'ਗੰਦਾ ਧੰਦਾ' ਕਰਨ ਵਾਲਿਆਂ ਨੂੰ ਨਹੀਂ ਪੁਲਸ ਦਾ ਖ਼ੌਫ, ਲੁਧਿਆਣਾ 'ਚ ਮੁੜ ਖੁੱਲ੍ਹੇ ਦੇਹ ਵਪਾਰ 'ਚ ਸ਼ਾਮਲ ਕਈ ਸਪਾ ਸੈਂਟਰ

ਜਲੰਧਰ/ਲੁਧਿਆਣਾ (ਵਿਸ਼ੇਸ਼) : ਲੁਧਿਆਣਾ ’ਚ ਮਸਾਜ ਦੀ ਆੜ ’ਚ ਦੇਹ ਵਪਾਰ ਦਾ ਧੰਦਾ ਕਰਨ ਵਾਲੇ ਕੁਝ ਸਪਾ ਸੈਂਟਰਾਂ ਖ਼ਿਲਾਫ਼ ਹਾਲ ਹੀ ’ਚ ਮੈਟਰੋਪੋਲੀਟਨ ਪੁਲਸ ਪ੍ਰਸ਼ਾਸਨ ਨੇ ਮੁਹਿੰਮ ਚਲਾਈ ਸੀ, ਜਿਸ ਤਹਿਤ ਲੁਧਿਆਣਾ ਦੇ ਇਕ ਦਰਜਨ ਦੇ ਕਰੀਬ ਸਪਾ ਸੈਂਟਰਾਂ ’ਤੇ ਛਾਪੇਮਾਰੀ ਕੀਤੀ ਗਈ ਸੀ। ਇਸ ਛਾਪੇਮਾਰੀ ਤੋਂ ਬਾਅਦ 3 ਸਪਾ ਸੈਂਟਰਾਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਸੀ। ਇਸ ਮਾਮਲੇ ਦੇ ਕੁਝ ਮੁਲਜ਼ਮ ਅਜੇ ਵੀ ਪੁਲਸ ਦੀ ਗ੍ਰਿਫ਼ਤ ਤੋਂ ਬਾਹਰ ਹਨ।

ਮੁੜ ਤੇਜ਼ ਹੋਇਆ ਗੰਦਾ ਧੰਦਾ
ਇਸ ਘਟਨਾ ਤੋਂ ਬਾਅਦ ਕਰੀਬ ਇਕ ਹਫ਼ਤੇ ਤੱਕ ਸਪਾ ਸੈਂਟਰ ਮਾਲਕਾਂ ’ਚ ਪੁਲਸ ਪ੍ਰਤੀ ਡਰ ਬਣਿਆ ਰਿਹਾ ਪਰ ਹੁਣ ਇਕ ਵਾਰ ਫਿਰ ਲੁਧਿਆਣਾ ਦੇ ਹਰ ਪਾਸ਼ ਇਲਾਕੇ ’ਚ ਸਥਿਤ ਸਪਾ ਸੈਂਟਰ ਮੁੜ ਸਰਗਰਮ ਹੋ ਗਏ ਹਨ ਅਤੇ ਇਕ ਵਾਰ ਫਿਰ ਇਨ੍ਹਾਂ ਸਪਾ ਸੈਂਟਰਾਂ ’ਚ ਗੰਦਾ ਧੰਦਾ ਸ਼ੁਰੂ ਹੋ ਗਿਆ ਹੈ।

ਇਸ ਨੂੰ ਲੈ ਕੇ ਸਬੰਧਤ ਥਾਣਿਆਂ ਦੀ ਪੁਲਸ ਪ੍ਰਣਾਲੀ ’ਤੇ ਸਵਾਲ ਖੜ੍ਹੇ ਹੋ ਰਹੇ ਹਨ। ਵੱਡਾ ਸਵਾਲ ਇਹ ਹੈ ਕਿ ਜੇਕਰ ਉੱਚ ਅਧਿਕਾਰੀਆਂ ਵੱਲੋਂ ਮਾਰੇ ਛਾਪਿਆਂ ਤੋਂ ਬਾਅਦ ਕਈ ਸਪਾ ਸੈਂਟਰ ਕਥਿਤ ਤੌਰ ’ਤੇ ਦੇਹ ਵਪਾਰ 'ਚ ਸ਼ਾਮਲ ਪਾਏ ਜਾਂਦੇ ਹਨ ਤਾਂ ਸਥਾਨਕ ਥਾਣਿਆਂ ਨੂੰ ਇਸ ਬਾਰੇ ਕੋਈ ਸੁਰਾਗ ਕਿਉਂ ਨਹੀਂ ਮਿਲਦਾ।

ਇਨ੍ਹਾਂ ਖੇਤਰਾਂ ’ਚ ਹੋਇਆ ਦੁਬਾਰਾ ਕੰਮ ਸ਼ੁਰੂ
ਇਹ ਵੀ ਪਤਾ ਲੱਗਾ ਹੈ ਕਿ ਭਾਵੇਂ ਲੁਧਿਆਣਾ ’ਚ 100 ਦੇ ਕਰੀਬ ਸਪਾ ਸੈਂਟਰ ਹਨ, ਜੋ ਮਸਾਜ ਮੁਹੱਈਆ ਕਰਵਾਉਂਦੇ ਹਨ ਪਰ ਇਨ੍ਹਾਂ ’ਚੋਂ ਬਹੁਤ ਸਾਰੇ ਅਜਿਹੇ ਹਨ, ਜੋ ਮਸਾਜ ਦੀ ਆੜ ’ਚ ਦੇਹ ਵਪਾਰ ਦਾ ਧੰਦਾ ਕਰਵਾਉਂਦੇ ਹਨ।

ਜਾਣਕਾਰੀ ਅਨੁਸਾਰ ਪੁਲਸ ਦੀ ਛਾਪੇਮਾਰੀ ਤੋਂ ਬਾਅਦ ਆਂਸਲ ਪਲਾਜ਼ਾ, ਮਾਲ ਰੋਡ, ਮਲਹਾਰ ਰੋਡ, ਚੰਡੀਗੜ੍ਹ ਰੋਡ, ਆਰਤੀ ਚੌਕ, ਕਿਪਸ ਮਾਰਕੀਟ, ਕੁੰਮਹਾਰ ਮੰਡੀ, ਮਾਡਲ ਟਾਊਨ ਆਦਿ ਇਲਾਕਿਆਂ ’ਚ ਕਰੀਬ ਇਕ ਹਫਤੇ ਤੋਂ ਬੰਦ ਪਏ ਸਪਾ ਸੈਂਟਰ ਹੁਣ ਪੂਰੀ ਤਾਕਤ ਨਾਲ ਮੁੜ ਖੁੱਲ੍ਹ ਗਏ ਹਨ, ਜਿਸ ਕਾਰਨ ਸੱਭਿਅਕ ਲੋਕਾਂ ਦੇ ਸ਼ਹਿਰ ਲੁਧਿਆਣਾ ਦਾ ਮਾਹੌਲ ਵਿਗੜਨਾ ਸ਼ੁਰੂ ਹੋ ਗਿਆ ਹੈ।

ਸਪਾ ਮਾਲਕਾਂ ਨੂੰ ਸੁਰੱਖਿਆ ਦੇ ਰਿਹਾ ਹੈ ਇਕ ਛੋਟਾ ਆਗੂ
ਦੱਸਿਆ ਗਿਆ ਹੈ ਕਿ ਲੁਧਿਆਣਾ ’ਚ ਕੁਝ ਸਫੈਦਪੋਸ਼ ਲੋਕ ਜੋ ਮਨੁੱਖੀ ਸੇਵਾ ਦੇ ਨਾਂ ’ਤੇ ਆਪਣੇ ਆਪ ਨੂੰ ਪੇਸ਼ ਕਰ ਰਹੇ ਹਨ, ਉਹ ਵੀ ਇਸ ਧੰਦੇ ਨਾਲ ਜੁੜੇ ਹੋਏ ਹਨ। ਪਤਾ ਲੱਗਾ ਹੈ ਕਿ ਕਰੀਬ 3 ਤੋਂ 4 ਲੋਕ ਅਜਿਹੇ ਹਨ, ਜੋ ਕਿਸੇ ਸਿਆਸੀ ਪਾਰਟੀ ਜਾਂ ਐੱਨ. ਜੀ. ਓ. ਨਾਲ ਜੁੜੇ ਹੋਣ ਦਾ ਦਾਅਵਾ ਕਰ ਰਹੇ ਹਨ।

ਮਨੁੱਖਤਾ ਦੀ ਸੇਵਾ ਕਰਨ ਦੀ ਬਜਾਏ ਇਸ ਗੰਦੇ ਧੰਦੇ ਦੀ ਸਰਪ੍ਰਸਤੀ ਕਰ ਰਹੇ ਹਨ। ਇਹ ਵੀ ਪਤਾ ਲੱਗਾ ਹੈ ਕਿ ਅਜਿਹਾ ਹੀ ਇਕ ਸਫੈਦਪੋਸ਼ ਛੋਟਾ-ਮੋਟਾ ਆਗੂ ਸ਼ਹਿਰ ਦੇ ਕਈ ਵੱਡੇ ਸਪਾ ਸੈਂਟਰਾਂ ਤੋਂ ਲਗਾਤਾਰ ਮਹੀਨਾਵਾਰ ਟੈਕਸ ਵਸੂਲ ਰਿਹਾ ਹੈ ਅਤੇ ਗੰਦਾ ਕਾਰੋਬਾਰ ਕਰ ਰਹੇ ਇਨ੍ਹਾਂ ਸਪਾ ਸੈਂਟਰਾਂ ਨੂੰ ਪੁਲਸ ਕਾਰਵਾਈ ਤੋਂ ਬਚਾ ਰਿਹਾ ਹੈ। ਇਸ ਛੋਟੇ-ਮੋਟੇ ਆਗੂ ਦਾ ਦਾਅਵਾ ਹੈ ਕਿ ਲੁਧਿਆਣਾ ਪੁਲਸ ਦੇ ਕਈ ਲੋਕਾਂ ਨਾਲ ਉਸ ਦੇ ਚੰਗੇ ਸੰਪਰਕ ਹਨ ਅਤੇ ਜਦੋਂ ਵੀ ਕਿਤੇ ਵੀ ਛਾਪੇਮਾਰੀ ਕਰਨੀ ਹੁੰਦੀ ਹੈ ਤਾਂ ਉਸ ਨੂੰ ਪਹਿਲਾਂ ਹੀ ਸੂਚਨਾ ਮਿਲ ਜਾਂਦੀ ਹੈ।

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:-  https://play.google.com/store/apps/details?id=com.jagbani&hl=en 

For IOS:-  https://itunes.apple.com/in/app/id538323711?mt=8