ਜਲਦ ਫੌਜ ''ਚ ਸ਼ਾਮਲ ਹੋਵੇਗਾ ''ਜ਼ੋਰਾਵਰ'', ਫਾਈਨਲ ਟਰਾਇਲ ਲਈ ਪਹੁੰਚਿਆ ਚੀਨ ਬਾਰਡਰ

ਨੈਸ਼ਨਲ ਡੈਸਕ - ਭਾਰਤੀ ਫੌਜ ਨੂੰ ਜਲਦੀ ਹੀ ਸਵਦੇਸ਼ੀ ਲਾਈਟ ਟੈਂਕ ਜ਼ੋਰਾਵਰ ਮਿਲੇਗਾ। ਵੀਰਵਾਰ ਤੋਂ ਲੱਦਾਖ 'ਚ ਇਸ ਦਾ ਅੰਤਿਮ ਪ੍ਰੀਖਣ ਸ਼ੁਰੂ ਹੋ ਗਿਆ ਹੈ। ਇਸ ਤੋਂ ਪਹਿਲਾਂ ਮੈਦਾਨੀ ਅਤੇ ਰੇਗਿਸਤਾਨੀ ਖੇਤਰਾਂ ਵਿੱਚ ਇਸ ਦਾ ਸਫਲ ਪ੍ਰੀਖਣ ਕੀਤਾ ਜਾ ਚੁੱਕਾ ਹੈ। ਜੇਕਰ ਇਹ ਪ੍ਰੀਖਣ ਵੀ ਸਫਲ ਰਿਹਾ ਤਾਂ ਅਗਲੇ ਸਾਲ ਜ਼ੋਰਾਵਰ ਟੈਂਕ ਨੂੰ ਫੌਜ 'ਚ ਸ਼ਾਮਲ ਕਰ ਲਿਆ ਜਾਵੇਗਾ।

ਜ਼ੋਰਾਵਰ ਦਾ ਅੰਤਿਮ ਪ੍ਰੀਖਣ 21 ਨਵੰਬਰ ਤੋਂ 15 ਦਸੰਬਰ ਦਰਮਿਆਨ ਲੱਦਾਖ ਦੇ ਉੱਚਾਈ ਵਾਲੇ ਖੇਤਰਾਂ ਵਿੱਚ ਕੀਤਾ ਜਾ ਰਿਹਾ ਹੈ। ਇਸ ਤੋਂ ਪਹਿਲਾਂ ਰਾਜਸਥਾਨ ਦੇ ਰੇਗਿਸਤਾਨੀ ਇਲਾਕਿਆਂ ਅਤੇ ਮੈਦਾਨੀ ਇਲਾਕਿਆਂ 'ਚ ਇਸ ਦਾ ਪ੍ਰੀਖਣ ਕੀਤਾ ਗਿਆ ਸੀ, ਜਿੱਥੇ ਇਹ ਫੌਜ ਦੀਆਂ ਉਮੀਦਾਂ 'ਤੇ ਖਰਾ ਉਤਰਿਆ ਸੀ। ਸਫਲ ਪ੍ਰੀਖਣ ਤੋਂ ਬਾਅਦ ਇਸਨੂੰ 2025 ਵਿੱਚ ਫੌਜ ਨੂੰ ਸੌਂਪ ਦਿੱਤਾ ਜਾਵੇਗਾ।

ਚੀਨ ਨਾਲ ਮੁਕਾਬਲਾ ਕਰਨ ਲਈ ਤਿਆਰ
ਜ਼ੋਰਾਵਰ ਟੈਂਕ ਦੀ ਜ਼ਰੂਰਤ ਗਲਵਾਨ ਹਿੰਸਾ ਤੋਂ ਬਾਅਦ ਮਹਿਸੂਸ ਕੀਤੀ ਗਈ ਸੀ, ਜਦੋਂ ਚੀਨ ਨੇ ਲੱਦਾਖ ਸਰਹੱਦ 'ਤੇ ਆਪਣੇ ਹਲਕੇ ਲੜਾਕੂ ਟੈਂਕ ZTQ-15 ਬਲੈਕ ਪੈਂਥਰ ਨੂੰ ਤਾਇਨਾਤ ਕੀਤਾ ਸੀ। ਫੌਜ ਨੇ ਹਲਕੇ ਟੈਂਕਾਂ ਦੀ ਮੰਗ ਕੀਤੀ, ਜਿਸ ਤੋਂ ਬਾਅਦ ਜ਼ੋਰਾਵਰ ਟੈਂਕ 4 ਸਾਲਾਂ ਵਿੱਚ ਤਿਆਰ ਕੀਤਾ ਗਿਆ। ਇਹ ਟੈਂਕ ਡੀਆਰਡੀਓ ਅਤੇ ਐਲ ਐਂਡ ਟੀ ਦੁਆਰਾ ਸਾਂਝੇ ਤੌਰ 'ਤੇ ਬਣਾਇਆ ਗਿਆ ਹੈ।

ਜ਼ੋਰਾਵਰ ਟੈਂਕ ਦੀਆਂ ਵਿਸ਼ੇਸ਼ਤਾਵਾਂ
ਇਹ ਟੈਂਕ ਤੇਜ਼ ਹੈ ਅਤੇ ਲੇਜ਼ਰ, ਮਸ਼ੀਨ ਗਨ, ਐਂਟੀ-ਟੈਂਕ ਗਾਈਡਡ ਮਿਜ਼ਾਈਲ ਵਰਗੇ ਆਧੁਨਿਕ ਹਥਿਆਰਾਂ ਨਾਲ ਲੈਸ ਹੈ। ਇਸ ਦਾ ਭਾਰ 25 ਟਨ ਹੈ, ਜੋ ਕਿ ਹੋਰ ਟੈਂਕਾਂ ਨਾਲੋਂ ਲਗਭਗ ਅੱਧਾ ਹੈ। ਇਹ 105 ਐਮ.ਐਮ. ਦੀ ਤਾਕਤਵਰ ਬੰਦੂਕ ਨਾਲ ਲੈਸ ਹੈ ਅਤੇ ਇਸ ਨੂੰ ਸਿਰਫ਼ ਤਿੰਨ ਸਿਪਾਹੀ ਚਲਾ ਸਕਦੇ ਹਨ।

ਫੌਜ ਦੀਆਂ ਲੋੜਾਂ ਅਨੁਸਾਰ ਕੀਤਾ ਗਿਆ ਤਿਆਰ
ਜ਼ੋਰਾਵਰ ਟੈਂਕ ਨੂੰ ਫਾਇਰਪਾਵਰ, ਗਤੀਸ਼ੀਲਤਾ ਅਤੇ ਸੁਰੱਖਿਆ ਦੇ ਮਾਪਦੰਡਾਂ 'ਤੇ ਡਿਜ਼ਾਈਨ ਕੀਤਾ ਗਿਆ ਹੈ। ਹਲਕਾ ਹੋਣ ਕਾਰਨ ਇਸ ਨੂੰ ਹਵਾਈ ਜਹਾਜ਼ ਰਾਹੀਂ ਉੱਚਾਈ ਵਾਲੇ ਖੇਤਰਾਂ ਵਿੱਚ ਤਾਇਨਾਤ ਕੀਤਾ ਜਾ ਸਕਦਾ ਹੈ। ਫਿਲਹਾਲ ਫੌਜ ਨੇ 359 ਲਾਈਟ ਟੈਂਕਾਂ ਦੀ ਜ਼ਰੂਰਤ ਦੱਸੀ ਹੈ ਪਰ ਹੁਣ ਤੱਕ ਸਿਰਫ 59 ਜ਼ੋਰਾਵਰ ਟੈਂਕਾਂ ਦਾ ਆਰਡਰ ਦਿੱਤਾ ਗਿਆ ਹੈ। ਇਹ ਟੈਂਕ ਫੌਜ ਦੇ ਪੁਰਾਣੇ ਟੀ-72 ਟੈਂਕਾਂ ਦੀ ਥਾਂ ਲੈਣਗੇ।

ਲੱਦਾਖ ਦੇ ਵਿਜੇਤਾ ਦੇ ਨਾਂ 'ਤੇ ਰੱਖਿਆ ਗਿਆ ਨਾਂ
ਜ਼ੋਰਾਵਰ ਟੈਂਕ ਦਾ ਨਾਂ ਜਨਰਲ ਜ਼ੋਰਾਵਰ ਸਿੰਘ ਕਹਿਲੂਰੀਆ ਦੇ ਨਾਂ 'ਤੇ ਰੱਖਿਆ ਗਿਆ ਹੈ। ਜਨਰਲ ਜ਼ੋਰਾਵਰ ਸਿੰਘ ਨੇ ਡੋਗਰਾ ਸ਼ਾਸਨ ਦੌਰਾਨ ਲੱਦਾਖ, ਤਿੱਬਤ ਅਤੇ ਗਿਲਗਿਤ ਬਲਿਸਤਾਨ ਨੂੰ ਜਿੱਤ ਲਿਆ ਸੀ। ਉਨ੍ਹਾਂ ਨੇ ਕਿਸ਼ਤਵਾੜ ਦੇ ਰਾਜਪਾਲ ਵਜੋਂ ਵੀ ਕੰਮ ਕੀਤਾ।