ਪਿਆਰ ''ਚ ਸਵਿਤਾ ਤੋਂ ਬਣੀ ਲਲਿਤ, ਜੈਂਡਰ ਚੇਂਜ ਕਰਵਾ ਸਹੇਲੀ ਨਾਲ ਕਰਵਾ ਲਿਆ ਵਿਆਹ ਤੇ ਫਿਰ...

ਵੈੱਬ ਡੈਸਕ : ਉੱਤਰ ਪ੍ਰਦੇਸ਼ ਦੇ ਮਥੁਰਾ ਦੇ ਮਹਾਵਨ ਥਾਣਾ ਖੇਤਰ 'ਚ ਇੱਕ ਅਜੀਬ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇੱਕ ਵਿਆਹੁਤਾ ਜੋੜਾ ਫੜਿਆ ਗਿਆ ਹੈ। ਇਸ 'ਚ ਦੋ ਸਹੇਲੀਆਂ ਵਿਚਕਾਰ ਪ੍ਰੇਮ ਸਬੰਧ ਸੀ, ਜਿਸ 'ਚ ਇੱਕ ਨੇ ਲਿੰਗ ਪਰਿਵਰਤਨ ਕਰਵਾਇਆ ਅਤੇ ਦੂਜੇ ਨਾਲ ਵਿਆਹ ਕਰਵਾ ਲਿਆ। ਦੋਵੇਂ ਇੱਕ ਕੋਚਿੰਗ ਸੈਂਟਰ 'ਚ ਮਿਲੇ ਸਨ ਅਤੇ ਇੱਥੋਂ ਉਨ੍ਹਾਂ ਦਾ ਪਿਆਰ ਵਧਿਆ। ਦੋਵਾਂ ਨੇ ਇੱਕ ਦੂਜੇ ਨੂੰ ਪਤੀ-ਪਤਨੀ ਵਜੋਂ ਸਵੀਕਾਰ ਕਰ ਲਿਆ ਹੈ।

ਜਾਣੋ ਪੂਰਾ ਮਾਮਲਾ
ਜਾਣਕਾਰੀ ਅਨੁਸਾਰ ਰਾਜਸਥਾਨ ਦੇ ਭਰਤਪੁਰ ਜ਼ਿਲ੍ਹੇ ਦੀ ਰਹਿਣ ਵਾਲੀ ਸਵਿਤਾ ਸਿੰਘ ਸਾਲ 2021 'ਚ ਕੋਚਿੰਗ ਲਈ ਜੈਪੁਰ ਗਈ ਸੀ। ਉਹ ਜੈਪੁਰ ਦੇ ਸੰਗਾਨੇਰ ਪੁਲਸ ਸਟੇਸ਼ਨ ਦੇ ਨੇੜੇ ਇੱਕ ਘਰ 'ਚ ਕਿਰਾਏ 'ਤੇ ਰਹਿਣ ਲੱਗੀ। ਉਸਦੀ ਦੋਸਤੀ ਮਕਾਨ ਮਾਲਕ ਦੀ ਧੀ ਪੂਜਾ ਨਾਲ ਹੋ ਗਈ। ਦੋਵਾਂ ਵਿਚਕਾਰ ਨੇੜਤਾ ਵਧਦੀ ਗਈ। ਉਹ ਇਕੱਠੇ ਰਹਿੰਦੇ ਸੀ, ਇਕੱਠੇ ਖਾਂਦੇ ਸੀ ਅਤੇ ਇਕੱਠੇ ਬਾਹਰ ਜਾਂਦੇ ਸੀ। ਦੋਵਾਂ ਵਿਚਕਾਰ ਪਿਆਰ ਹੋਰ ਵੀ ਗੂੜ੍ਹਾ ਹੋ ਗਿਆ। ਸਵਿਤਾ 31 ਮਈ 2022 ਨੂੰ ਇੰਦੌਰ ਦੇ ਇੱਕ ਹਸਪਤਾਲ 'ਚ ਲਿੰਗ ਤਬਦੀਲੀ ਕਰਵਾਉਣ ਤੋਂ ਬਾਅਦ ਲਲਿਤ ਸਿੰਘ ਬਣ ਗਈ। ਦੋਵਾਂ ਦਾ ਵਿਆਹ ਨਵੰਬਰ 2024 'ਚ ਜੈਪੁਰ ਦੇ ਆਰੀਆ ਸਮਾਜ ਵੈਦਿਕ ਸੰਸਥਾਨ ਮੰਡਲ 'ਚ ਹੋਇਆ ਸੀ। ਪਰ, ਪੂਜਾ ਨੇ ਆਪਣੇ ਪਰਿਵਾਰ ਨੂੰ ਇਸ ਬਾਰੇ ਪਤਾ ਵੀ ਨਹੀਂ ਲੱਗਣ ਦਿੱਤਾ।

ਪੁਲਸ ਨੇ ਦੋਵਾਂ ਨੂੰ ਫੜਿਆ
ਪੂਜਾ ਦੇ ਪਿਤਾ ਰਮੇਸ਼, ਜੋ ਕਿ ਪੇਸ਼ੇ ਤੋਂ ਡਰਾਈਵਰ ਹਨ, ਨੇ ਉਸਦਾ ਵਿਆਹ ਇੱਕ ਮੁੰਡੇ ਨਾਲ ਤੈਅ ਕਰ ਦਿੱਤਾ ਸੀ। ਪੂਜਾ ਨੂੰ ਇਸ ਬਾਰੇ ਪਤਾ ਲੱਗਾ ਅਤੇ ਉਸਨੇ ਆਪਣੇ ਪਿਤਾ ਨੂੰ ਦੱਸਿਆ ਕਿ ਉਹ ਬੀ.ਐੱਡ ਕਰਨ ਲਈ ਭਰਤਪੁਰ ਜਾ ਰਹੀ ਹੈ। ਪੂਜਾ 10 ਜਨਵਰੀ ਨੂੰ ਭਰਤਪੁਰ ਗਈ ਅਤੇ ਆਪਣਾ ਮੋਬਾਈਲ ਬੰਦ ਕਰ ਦਿੱਤਾ। ਪਰਿਵਾਰਕ ਮੈਂਬਰਾਂ ਨੇ ਉਸਨੂੰ ਕਈ ਵਾਰ ਫ਼ੋਨ ਕੀਤਾ, ਪਰ ਫ਼ੋਨ ਹਮੇਸ਼ਾ ਬੰਦ ਆ ਰਿਹਾ ਸੀ। ਜਿਸ ਤੋਂ ਬਾਅਦ, ਚਿੰਤਤ ਪਰਿਵਾਰਕ ਮੈਂਬਰਾਂ ਨੇ 14 ਜਨਵਰੀ ਨੂੰ ਜੈਪੁਰ ਦੇ ਸੰਗਾਨੇਰ ਪੁਲਸ ਸਟੇਸ਼ਨ 'ਚ ਗੁੰਮਸ਼ੁਦਗੀ ਦੀ ਰਿਪੋਰਟ ਦਰਜ ਕਰਵਾਈ। ਪੁਲਸ ਨੇ ਜਾਂਚ ਸ਼ੁਰੂ ਕੀਤੀ ਅਤੇ ਪੂਜਾ ਦੇ ਮੋਬਾਈਲ ਦੀ ਲੋਕੇਸ਼ਨ ਮਹਾਵਨ ਥਾਣਾ ਖੇਤਰ 'ਚ ਲੱਭ ਲਈ। ਜੈਪੁਰ ਪੁਲਸ ਨੇ ਸ਼ੁੱਕਰਵਾਰ ਨੂੰ ਪੂਜਾ ਅਤੇ ਲਲਿਤ ਨੂੰ ਮਹਾਵਨ ਥਾਣਾ ਖੇਤਰ ਦੇ ਇੱਕ ਮੈਡੀਕਲ ਕਾਲਜ ਤੋਂ ਗ੍ਰਿਫ਼ਤਾਰ ਕੀਤਾ। ਪੂਜਾ ਹੁਣ ਲਲਿਤ ਨਾਲ ਰਹਿਣਾ ਚਾਹੁੰਦੀ ਹੈ। ਰਾਜਸਥਾਨ ਪੁਲਸ ਪੂਜਾ ਨੂੰ ਜੈਪੁਰ ਲੈ ਗਈ ਹੈ, ਜਿੱਥੇ ਉਸਨੂੰ ਅਦਾਲਤ 'ਚ ਪੇਸ਼ ਕੀਤਾ ਜਾਵੇਗਾ ਤੇ ਉਸਦੇ ਬਿਆਨ ਦੇ ਆਧਾਰ 'ਤੇ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।