ਤਰਨਜੀਤ ਸਿੰਘ ਸੰਧੂ ਹੋਣਗੇ ਅਮਰੀਕਾ 'ਚ ਨਵੇਂ ਭਾਰਤੀ ਰਾਜਦੂਤ (ਵੀਡੀਓ)

ਵਾਸ਼ਿੰਗਟਨ ਡੀਸੀ, (ਗੋਗਨਾ)- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਫਰਵਰੀ 'ਚ ਹੋਣ ਵਾਲੇ ਭਾਰਤ ਦੌਰੇ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਦੋਵੇਂ ਦੇਸ਼ਾਂ ਦਰਮਿਆਨ ਤਾਲਮੇਲ ਵਧਾਉਣ ਲਈ ਭਾਰਤੀ ਵਿਦੇਸ਼ ਸੇਵਾ ਦੇ ਤਜਰਬੇਕਾਰ ਅਫਸਰ ਤਰਨਜੀਤ ਸਿੰਘ ਸੰਧੂ ਦੇ ਨਾਂ ਨੂੰ ਅਮਰੀਕਾ ਵਿਚ ਭਾਰਤ ਦੇ ਰਾਜਦੂਤ ਦੇ ਤੌਰ 'ਤੇ ਤਾਇਨਾਤੀ ਲਈ ਹਰੀ ਝੰਡੀ ਦੇ ਦਿੱਤੀ ਹੈ। ਤਰਨਜੀਤ ਸਿੰਘ ਸੰਧੂ ਨੇ ਆਪਣੇ 3 ਦਹਾਕਿਆਂ ਤੋਂ ਵੱਧ ਕਰੀਅਰ ਦੌਰਾਨ ਲੰਬੇ ਸਮੇਂ ਤਕ ਅਮਰੀਕਾ ਵਿਚ ਕੰਮ ਕੀਤਾ ਹੈ ਅਤੇ ਉਨ੍ਹਾਂ ਦੇ ਅਮਰੀਕੀ ਡਿਪਲੋਮੇਟਸ ਨਾਲ ਚੰਗੇ ਸਬੰਧ ਹਨ। ਸ਼੍ਰੀਲੰਕਾ ਵਿਚ ਹਾਈ ਕਮਿਸ਼ਨਰ ਦੇ ਤੌਰ ’ਤੇ ਆਪਣੀ ਮੌਜੂਦਾ ਤਾਇਨਾਤੀ ਤੋਂ ਪਹਿਲਾਂ ਉਹ 2013 ਤੋਂ ਲੈ ਕੇ 2017 ਤਕ ਵਾਸ਼ਿੰਗਟਨ ਡੀ. ਸੀ. ਵਿਚ ਭਾਰਤੀ ਮਿਸ਼ਨ ਦੇ ਡਿਪਟੀ ਚੀਫ ਰਹੇ ਹਨ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ 2011 ਤੋਂ ਲੈ ਕੇ 2013 ਤਕ ਫਰੈਂਕਫਰਟ 'ਚ ਕਾਊਂਸਲ ਜਨਰਲ ਆਫ ਇੰਡੀਆ ਦੇ ਅਹੁਦੇ 'ਤੇ ਵੀ ਕੰਮ ਕੀਤਾ ਹੈ। ਇਸ ਤੋਂ ਪਹਿਲਾਂ ਯੂਨਾਈਟਿਡ ਨੇਸ਼ਨ ਵਿਚ ਭਾਰਤੀ ਮਿਸ਼ਨ 'ਚ ਸਥਾਈ ਤਾਇਨਾਤੀ ਦੌਰਾਨ ਵੀ ਉਹ 2005 ਤੋਂ ਲੈ ਕੇ 2009 ਤਕ ਨਿਊਯਾਰਕ ਵਿਚ ਰਹੇ ਹਨ। ਇਸ ਤੋਂ ਪਹਿਲਾਂ ਉਹ 1997 ਤੋਂ ਲੈ ਕੇ 2000 ਤਕ ਕਰੀਬ 4 ਸਾਲ ਤਕ ਵਾਸ਼ਿੰਗਟਨ 'ਚ ਸਥਿਤੀ ਭਾਰਤੀ ਅੰਬੈਸੀ ਵਿਚ ਬਤੌਰ ਸਕੱਤਰ (ਰਾਜਨੀਤਕ) ਆਪਣੀਆਂ ਸੇਵਾਵਾਂ ਦੇ ਚੁੱਕੇ ਹਨ। ਇਸ ਲਿਹਾਜ ਨਾਲ ਉਨ੍ਹਾਂ ਨੇ ਆਪਣੇ 30 ਸਾਲ ਦੇ ਕਰੀਅਰ ਵਿਚੋਂ ਕਰੀਬ 15 ਸਾਲ ਅਮਰੀਕਾ ਵਿਚ ਬਿਤਾਏ ਹਨ। ਲਿਹਾਜ਼ਾ ਉਨ੍ਹਾਂ ਦੇ ਅਮਰੀਕੀ ਡਿਪਲੋਮੈਟਸ ਦੇ ਨਾਲ-ਨਾਲ ਸਿਆਸੀ ਪਾਰਟੀਆਂ ਨਾਲ ਵੀ ਚੰਗੇ ਸਬੰਧ ਹਨ ਅਤੇ ਉਨ੍ਹਾਂ ਦੀ ਅਮਰੀਕਾ 'ਚ ਦੁਬਾਰਾ ਤਾਇਨਾਤੀ ਭਾਰਤ-ਅਮਰੀਕਾ ਰਿਸ਼ਤਿਆਂ ਨੂੰ ਨਵੇਂ ਅਯਾਮ ਦੇ ਸਕਦੀ ਹੈ।

ਟਰੰਪ ਦੇ ਦੌਰੇ ਤੋਂ ਪਹਿਲਾਂ ਮੋਦੀ ਦਾ 'ਟਰੰਪ ਕਾਰਡ'

1988 ਵਿਚ ਭਾਰਤੀ ਵਿਦੇਸ਼ ਸੇਵਾ ਜੁਆਇਨ ਕਰਨ ਵਾਲੇ ਤਰਨਜੀਤ ਸਿੰਘ ਸੰਧੂ ਨੂੰ 30 ਸਾਲ ਦਾ ਲੰਮਾ ਤਜਰਬਾ ਹੈ। ਆਪਣੇ ਕਾਰਜਕਾਲ ਦੌਰਾਨ ਉਹ ਅਮਰੀਕਾ, ਰੂਸ, ਸ਼੍ਰੀਲੰਕਾ ਸਮੇਤ ਕਈ ਹੋਰ ਦੇਸ਼ਾਂ ਵਿਚ ਸੇਵਾਵਾਂ ਦੇ ਚੁੱਕੇ ਹਨ। ਇਨ੍ਹਾਂ ਦੀ ਨਿਯੁਕਤੀ ਨੂੰ ਮੋਦੀ ਦਾ ਟਰੰਪ ਕਾਰਡ ਮੰਨਿਆ ਜਾ ਰਿਹਾ ਹੈ। ਇਕ ਨਜ਼ਰ ਉਨ੍ਹਾਂ ਦੇ ਕਰੀਅਰ ’ਤੇ।

1990 ਤੋਂ 1992

* ਸੋਵੀਅਤ ਯੂਨੀਅਨ ’ਚ ਤੀਜੇ ਸਕੱਤਰ (ਰਾਜਨੀਤਕ) ਦੂਜੇ ਸਕੱਤਰ (ਕਮਰਸ਼ੀਅਲ)

1992 ਤੋਂ 1994

* ਕੀਵ ’ਚ ਭਾਰਤੀ ਦੂਤਘਰ ’ਚ ਰਾਜਨੀਤਕ ਤੇ ਪ੍ਰਸ਼ਾਸਨਿਕ ਵਿੰਗ ਦੇ ਮੁਖੀ

1994 ਤੋਂ 1997

ਵਿਦੇਸ਼ ਮੰਤਰਾਲਾ ’ਚ ਮੀਡੀਆ ਤਾਲਮੇਲ ਲਈ ਆਫੀਸਰ ਆਨ ਸਪੈਸ਼ਲ ਡਿਊਟੀ

1997 ਤੋਂ 2000

* ਵਾਸ਼ਿੰਗਟਨ ਡੀ.ਸੀ. ’ਚ ਭਾਰਤੀ ਅੰਬੈਸੀ ’ਚ ਸਕੱਤਰ (ਰਾਜਨੀਤਕ)

ਦਸੰਬਰ 2000 ਤੋਂ ਸਤੰਬਰ 2004

* ਕੋਲੰਬੋ ’ਚ ਇੰਡੀਅਨ ਹਾਈ ਕਮਿਸ਼ਨ ਦੇ ਰਾਜਨੀਤਕ ਵਿੰਗ ਦੇ ਮੁਖੀ ਦੇ ਤੌਰ ’ਤੇ ਤਾਇਨਾਤੀ

ਜੁਲਾਈ 2005 ਤੋਂ ਫਰਵਰੀ 2009

* ਯੂਨਾਈਟਿਡ ਨੇਸ਼ਨ ’ਚ ਭਾਰਤੀ ਮਿਸ਼ਨ ’ਚ ਸਥਾਈ ਤਾਇਨਾਤੀ

ਮਾਰਚ 2009 ਤੋਂ ਅਗਸਤ 2011

* ਵਿਦੇਸ਼ ਮੰਤਰਾਲਾ ’ਚ ਜੁਆਇੰਟ ਸੈਕਟਰੀ (ਯੂ. ਐੱਨ.) ਅਤੇ ਜੁਆਇੰਟ ਸੈਕਟਰੀ (ਪ੍ਰਸ਼ਾਸਨ)

ਸਤੰਬਰ 2011 ਤੋਂ ਜੁਲਾਈ 2013

* ਫਰੈਂਕਫਰਟ 'ਚ ਕੌਂਸਲ ਜਨਰਲ ਆਫ ਇੰਡੀਆ

ਜੁਲਾਈ 2013 ਤੋਂ ਜਨਵਰੀ 2017

* ਵਾਸ਼ਿੰਗਟਨ ਡੀ.ਸੀ. ’ਚ ਭਾਰਤੀ ਮਿਸ਼ਨ ਦੇ ਡਿਪਟੀ ਚੀਫ

ਪਤਨੀ ਰੀਨਤ ਸੰਧੂ ਵੀ ਹਨ ਤਜਰਬੇਕਾਰ ਡਿਪਲੋਮੈਟ

ਤਰਨਜੀਤ ਸਿੰਘ ਸੰਧੂ ਦੀ ਪਤਨੀ ਰੀਨਤ ਸੰਧੂ ਵੀ ਭਾਰਤੀ ਵਿਦੇਸ਼ ਸੇਵਾ ਦੀ 1989 ਬੈਚ ਦੀ ਅਫਸਰ ਹੈ ਅਤੇ ਵਰਤਮਾਨ ’ਚ ਇਟਲੀ 'ਚ ਭਾਰਤ ਦੀ ਰਾਜਦੂਤ ਦੇ ਤੌਰ 'ਤੇ ਸੇਵਾ ਨਿਭਾ ਰਹੀ ਹੈ। ਇਸ ਤੋਂ ਪਹਿਲਾਂ ਉਹ ਵਾਸ਼ਿੰਗਟਨ ਡੀ.ਸੀ. ’ਚ ਸਥਿਤ ਭਾਰਤੀ ਦੂਤਘਰ 'ਚ ਭਾਰਤੀ ਮਿਸ਼ਨ ਦੀ ਮੁਖੀ ਦੇ ਤੌਰ 'ਤੇ ਤਾਇਨਾਤ ਸੀ। ਕਰੀਬ 3 ਦਹਾਕਿਆਂ ਦੇ ਆਪਣੇ ਕਰੀਅਰ ਦੌਰਾਨ ਉਹ ਮਾਸਕੋ, ਕੀਵ, ਵਾਸ਼ਿੰਗਟਨ ਡੀ. ਸੀ., ਕੋਲੰਬੋ, ਜੈਨੇਵਾ ਅਤੇ ਨਿਊਯਾਰਕ ਵਿਚ ਸੇਵਾਵਾਂ ਦੇ ਚੁੱਕੀ ਹੈ। ਇਸ ਤੋਂ ਇਲਾਵਾ ਉਹ ਵਿਦੇਸ਼ ਮੰਤਰਾਲਾ ਦੇ ਦਿੱਲੀ ਸਥਿਤ ਦਫਤਰ ਵਿਚ ਇਨਵੈਸਟਮੈਂਟ ਅਤੇ ਟਰੇਡ ਪ੍ਰਮੋਸ਼ਨ ਵਿਭਾਗ ਵਿਚ ਵੀ ਤਾਇਨਾਤ ਰਹਿ ਚੁੱਕੀ ਹੈ। ਉਹ 2011 ਤੋਂ ਲੈ ਕੇ 2014 ਤਕ ਜੈਨੇਵਾ ’ਚ ਵਿਸ਼ਵ ਵਪਾਰ ਸੰਗਠਨ 'ਚ ਸਥਾਈ ਉਪ ਪ੍ਰਤੀਨਿਧ ਦੇ ਤੌਰ 'ਤੇ ਵੀ ਸੇਵਾਵਾਂ ਦੇ ਚੁੱਕੀ ਹੈ।

ਵਪਾਰ ’ਤੇ ਹੋਵੇਗਾ ਫੋਕਸ

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸੰਭਾਵਿਤ ਦੌਰੇ ਤੋਂ ਪਹਿਲਾਂ ਦੋਵਾਂ ਧਿਰਾਂ ਨੇ ਦੌਰੇ ਦੀ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ। ਟਰੰਪ ਦੇ ਦੌਰੇ ਦੀਆਂ ਤਰੀਕਾਂ ਨੂੰ ਅੰਤਿਮ ਰੂਪ ਦੇਣ ਦਾ ਕੰਮ ਚੱਲ ਰਿਹਾ ਹੈ। ਉਥੇ ਭਾਰਤ ਵਲੋਂ ਵੀ ਅਮਰੀਕੀ ਰਾਸ਼ਟਰਪਤੀ ਦੀ ਮੇਜ਼ਬਾਨੀ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਦੋਵਾਂ ਧਿਰਾਂ ਦਰਮਿਆਨ ਦੋ-ਪੱਖੀ ਵਪਾਰ ਤੋਂ ਇਲਾਵਾ ਅੱਤਵਾਦ, ਅੰਦਰੂਨੀ ਸੁਰੱਖਿਆ, ਵਾਤਾਵਰਣ ਸਿੱਖਿਆ, ਸਿਹਤ, ਸਾਇੰਸ ਅਤੇ ਸਪੇਸ ਸਮੇਤ ਹੋਰ ਮੁੱਦਿਆਂ ’ਤੇ ਗੱਲਬਾਤ ਹੋ ਸਕਦੀ ਹੈ। ਸਾਬਕਾ ਅਮਰੀਕੀ ਰਾਸ਼ਟਰਪਤੀ ਬਰਾਕ ਓਬਾਮਾ ਦੇ ਜਨਵਰੀ 2015 ਵਿਚ ਹੋਏ ਭਾਰਤ ਦੌਰੇ ਤੋਂ ਬਾਅਦ ਦੋਵਾਂ ਧਿਰਾਂ ਵਿਚ ਚੀਫ ਸਕੱਤਰ ਪੱਧਰ ਅਤੇ ਮੰਤਰੀ ਪੱਧਰ 'ਤੇ 50 ਵਾਰ ਗੱਲ ਹੋਈ ਹੈ ਪਰ ਪਿਛਲੇ ਸਾਲ ਦੋਵੇਂ ਧਿਰਾਂ ਦਰਮਿਆਨ ਦੋਵਾਂ ਦੇਸ਼ਾਂ ਨੇ ਇਕ-ਦੂਜੇ ਦੇ ਉਤਪਾਦਾਂ ’ਤੇ ਡਿਊਟੀ ਥੋਪ ਦਿੱਤੀ ਸੀ। ਹੁਣ ਟਰੰਪ ਦੇ ਦੌਰੇ ਦੌਰਾਨ ਇਸ ਤਲਖੀ ਨੂੰ ਖਤਮ ਕਰ ਕੇ ਵਪਾਰ ਵਧਾਉਣ 'ਤੇ ਫੋਕਸ ਰਹੇਗਾ ਅਤੇ ਇਸ ਮੁੱਦੇ ’ਤੇ ਦੁਬਾਰਾ ਗੱਲਬਾਤ ਹੋ ਸਕਦੀ ਹੈ। ਇਸ ਗੱਲਬਾਤ ਦੀ ਜ਼ਮੀਨ ਤਿਆਰ ਕਰਨ ਵਿਚ ਵੀ ਸੰਧੂ ਅਹਿਮ ਭੂਮਿਕਾ ਨਿਭਾ ਸਕਦੇ ਹਨ।

ਸ਼੍ਰੀਲੰਕਾ ਨੂੰ ਫਿਰ ਭਾਰਤ ਦੇ ਕਰੀਬ ਲਿਆਏ ਸੰਧੂ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੇ ਸ਼੍ਰੀਲੰਕਾ ਦੇ ਨਵੇਂ ਰਾਸ਼ਟਰਪਤੀ ਰਾਜਪਕਸ਼ੇ ਗੋਟਾਬਾਯਾ ਦਰਮਿਆਨ ਨਵੇਂ ਰਿਸ਼ਤੇ ਬਣਾਉਣ ਵਿਚ ਉਨ੍ਹਾਂ ਦਾ ਅਹਿਮ ਯੋਗਦਾਨ ਸੀ। ਦੋਵਾਂ ਦੇਸ਼ਾਂ ਵਿਚਾਲੇ ਪਿਛਲੇ ਕੁਝ ਸਾਲਾਂ ਵਿਚ ਕਾਫੀ ਉਤਾਰ-ਚੜ੍ਹਾਅ ਦੇਖਣ ਨੂੰ ਮਿਲਿਆ ਸੀ ਪਰ ਸੰਧੂ ਨੇ ਆਪਣੀ ਕੂਟਨੀਤਕ ਸੂਝਬੂਝ ਦਾ ਸਬੂਤ ਦਿੰਦੇ ਹੋਏ ਨਾ ਸਿਰਫ ਚੀਨ ਦੇ ਪਾਲੇ ਵਿਚ ਝੁਕ ਰਹੇ ਸ਼੍ਰੀਲੰਕਾ ਦੇ ਰਾਸ਼ਟਰਪਤੀ ਰਾਜਪਕਸ਼ੇ ਨੂੰ ਭਾਰਤ ਦੇ ਕਰੀਬ ਲਿਆਉਣ ਦਾ ਕੰਮ ਕੀਤਾ ਸਗੋਂ ਦੋਵਾਂ ਦੇਸ਼ਾਂ ਦੇ ਦਰਮਿਆਨ ਸਬੰਧਾਂ ਵਿਚ ਚੱਲ ਰਹੇ ਤਣਾਅ ਨੂੰ ਖਤਮ ਕਰ ਕੇ ਇਕ ਨਵੇਂ ਅਧਿਆਏ ਦੀ ਸ਼ੁਰੂਆਤ ਵੀ ਕੀਤੀ। ਸ਼੍ਰੀਲੰਕਾ ਵਿਚ ਚੀਨ ਵਲੋਂ ਕੀਤੇ ਜਾ ਰਹੇ ਨਿਵੇਸ਼ ਕਾਰਣ ਸ਼੍ਰੀਲੰਕਾ ਲਗਾਤਾਰ ਚੀਨ ਵੱਲ ਝੁਕ ਰਿਹਾ ਸੀ ਅਤੇ ਇਹ ਸਿਆਸੀ ਤੌਰ 'ਤੇ ਭਾਰਤ ਦੇ ਲਈ ਚਿੰਤਾਜਨਕ ਸਥਿਤੀ ਹੈ ਪਰ ਸੰਧੂ ਦੇ ਤਜਰਬੇ ਅਤੇ ਯਤਨਾਂ ਨਾਲ ਗੁਆਂਢੀ ਸ਼੍ਰੀਲੰਕਾ ਤੇ ਭਾਰਤ ਦੇ ਰਿਸ਼ਤੇ ਸੁਧਰੇ ਹਨ।

ਅਮਰੀਕੀ ਸਿੱਖਾਂ ਲਈ ਵੀ ਮਾਣ ਦੀ ਗੱਲ

ਸੰਧੂ ਦੀ ਅਮਰੀਕਾ ’ਚ ਭਾਰਤੀ ਰਾਜਦੂਤ ਦੇ ਤੌਰ ’ਤੇ ਨਿਯੁਕਤੀ ਨੂੰ ਨਾ ਸਿਰਫ ਭਾਰਤ ਤੇ ਅਮਰੀਕਾ ਦੇ ਸਬੰਧਾਂ ਲਈ ਅਹਿਮ ਮੰਨਿਆ ਜਾ ਰਿਹਾ ਹੈ ਸਗੋਂ ਅਮਰੀਕਾ ਵਿਚ ਵਸਣ ਵਾਲੇ ਸਿੱਖਾਂ ਦੇ ਨਾਲ ਸਬੰਧਾਂ ਦੇ ਲਿਹਾਜ ਤੋਂ ਵੀ ਉਨ੍ਹਾਂ ਦੀ ਨਿਯੁਕਤੀ ਅਹਿਮ ਮੰਨੀ ਜਾ ਰਹੀ ਹੈ। ਅਮਰੀਕਾ ਵਿਚ ਕਰੀਬ 5 ਲੱਖ ਸਿੱਖ ਹਨ ਅਤੇ ਇਕ ਸਿੱਖ ਦੀ ਰਾਜਦੂਤ ਦੇ ਤੌਰ 'ਤੇ ਨਿਯੁਕਤੀ ਨਾਲ ਸਿੱਖ ਭਾਈਚਾਰੇ ਦੇ ਲੋਕ ਹੁਣ ਭਾਰਤੀ ਰਾਜਦੂਤ ਦੇ ਨਾਲ ਆਪਣਾਪਨ ਮਹਿਸੂਸ ਕਰਨ ਦੇ ਨਾਲ-ਨਾਲ ਮਾਣ ਵੀ ਮਹਿਸੂਸ ਕਰਨਗੇ। ਅਸਲ ਵਿਚ ਅਮਰੀਕਾ ’ਚ ਵਸੇ ਸਿੱਖ ਕਈ ਕਾਰਣਾਂ ਕਾਰਣ ਭਾਰਤ ਨਾਲ ਨਾਰਾਜ਼ਗੀ ਜ਼ਾਹਰ ਕਰਦੇ ਰਹਿੰਦੇ ਹਨ ਪਰ ਸਾਰੇ ਮਾਮਲਿਆਂ 'ਚ ਭਾਰਤ ਦਾ ਪੱਖ ਮਜ਼ਬੂਤੀ ਨਾਲ ਰੱਖਣ ਲਈ ਤਰਨਜੀਤ ਸਿੰਘ ਸੰਧੂ ਦੀ ਨਿਯੁਕਤੀ ਅਹਿਮੀਅਤ ਰੱਖੇਗੀ।