ਆਫ਼ ਦਿ ਰਿਕਾਰਡ : ਰਾਜਗ ਦੇ ਸਹਿਯੋਗੀ ਆਪਣੀ ਗੱਲ ਕਹਿਣ ਲੱਗੇ ਹਨ

ਰਾਜਗ ਦੇ ਅੰਦਰ ਇਕ ਨਵੀਂ ਬੇਚੈਨੀ ਪੈਦਾ ਹੁੰਦੀ ਦਿਸ ਰਹੀ ਹੈ, ਸਹਿਯੋਗੀ ਪਾਰਟੀਆਂ ਨੇ ਅਜਿਹੇ ਸੰਕੇਤ ਦਿੱਤੇ ਹਨ ਕਿ ਉਹ ਹੁਣ ਭਾਜਪਾ ਦੇ ਮਗਰ-ਮਗਰ ਤੁਰ ਕੇ ਖੁਸ਼ ਨਹੀਂ ਹਨ। ਸਭ ਤੋਂ ਨਵਾਂ ਸੰਕੇਤ ਐੱਨ. ਸੀ. ਪੀ. ਆਈ. ਨੇਤਾ ਸੁਦੀਪ ਬੰਦੋਪਾਧਿਆਏ ਤੋਂ ਆਇਆ, ਜਿਨ੍ਹਾਂ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਰਾਜਗ ਦਾ ਇਕ ਕਨਵੀਨਰ ਨਿਯੁਕਤ ਕਰਨ ਦੀ ਅਪੀਲ ਕੀਤੀ। ਇਸ ਮੰਗ ਨੇ ਰਾਜਨੀਤਕ ਹਲਕਿਆਂ ਨੂੰ ਹੈਰਾਨ ਕਰ ਦਿੱਤਾ ਹੈ ਕਿਉਂਕਿ 2014 ’ਚ ਮੋਦੀ ਦੇ ਸੱਤਾ ’ਚ ਆਉਣ ਤੋਂ ਬਾਅਦ ਤੋਂ ਕਿਸੇ ਵੀ ਸਹਿਯੋਗੀ ਪਾਰਟੀ ਨੇ ਜਨਤਕ ਤੌਰ ’ਤੇ ਅਜਿਹਾ ਕੋਈ ਪ੍ਰਸਤਾਵ ਨਹੀਂ ਦਿੱਤਾ ਹੈ। ਬੰਦੋਪਾਧਿਆਏ ਨੇ ਤਰਕ ਦਿੱਤਾ ਕਿ ਇਕ ਸਮਰਪਿਤ ਕੋਆਰਡੀਨੇਟਰ ਸੰਚਾਰ ਅਤੇ ਗੱਠਜੋੜ ਮੈਨੇਜਮੈਂਟ ਨੂੰ ਬਿਹਤਰ ਬਣਾਏਗਾ, ਖਾਸ ਕਰ ਕੇ ਜਦੋਂ ਸੰਸਦ ਦਾ ਸੈਸ਼ਨ ਨਾ ਹੋਵੇ।

ਖਾਸ ਗੱਲ ਇਹ ਹੈ ਕਿ ਨਾ ਤਾਂ ਭਾਜਪਾ ਅਤੇ ਨਾ ਹੀ ਤੇਦੇਪਾ ਅਤੇ ਜਦ (ਯੂ) ਵਰਗੀਆਂ ਵੱਡੀਆਂ ਸਹਿਯੋਗੀ ਪਾਰਟੀਆਂ ਨੇ ਇਸ ’ਤੇ ਕੋਈ ਟਿੱਪਣੀ ਕੀਤੀ ਹੈ। ਐੱਨ. ਸੀ. ਪੀ. ਆਈ., ਜਿਸ ਦੇ 20 ਲੋਕ ਸਭਾ ਸੰਸਦ ਮੈਂਬਰ ਹਨ ਅਤੇ ਜੋ ਤ੍ਰਿਣਮੂਲ ਕਾਂਗਰਸ ਤੋਂ ਆਏ ਹਨ, ਨੂੰ ਤੇਜ਼ੀ ਨਾਲ ਸਹਿਯੋਗੀਆਂ ਦੇ ਇਕ ਵੱਡੇ ਗਰੁੱਪ ਦਾ ਹਿੱਸਾ ਮੰਨਿਆ ਜਾ ਰਿਹਾ ਹੈ ਜੋ ਆਪਣੀ ਗੱਲ ਜ਼ੋਰਦਾਰ ਢੰਗ ਨਾਲ ਰੱਖਣਾ ਚਾਹੁੰਦਾ ਹੈ। ਇਸ ਦੇ ਸੰਕੇਤ ਦੂਜੀਆਂ ਥਾਵਾਂ ’ਤੇ ਵੀ ਦਿਸ ਰਹੇ ਹਨ। ਜਦ (ਯੂ) ਨੇ ਬਿਹਾਰ ’ਚ ਆਪਣੀ ਖੁਦ ਦੀ ਲਾਲ ਲਕੀਰ ਖਿੱਚਣੀ ਸ਼ੁਰੂ ਕਰ ਦਿੱਤੀ ਹੈ। ਸਮਰਾਟ ਚੌਧਰੀ ਸਰਕਾਰ ਦੇ 550 ਤੋਂ ਜ਼ਿਆਦਾ ਸਕੂਲਾਂ ਨੂੰ ਮਾਡਲ ਇੰਸਟੀਚਿਊਸ਼ਨ ਬਣਾਉਣ, ਉਨ੍ਹਾਂ ਦਾ ਨਾਂ ਬਦਲ ਕੇ ਸਰਸਵਤੀ ਵਿਦਿਆ ਨਿਕੇਤਨ ਕਰਨ ਅਤੇ ਉਨ੍ਹਾਂ ਨੂੰ ਭਗਵਾ ਰੰਗ ’ਚ ਰੰਗਣ ਦੇ ਫੈਸਲੇ ’ਤੇ ਉਸ ਦਾ ਇਤਰਾਜ਼ ਸੋਚ-ਸਮਝ ਕੇ ਚੁੱਕਿਆ ਗਿਆ ਕਦਮ ਸੀ ਪਰ ਸਾਫ਼ ਸੀ। ਜਦ (ਯੂ) ਦੇ ਬੁਲਾਰੇ ਨੀਰਜ ਕੁਮਾਰ ਨੇ ਕਿਹਾ ਕਿ ਸਿੱਖਿਆ ਦਾ ਸਿਰਫ਼ ਇਕ ਹੀ ਰੰਗ ਹੁੰਦਾ ਹੈ, ਜਿਸ ਨਾਲ ਸਿੱਖਿਆ ਦੇ ਰਾਜਨੀਤੀਕਰਨ ’ਤੇ ਬੇਚੈਨੀ ਦਾ ਇਸ਼ਾਰਾ ਮਿਲਿਆ।

ਇਸ ਦੌਰਾਨ, ਤੇਦੇਪਾ ਦੇ ਚੰਦਰਬਾਬੂ ਨਾਇਡੂ ਪਿੱਛੇ ਬੈਠ ਕੇ ਕੰਮ ਕਰਨ ਵਾਲੇ ਬਣੇ ਹੋਏ ਹਨ- ਚੁੱਪਚਾਪ ਗੱਲਬਾਤ ਕਰ ਰਹੇ ਹਨ ਅਤੇ ਨਤੀਜੇ ਪਾ ਰਹੇ ਹਨ। ਭਾਜਪਾ ਦੇ ਸਾਥੀਆਂ ਦੀ ਵਜ੍ਹਾ ਨਾਲ ਹੀ ਐੱਫ. ਸੀ. ਆਰ. ਏ. ਬਿੱਲ ਨੂੰ ਸੰਯੁਕਤ ਸੰਸਦੀ ਕਮੇਟੀ ਕੋਲ ਭੇਜਿਆ ਗਿਆ ਸੀ। ਨਿੱਜੀ ਤੌਰ ’ਤੇ, ਇਹ ਰੁਟੀਨ ਗੱਠਜੋੜ ਦੀ ਰਾਜਨੀਤੀ ਲੱਗ ਸਕਦੀ ਹੈ ਪਰ ਸਮੁੱਚੇ ਤੌਰ ’ਤੇ, ਇਹ ਕੁਝ ਵੱਡੀ ਗੱਲ ਦੱਸਦੇ ਹਨ : ਰਾਜਗ ਦੇ ਸਾਥੀ ਆਪਣੀ ਗੱਲ ਕਹਿਣ ਲੱਗੇ ਹਨ ਅਤੇ ਭਾਜਪਾ ਨੂੰ ਚੁੱਪਚਾਪ ਨੋਟਿਸ ਦਿੱਤਾ ਜਾ ਰਿਹਾ ਹੈ।