ਦੇਸ਼ ਦਾ ਦੂਜਾ ਸਭ ਤੋਂ ਮਹਿੰਗਾ ਤਲਾਕ, ਪਤਨੀ ਨੂੰ 200 ਕਰੋੜ ਰੁਪਏ ਦੇਣਗੇ ਰਾਜੀਵ ਮੋਦੀ

ਅਹਿਮਦਾਬਾਦ(ਏਜੰਸੀ)— ਗੁਜਰਾਤ ਦੀ ਰਾਜਧਾਨੀ ਅਹਿਮਦਾਬਾਦ ਦੀ ਇਕ ਫੈਮਿਲੀ ਕੋਰਟ ਨੇ ਇਥੇ ਸਥਿਤ ਦੇਸ਼ ਦੀ ਅਗਾਂਹਵਧੂ ਦਵਾਈ ਨਿਰਮਾਤਾ ਕੰਪਨੀ ਕੈਡਿਲਾ ਫਾਰਮਾਸਿਊਟੀਕਲਜ਼ ਦੇ ਮੁਖੀ ਅਤੇ ਸਹਿ-ਪ੍ਰਬੰਧ ਨਿਰਦੇਸ਼ਕ ਰਾਜੀਵ ਮੋਦੀ ਅਤੇ ਮੁੰਬਈ ਦੇ ਗਰਵਾਰੇ ਪੋਲੀਐਸਟਰ ਲਿਮਟਿਡ ਦੇ ਮਾਲਕ ਦੀ ਬੇਟੀ ਮੋਨਿਕਾ ਦਰਮਿਆਨ ਮਹਿੰਗੇ ਤਲਾਕ ਦੀ ਅਰਜ਼ੀ ਨੂੰ ਮੰਗਲਵਾਰ ਆਪਣੀ ਪ੍ਰਵਾਨਗੀ ਦੇ ਦਿੱਤੀ। 
ਦੇਸ਼ ਵਿਚ ਸਭ ਤੋਂ ਵੱਡੀ ਤਲਾਕ ਵਾਲੀ ਰਕਮ ਦਾ ਇਹ ਦੂਜਾ ਮਾਮਲਾ ਹੈ। ਇਸ ਤੋਂ ਪਹਿਲਾਂ ਮਹਾਰਾਸ਼ਟਰ ਵਿਚ ਫਿਲਮ ਅਭਿਨੇਤਾ ਰਿਤਿਕ ਰੋਸ਼ਨ ਨੇ ਸੁਜ਼ੈਨ ਖਾਨ ਨੂੰ 400 ਕਰੋੜ ਰੁਪਏ ਦਿੱਤੇ ਸਨ। ਦੱਸਿਆ ਜਾਂਦਾ ਹੈ ਕਿ ਰਾਜੀਵ ਨੇ ਤਲਾਕ ਲਈ ਆਪਣੀ ਪਤਨੀ ਨੂੰ ਲਗਭਗ 200 ਕਰੋੜ ਰੁਪਏ ਦਾ ਮੁਆਵਜ਼ਾ ਦੇਣ ਬਾਰੇ ਸਹਿਮਤੀ ਪ੍ਰਗਟਾਈ ਹੈ।
ਦੋਵਾਂ ਦੇ ਰਿਸ਼ਤਿਆਂ ’ਚ ਕੁੜੱਤਣ ਇਸ ਸਾਲ 30 ਅਗਸਤ ਨੂੰ ਉਦੋਂ ਜਨਤਕ ਹੋਈ ਸੀ ਜਦੋਂ ਮੋਨਿਕਾ ਨੇ ਆਪਣੇ ਪਤੀ ’ਤੇ ਤੰਗ ਪ੍ਰੇਸ਼ਾਨ ਕਰਨ ਦਾ ਦੋਸ਼ ਲਾਉਂਦੇ ਹੋਏ ਪੁਲਸ ਕੋਲ ਰਿਪੋਰਟ ਕੀਤੀ ਸੀ। ਕਈ ਘੰਟਿਆਂ ਤੱਕ ਥਾਣੇ ਵਿਚ ਸਮਝੌਤੇ ਪਿੱਛੋਂ ਮਾਮਲਾ ਠੰਡਾ ਹੋਇਆ ਸੀ। ਉਸ ਤੋਂ ਬਾਅਦ ਦੋਵਾਂ ਨੇ ਆਪਸੀ ਸਹਿਮਤੀ ਨਾਲ ਵੱਖਵਾਦ ਦਾ ਰਾਹ ਚੁਣਿਆ।
1992 ਵਿਚ ਹੋਇਆ ਸੀ ਵਿਆਹ—
ਦੋਵਾਂ ਨੇ 26 ਸਾਲ ਪਹਿਲਾਂ 1992 ਵਿਚ ਵਿਆਹ ਕਰਵਾਇਆ ਸੀ। ਆਪਸੀ ਸਹਿਮਤੀ ਨਾਲ ਤਲਾਕ ਦੀ ਅਰਜ਼ੀ ਇਸੇ ਮਹੀਨੇ ਦਿੱਤੀ ਸੀ। ਉਨ੍ਹਾਂ ਦਾ 17 ਸਾਲ ਦਾ ਇਕ ਬੇਟਾ ਵੀ ਹੈ। ਸਮਝੌਤੇ ਮੁਤਾਬਕ ਉਹ ਪਿਤਾ ਕੋਲ ਰਹੇਗਾ।