ਜਿੰਨੀਆਂ ਸੀਟਾਂ, ਓਨੀਆਂ ਹੀ ਟਿਕਟਾਂ; ਯਾਤਰੀਆਂ ਦੀ ਸਹੂਲਤ ਲਈ ਰੇਲਵੇ ਦੀ ਵੱਡੀ ਤਿਆਰੀ

ਨੈਸ਼ਨਲ ਡੈਸਕ - ਭਾਰਤੀ ਰੇਲਵੇ ਯਾਤਰੀਆਂ ਨੂੰ ਬਿਹਤਰ ਸਹੂਲਤਾਂ ਦੇਣ ਲਈ ਹਰ ਸੰਭਵ ਕੋਸ਼ਿਸ਼ ਕਰ ਰਿਹਾ ਹੈ। ਰੇਲ ਗੱਡੀਆਂ 'ਚ ਵੇਟਿੰਗ ਟਿਕਟਾਂ ਨਾਲ ਸਫਰ ਕਰਨ ਵਾਲੇ ਯਾਤਰੀਆਂ ਨੂੰ ਕੰਟਰੋਲ ਕਰਨ ਲਈ ਰੇਲਵੇ ਇਕ ਵੱਡੀ ਯੋਜਨਾ ਬਣਾ ਰਿਹਾ ਹੈ। ਕੇਂਦਰੀ ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਸੰਸਦ 'ਚ ਰੇਲਵੇ ਨਾਲ ਜੁੜੇ ਸਵਾਲਾਂ ਦੇ ਜਵਾਬ 'ਚ ਕਈ ਅਹਿਮ ਜਾਣਕਾਰੀਆਂ ਸਾਂਝੀਆਂ ਕੀਤੀਆਂ। ਰੇਲ ਮੰਤਰੀ ਨੇ ਕਿਹਾ ਕਿ ਟ੍ਰੇਨਾਂ 'ਚ ਯਾਤਰੀਆਂ ਦੀ ਸਹੂਲਤ ਨੂੰ ਧਿਆਨ 'ਚ ਰੱਖਦੇ ਹੋਏ ਸੀਟ ਦੇ ਹਿਸਾਬ ਨਾਲ ਟਿਕਟਾਂ ਜਾਰੀ ਕੀਤੀਆਂ ਜਾਣਗੀਆਂ। ਅਸ਼ਵਨੀ ਵੈਸ਼ਨਵ ਨੇ ਕਿਹਾ ਕਿ ਰੇਲਵੇ ਸਿਰਫ ਓਨੀਆਂ ਹੀ ਟਿਕਟਾਂ ਜਾਰੀ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਜਿੰਨੀਆਂ ਟ੍ਰੇਨਾਂ ਵਿੱਚ ਸੀਟਾਂ ਉਪਲਬਧ ਹਨ। ਤਾਂ ਜੋ ਰੇਲਗੱਡੀ ਵਿੱਚ ਕੰਫਰਮ ਸੀਟਾਂ ਨਾਲ ਸਫਰ ਕਰਨ ਵਾਲੇ ਯਾਤਰੀਆਂ ਨੂੰ ਵੇਟਿੰਗ ਟਿਕਟਾਂ ਵਾਲੇ ਯਾਤਰੀਆਂ ਕਾਰਨ ਅਸੁਵਿਧਾ ਦਾ ਸਾਹਮਣਾ ਨਾ ਕਰਨਾ ਪਵੇ।

ਮੋਦੀ ਸਰਕਾਰ ਦੇ ਕਾਰਜਕਾਲ ਦੌਰਾਨ ਬਣਾਈਆਂ 460 ਕਿਲੋਮੀਟਰ ਨਵੀਆਂ ਸੁਰੰਗਾਂ
ਇਸ ਦੇ ਨਾਲ ਹੀ ਰੇਲ ਮੰਤਰੀ ਨੇ ਰੇਲਵੇ ਦੀਆਂ ਕਈ ਵੱਡੀਆਂ ਅਤੇ ਅਹਿਮ ਪ੍ਰਾਪਤੀਆਂ ਬਾਰੇ ਵੀ ਜਾਣਕਾਰੀ ਦਿੱਤੀ। ਅਸ਼ਵਿਨੀ ਵੈਸ਼ਨਵ ਨੇ ਦੱਸਿਆ ਕਿ ਆਜ਼ਾਦੀ ਤੋਂ ਬਾਅਦ 2014 ਤੱਕ ਭਾਰਤ ਦੇ ਰੇਲ ਨੈੱਟਵਰਕ 'ਚ ਕੁੱਲ 125 ਕਿਲੋਮੀਟਰ ਸੁਰੰਗਾਂ ਬਣੀਆਂ ਸਨ, ਜਦੋਂ ਕਿ 2014 ਤੋਂ ਲੈ ਕੇ ਅੱਜ ਤੱਕ 460 ਕਿਲੋਮੀਟਰ ਨਵੀਆਂ ਸੁਰੰਗਾਂ ਬਣਾਈਆਂ ਗਈਆਂ ਹਨ। ਉਨ੍ਹਾਂ ਕਿਹਾ ਕਿ ਅੱਜ ਭਾਰਤੀ ਰੇਲਵੇ ਦੇ ਫਲੀਟ ਵਿੱਚ 56 ਹਜ਼ਾਰ ਜਨਰਲ ਅਤੇ ਸਲੀਪਰ ਕੋਚ ਹਨ ਜਦਕਿ ਏਸੀ ਕੋਚਾਂ ਦੀ ਗਿਣਤੀ 23 ਹਜ਼ਾਰ ਹੈ। ਰੇਲ ਮੰਤਰੀ ਨੇ ਕਿਹਾ ਕਿ ਕੋਲਕਾਤਾ ਮੈਟਰੋ ਰੇਲ ਪ੍ਰੋਜੈਕਟ ਵਿੱਚ ਇਤਿਹਾਸਕ ਕੰਮ ਕੀਤਾ ਗਿਆ ਹੈ। ਇਹ ਸਾਲ 1972 ਵਿੱਚ ਸ਼ੁਰੂ ਹੋਇਆ ਸੀ ਅਤੇ 2014 ਤੱਕ ਯਾਨੀ 42 ਸਾਲਾਂ ਵਿੱਚ ਕੁੱਲ 28 ਕਿਲੋਮੀਟਰ ਦਾ ਕੰਮ ਹੋਇਆ ਸੀ। ਜਦੋਂ ਕਿ 2014 ਵਿੱਚ ਕੇਂਦਰ ਵਿੱਚ ਮੋਦੀ ਸਰਕਾਰ ਆਉਣ ਤੋਂ ਬਾਅਦ 10 ਸਾਲਾਂ ਵਿੱਚ ਕੋਲਕਾਤਾ ਮੈਟਰੋ ਵਿੱਚ 38 ਕਿਲੋਮੀਟਰ ਦਾ ਕੰਮ ਹੋਇਆ ਹੈ।

ਸੁਰੱਖਿਆ 'ਤੇ ਰੇਲਵੇ ਦਾ ਵਿਸ਼ੇਸ਼ ਧਿਆਨ
ਅਸ਼ਵਨੀ ਵੈਸ਼ਨਵ ਨੇ ਲੋਕ ਸਭਾ 'ਚ ਦੱਸਿਆ ਕਿ ਰੇਲਵੇ ਸੁਰੱਖਿਆ 'ਤੇ ਬਹੁਤ ਧਿਆਨ ਦਿੱਤਾ ਜਾ ਰਿਹਾ ਹੈ। ਕਈ ਤਕਨੀਕੀ ਬਦਲਾਅ ਕੀਤੇ ਗਏ ਹਨ। ਭਾਰਤੀ ਰੇਲਵੇ ਲੰਬੀ ਰੇਲ, ਇਲੈਕਟ੍ਰਾਨਿਕ ਇੰਟਰਲਾਕਿੰਗ, ਧੁੰਦ ਸੁਰੱਖਿਆ ਉਪਕਰਨਾਂ ਅਤੇ ਹੋਰ ਬਹੁਤ ਸਾਰੇ ਵੱਡੇ ਕਦਮ ਚੁੱਕ ਕੇ ਲਗਾਤਾਰ ਸੁਧਾਰ ਕਰ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਭਾਰਤ ਰੇਲਵੇ ਦਾ ਵੱਡਾ ਬਰਾਮਦਕਾਰ ਬਣ ਗਿਆ ਹੈ। ਆਸਟ੍ਰੇਲੀਆ ਨੂੰ ਮੈਟਰੋ ਕੋਚ ਨਿਰਯਾਤ ਕਰਨ ਤੋਂ ਇਲਾਵਾ, ਸਾਡਾ ਦੇਸ਼ ਯੂਨਾਈਟਿਡ ਕਿੰਗਡਮ, ਸਾਊਦੀ ਅਰਬ ਅਤੇ ਫਰਾਂਸ ਨੂੰ ਰੇਲ ਕੋਚ ਅਤੇ ਮੈਕਸੀਕੋ, ਸਪੇਨ, ਜਰਮਨੀ, ਇਟਲੀ ਨੂੰ ਸੰਚਾਲਨ ਉਪਕਰਣ ਨਿਰਯਾਤ ਕਰ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਜਲਦੀ ਹੀ ਬਿਹਾਰ ਦੇ ਲੋਕੋਮੋਟਿਵ ਅਤੇ ਤਾਮਿਲਨਾਡੂ ਵਿੱਚ ਬਣੇ ਪਹੀਏ ਪੂਰੀ ਦੁਨੀਆ ਵਿੱਚ ਚੱਲਣਗੇ।