PM ਮੋਦੀ ਨੇ ਸਿੰਦਰੀ ਖਾਦ ਪਲਾਂਟ ਦਾ ਕੀਤਾ ਉਦਘਾਟਨ, ਝਾਰਖੰਡ ਵਾਸੀਆਂ ਨੂੰ ਦਿੱਤੀ 35,700 ਕਰੋੜ ਦੀ ਸੌਗਾਤ
Friday, Mar 01, 2024 - 01:16 PM (IST)
ਧਨਬਾਦ- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸ਼ੁੱਕਰਵਾਰ ਨੂੰ ਝਾਰਖੰਡ ਵਿੱਚ 35,700 ਕਰੋੜ ਰੁਪਏ ਦੇ ਕਈ ਪ੍ਰੋਜੈਕਟਾਂ ਦਾ ਉਦਘਾਟਨ ਅਤੇ ਨੀਂਹ ਪੱਥਰ ਰੱਖਿਆ। ਪ੍ਰਧਾਨ ਮੰਤਰੀ ਨੇ ਧਨਬਾਦ ਜ਼ਿਲ੍ਹੇ ਦੇ ਸਿੰਦਰੀ ਵਿਖੇ ਸਥਿਤ ਹਿੰਦੁਸਤਾਨ ਫਰਟੀਲਾਈਜ਼ਰਜ਼ ਐਂਡ ਕੈਮੀਕਲਜ਼ ਲਿਮਟਿਡ (ਐਚਯੂਆਰਐਲ) ਦਾ 8,900 ਕਰੋੜ ਰੁਪਏ ਤੋਂ ਵੱਧ ਦੀ ਲਾਗਤ ਨਾਲ ਵਿਕਸਤ ਖਾਦ ਪਲਾਂਟ ਨੂੰ ਰਾਸ਼ਟਰ ਨੂੰ ਸਮਰਪਿਤ ਕੀਤਾ। ਇਹ ਪਲਾਂਟ ਦੇਸ਼ ਵਿੱਚ ਦੇਸੀ ਯੂਰੀਆ ਉਤਪਾਦਨ ਵਿੱਚ ਪ੍ਰਤੀ ਸਾਲ ਲਗਭਗ 12.7 ਐੱਲ.ਐੱਮ.ਟੀ. (ਲੱਖ ਮੀਟ੍ਰਿਕ ਟਨ) ਦਾ ਵਾਧਾ ਕਰੇਗਾ ਜਿਸਦਾ ਦੇਸ਼ ਦੇ ਕਿਸਾਨਾਂ ਨੂੰ ਫਾਇਦਾ ਹੋਵੇਗਾ। ਗੋਰਖਪੁਰ ਅਤੇ ਰਾਮਾਗੁੰਡਮ ਵਿਖੇ ਖਾਦ ਪਲਾਂਟਾਂ ਦੀ ਤਬਦੀਲੀ ਤੋਂ ਬਾਅਦ ਦੇਸ਼ ਵਿੱਚ ਮੁੜ ਚਾਲੂ ਹੋਣ ਵਾਲਾ ਇਹ ਤੀਜਾ ਖਾਦ ਪਲਾਂਟ ਹੈ।
ਪ੍ਰਧਾਨ ਮੰਤਰੀ ਨੇ ਦਸੰਬਰ 2021 ਅਤੇ ਨਵੰਬਰ 2022 ਵਿੱਚ ਕ੍ਰਮਵਾਰ ਗੋਰਖਪੁਰ ਅਤੇ ਰਾਮਗੁੰਡਮ ਵਿੱਚ ਖਾਦ ਪਲਾਂਟ ਰਾਸ਼ਟਰ ਨੂੰ ਸਮਰਪਿਤ ਕੀਤੇ ਸਨ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਭਾਰਤ ਵਿੱਚ ਯੂਰੀਆ ਦਾ ਉਤਪਾਦਨ 2014 ਵਿੱਚ 225 ਲੱਖ ਟਨ ਤੋਂ ਵਧ ਕੇ ਹੁਣ 310 ਲੱਖ ਟਨ ਹੋ ਗਿਆ ਹੈ, ਜੋ ਖਾਦ ਖੇਤਰ ਵਿੱਚ ਸਵੈ-ਨਿਰਭਰਤਾ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ।
ਪੀ.ਐੱਮ. ਮੋਦੀ ਨੇ ਝਾਰਖੰਡ ਵਿੱਚ 26,000 ਕਰੋੜ ਰੁਪਏ ਤੋਂ ਵੱਧ ਦੇ ਰੇਲ, ਬਿਜਲੀ ਅਤੇ ਕੋਲੇ ਦੇ ਪ੍ਰੋਜੈਕਟ ਵੀ ਲਾਂਚ ਕੀਤੇ। ਉਨ੍ਹਾਂ ਕਿਹਾ ਕਿ ਝਾਰਖੰਡ ਨੂੰ 35 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਦੇ ਪ੍ਰੋਜੈਕਟਾਂ ਦੀ ਸੌਗਾਤ ਮਿਲੀ ਹੈ। ਸਿੰਦਰੀ ਖਾਦ ਪਲਾਂਟ ਨੂੰ ਮੁੜ ਸੁਰਜੀਤ ਕਰਨ ਦੀ ਮੋਦੀ ਦੀ ਗਰੰਟੀ ਅੱਜ ਪੂਰੀ ਹੋ ਗਈ। ਇਸ ਪਲਾਂਟ ਦੇ ਰਾਸ਼ਟਰ ਨੂੰ ਸਮਰਪਿਤ ਹੋਣ ਨਾਲ ਭਾਰਤ ਯੂਰੀਆ ਵਿੱਚ ਆਤਮਨਿਰਭਰ ਹੋ ਜਾਵੇਗਾ।
