ਰਾਸ਼ਟਰੀ ਗੀਤ ''ਚ ਕੀਤਾ ਜਾਵੇ ਬਦਲਾਵ, ਕਾਂਗਰਸ ਸੰਸਦ ਮੈਂਬਰ ਨੇ ਕੀਤੀ ਮੰਗ

ਨਵੀਂ ਦਿੱਲੀ— ਅਸਮ 'ਚ ਕਾਂਗਰਸ ਸੰਸਦ ਮੈਂਬਰ ਰਿਪੁਨ ਬੋਰਾ ਨੇ ਸ਼ੁੱਕਰਵਾਰ ਨੂੰ ਰਾਜਸਭਾ 'ਚ ਰਾਸ਼ਟਰੀ ਗੀਤ 'ਚ ਬਦਲਾਵ ਨੂੰ ਲੈ ਕੇ ਇਕ ਸੋਧ ਦੀ ਮੰਗ ਕੀਤੀ ਹੈ। ਇਸ ਲਈ ਉਨ੍ਹਾਂ ਨੇ ਇਕ ਪ੍ਰਸਤਾਵ ਵੀ ਪੇਸ਼ ਕੀਤਾ ਹੈ। ਜਿਸ 'ਚ ਉਨ੍ਹਾਂ ਨੇ ਕਿਹਾ ਕਿ ਰਾਸ਼ਟਰੀ ਗੀਤ 'ਚੋਂ 'ਸਿੰਧ' ਸ਼ਬਦ ਹਟਾ ਕੇ 'ਨਾਰਥ ਈਸਟ' ਦਾ ਇਸਤੇਮਾਲ ਕੀਤਾ ਜਾਵੇ। ਉਨ੍ਹਾ ਕਿਹਾ ਕਿ ਇਹ ਸ਼ਬਦ ਭਾਰਤ ਦੇ ਪੂਰਵ ਉਤਰ ਇਲਾਕੇ 'ਚ ਸਥਿਤ ਸੂਬਿਆਂ ਦਾ ਜ਼ਿਕਰ ਕਰੇਗਾ। ਉਨ੍ਹਾਂ ਨੇ ਇਹ ਵੀ ਲਿਖਿਆ ਕਿ ਨਾਰਥ ਈਸਟ ਭਾਰਤ ਦਾ ਅਭਿੰਨ ਅੰਗ ਹੈ ਪਰ ਰਾਸ਼ਟਰੀ ਗੀਤ 'ਚ ਇਸ ਸੂਬੇ ਦਾ ਕੋਈ ਜ਼ਿਕਰ ਨਹੀਂ ਹੈ। ਰਿਪੁਨ ਨੇ ਅੱਗੇ ਕਿਹਾ ਕਿ 'ਸਿੰਧ' ਸ਼ਬਦ ਇਕ ਅਜਿਹੇ ਸੂਬੇ ਦਾ ਹਵਾਲਾ ਦਿੰਦਾ ਹੈ, ਜੋ ਸਾਲ 1947 'ਚ ਭਾਰਤ ਦੀ ਵੰਡ ਤੋਂ ਬਾਅਦ ਪਾਕਿਸਤਾਨ ਦਾ ਹਿੱਸਾ ਬਣ ਗਿਆ ਹੈ।
ਆਪਣੀ ਗੱਲ ਨੂੰ ਆਧਾਰ ਦੇਣ ਲਈ ਉਨ੍ਹਾਂ ਨੇ ਇਹ ਵੀ ਲਿਖਿਆ ਕਿ 24 ਜਨਵਰੀ 1950 ਨੂੰ ਦੇਸ਼ ਦੇ ਪਹਿਲੇ ਰਾਸ਼ਟਰਪਤੀ ਰਾਜਿੰਦਰ ਪ੍ਰਸਾਦ ਨੇ ਸੰਵਿਧਾਨ ਸਭਾ 'ਚ ਕਿਹਾ ਸੀ ਕਿ ਜੇਕਰ ਸਰਕਾਰ ਚਾਹੇ ਤਾਂ ਰਾਸ਼ਟਰੀ ਗੀਤ 'ਚ ਬਦਲਾਵ ਕਰ ਸਕਦੀ ਹੈ।
ਸ਼ਿਵ ਸੈਨਾ ਨੇ ਵੀ ਕੀਤੀ ਸੀ ਇਹ ਮੰਗ
ਇਸ ਤੋਂ ਪਹਿਲਾਂ ਇਸੇ ਤਰ੍ਹਾਂ ਦੀ ਮੰਗ ਮਾਰਚ 2016 'ਚ ਸ਼ਿਵ ਸੈਨਾ ਦੇ ਸੰਸਦ ਮੈਂਬਰ ਅਰਵਿੰਦ ਸਾਵੰਤ ਨੇ ਚੁੱਕੀ ਸੀ। ਉਨ੍ਹਾਂ ਨੇ ਵੀ 'ਸਿੰਧ'  ਸ਼ਬਦ ਨੂੰ ਰਾਸ਼ਟਰੀ ਗੀਤ 'ਚੋਂ ਹਟਾਉਣ ਦੀ ਮੰਗ ਕੀਤੀ ਸੀ ਕਿਉਂਕਿ ਹੁਣ ਪ੍ਰਾਂਤ ਪਾਕਿਸਤਾਨ ਦਾ ਹਿੱਸਾ ਹੈ।
ਜ਼ਿਕਰਯੋਗ ਹੈ ਕਿ 1911 'ਚ ਨੋਬਲ ਪੁਰਸਕਾਰ ਜੇਤੂ ਰਵਿੰਦਰ ਨਾਥ ਟੈਗੋਰ ਨੇ ਰਾਸ਼ਟਰੀ ਗੀਤ 'ਜਨ ਗਣ ਮਨ' ਲਿਖਿਆ ਸੀ। ਉਸ ਸਮੇਂ ਭਾਰਤ ਦੀ ਵੰਡ ਨਹੀਂ ਹੋਈ ਸੀ ਅਤੇ ਭਾਰਤ ਪੱਛਮ 'ਚ ਬਲੂਚਿਸਤਾਨ ਤੋਂ ਲੈ ਕੇ ਸਾਬਕਾ 'ਚ ਸਿਲਹਟ ਤਕ ਫੈਲਿਆ ਸੀ। ਭਾਰਤ ਅਤੇ ਪਾਕਿਸਤਾਨ ਦੀ 1947 'ਚ ਹੋਈ ਵੰਡ ਤੋਂ ਬਾਅਦ, ਸਿੰਧ, ਬਲੂਚਿਸਤਾਨ, ਖੈਬਰ-ਪਖਤੂਨਖਵਾ ਅਤੇ ਪੰਜਾਬ ਦੇ ਕੁੱਝ ਹਿੱਸੇ ਪਾਕਿਸਤਾਨ 'ਚ ਚੱਲੇ ਗਏ।