ਦੂਜਾ ਵਿਆਹ ਰੁਕਵਾਏ ਜਾਣ ''ਤੇ ਭੜਕੇ ਵਿਅਕਤੀ ਨੇ ਪਤਨੀ ਨੂੰ ਦਿੱਤਾ ਤਿੰਨ ਤਲਾਕ

ਇੰਦੌਰ (ਮੱਧ ਪ੍ਰਦੇਸ਼)- ਨਿਕਾਹ ਦੇ ਸਾਢੇ 4 ਸਾਲ ਬਾਅਦ 'ਤਿੰਨ ਤਲਾਕ' ਦਿੱਤੇ ਜਾਣ ਦਾ ਦੋਸ਼ ਲਗਾਉਂਦੇ ਹੋਏ ਇੱਥੇ 27 ਸਾਲਾ ਇਕ ਜਨਾਨੀ ਨੇ ਆਪਣੇ ਪਤੀ ਵਿਰੁੱਧ ਅਪਰਾਧਕ ਮਾਮਲਾ ਦਰਜ ਕਰਵਾਇਆ ਹੈ। ਸਦਰ ਬਜ਼ਾਰ ਪੁਲਸ ਥਾਣੇ ਦੇ ਇੰਚਾਰਜ ਅਜੇ ਵਰਮਾ ਨੇ ਸੋਮਵਾਰ ਨੂੰ ਦੱਸਿਆ ਕਿ ਇਹ ਸ਼ਿਕਾਇਤ ਸਨਾ ਖਾਨ (27) ਦੀ ਸ਼ਿਕਾਇਤ 'ਤੇ ਉਨ੍ਹਾਂ ਦੇ ਪਤੀ ਜੁਬੈਰ ਖਾਨ ਉਰਫ਼ ਚੀਨੂ ਲਾਲਾ (30) ਵਿਰੁੱਧ 'ਮੁਸਲਿਮ ਮਹਿਲਾ (ਵਿਆਹ ਅਧਿਕਾਰ ਸੁਰੱਖਿਆ) ਐਕਟ 2019' ਅਤੇ ਆਈ.ਪੀ.ਸੀ. ਦੀ ਧਾਰਾ 506 (ਅਪਰਾਧਕ ਧਮਕੀ) ਦੇ ਅਧੀਨ ਦਰਜ ਕੀਤੀ ਗਈ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਖਾਨ, ਗੁਆਂਢ ਦੇ ਦੇਵਾਸ ਜ਼ਿਲ੍ਹੇ ਦੇ ਕੰਨੌਦ ਕਸਬੇ ਦਾ ਰਹਿਣ ਵਾਲਾ ਹੈ ਅਤੇ ਉਸ ਦਾ ਸਨਾ ਨਾਲ 7 ਫਰਵਰੀ 2016 ਨੂੰ ਨਿਕਾਹ ਹੋਇਆ ਸੀ। ਹਾਲਾਂਕਿ ਦਾਜ ਤਸੀਹਿਆਂ ਕਾਰਨ ਜਨਾਨੀ ਆਪਣੇ ਪਤੀ ਤੋਂ ਵੱਖ ਪੇਕੇ ਰਹਿ ਰਹੀ ਹੈ। ਇਸ ਜੋੜੇ ਦੇ ਬੀਮਾਰ ਬੇਟੇ ਦੀ ਕੁਝ ਦਿਨ ਪਹਿਲਾਂ ਹੀ ਇਲਾਜ ਦੌਰਾਨ ਮੌਤ ਹੋਈ ਹੈ। ਥਾਣਾ ਇੰਚਾਰਜ ਅਨੁਸਾਰ ਸਨਾ ਦਾ ਕਹਿਣਾ ਹੈ ਕਿ ਉਸ ਦਾ ਪਤੀ ਹਰਦਾ ਦੀ ਇਕ ਕੁੜੀ ਨਾਲ ਦੂਜਾ ਵਿਆਹ ਕਰਨ ਜਾ ਰਿਹਾ ਹੈ।

ਜਨਾਨੀ ਨੇ ਪੁਲਸ ਥਾਣੇ 'ਚ ਸ਼ਨੀਵਾਰ ਨੂੰ ਰਿਪੋਰਟ ਦਰਜ ਕਰਵਾਈ ਕਿ ਜਦੋਂ ਉਸ ਨੇਖਾਨ ਦੀ ਮੰਗੇਤਰ ਨੂੰ ਉਸ ਦੇ ਪਹਿਲਾਂ ਤੋਂ ਵਿਆਹੁਤਾ ਹੋਣ ਦੀ ਸੱਚਾਈ ਦੱਸਦੇ ਹੋਏ ਇਹ ਵਿਆਹ ਰੁਕਵਾ ਦਿੱਤਾ ਤਾਂ ਇਸ ਤੋਂ ਨਾਰਾਜ਼ ਹੋ ਕੇ ਉਸ ਦੇ ਪਤੀ ਨੇ ਉਸ ਦੇ ਸਾਹਮਣੇ ਤਲਾਕ-ਤਲਾਕ-ਤਲਾਕ ਬੋਲਿਆ ਅਤੇ ਉਸ ਨੂੰ ਧਮਕਾਉਂਦੇ ਹੋਏ ਕਿਹਾ ਕਿ ਹੁਣ ਉਹ ਉਸ ਦੀ ਪਤਨੀ ਨਹੀਂ ਰਹਿ ਗਈ ਹੈ। ਮਾਮਲੇ 'ਚ ਪੁਲਸ ਦੀ ਪੂਰੀ ਜਾਂਚ ਜਾਰੀ ਹੈ। ਦੱਸਣਯੋਗ ਹੈ ਕਿ ਮੁਸਲਿਮ ਮਹਿਲਾ (ਵਿਆਹ ਅਧਿਕਾਰ ਸੁਰੱਖਿਆ ਐਕਟ 2019' ਇਕੱਠੇ ਤਿੰਨ ਵਾਰ ਤਲਾਕ ਬੋਲ ਕੇ ਵਿਆਹੁਤਾ ਸੰਬੰਧ ਖਤਮ ਕਰਨ ਦੀ ਪ੍ਰਥਾ 'ਤੇ ਕਾਨੂੰਨੀ ਰੋਕ ਲਗਾਉਂਦਾ ਹੈ। ਇਸ ਕਾਨੂੰਨ 'ਚ ਦੋਸ਼ੀ ਲਈ ਤਿੰਨ ਸਾਲ ਤੱਕ ਦੀ ਜੇਲ ਦਾ ਪ੍ਰਬੰਧ ਹੈ।