''ਇਸ ਨੇ ਮੈਨੂੰ ਧੋਖਾ ਦਿੱਤਾ...'', ਘਰਵਾਲੀ ਦੀ ਲਾਸ਼ ਨਾਲ ਸੈਲਫੀ ਲੈ ਕੇ ਇੰਟਰਨੈੱਟ ''ਤੇ ਕਰ''ਤੀ ਵਾਇਰਲ
Monday, Dec 01, 2025 - 04:02 PM (IST)
ਵੈੱਬ ਡੈਸਕ : ਤਾਮਿਲਨਾਡੂ ਦੇ ਕੋਇੰਬਟੂਰ ਤੋਂ ਇੱਕ ਭਿਆਨਕ ਅਤੇ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ, ਜਿਸ ਨੇ ਪੂਰੇ ਸੂਬੇ 'ਚ ਕਾਨੂੰਨ ਵਿਵਸਥਾ ਦੀ ਸਥਿਤੀ 'ਤੇ ਗੰਭੀਰ ਸਵਾਲ ਖੜ੍ਹੇ ਕੀਤੇ ਹਨ। ਇੱਕ ਵਿਅਕਤੀ ਨੇ ਆਪਣੀ ਪਤਨੀ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਅਤੇ ਫਿਰ ਲਾਸ਼ ਨਾਲ ਸੈਲਫੀ ਲੈ ਕੇ ਆਪਣੇ ਵਟਸਐਪ ਸਟੇਟਸ 'ਤੇ ਕੈਪਸ਼ਨ ਦੇ ਨਾਲ ਪੋਸਟ ਕਰ ਦਿੱਤਾ ਤੇ ਨਾਲ ਲਿਖਿਆ ਕਿ "ਇਸ ਮੈਨੂੰ ਧੋਖਾ ਦਿੱਤਾ ਹੈ।" ਕੁਝ ਮਿੰਟਾਂ ਵਿੱਚ ਹੀ, ਖੂਨ ਨਾਲ ਲੱਥਪੱਥ ਫੋਟੋ ਵਾਇਰਲ ਹੋ ਗਈ।
ਮਹਿਲਾ ਹੋਸਟਲ 'ਚ ਵਾਪਰੀ ਘਟਨਾ
ਮ੍ਰਿਤਕਾ, ਜਿਸਦੀ ਪਛਾਣ ਸ਼੍ਰੀਪ੍ਰਿਆ (ਮੂਲ ਰੂਪ ਵਿੱਚ ਤਿਰੂਨੇਲਵੇਲੀ ਤੋਂ ਹੈ) ਵਜੋਂ ਹੋਈ ਹੈ, ਕਿਸੇ ਮਤਭੇਦ ਕਾਰਨ ਆਪਣੇ ਪਤੀ, ਬਾਲਾਮੁਰੂਗਨ ਤੋਂ ਵੱਖ ਰਹਿ ਰਹੀ ਸੀ। ਉਹ ਕੋਇੰਬਟੂਰ ਵਿੱਚ ਇੱਕ ਨਿੱਜੀ ਕੰਪਨੀ ਵਿੱਚ ਕੰਮ ਕਰਦੀ ਸੀ ਅਤੇ ਸ਼ਹਿਰ ਦੇ ਇੱਕ ਮਹਿਲਾ ਹੋਸਟਲ ਵਿੱਚ ਰਹਿ ਰਹੀ ਸੀ।
ਪੁਲਸ ਦੇ ਅਨੁਸਾਰ, ਬਾਲਾਮੁਰੂਗਨ ਐਤਵਾਰ ਦੁਪਹਿਰ ਨੂੰ ਆਪਣੇ ਕੱਪੜਿਆਂ ਵਿੱਚ ਦਾਤਰੀ ਲੁਕਾ ਕੇ ਹੋਸਟਲ ਪਹੁੰਚਿਆ। ਦੋਵਾਂ ਵਿਚਕਾਰ ਝਗੜਾ ਹੋ ਗਿਆ, ਜਿਸ ਤੋਂ ਬਾਅਦ ਬਾਲਾਮੁਰੂਗਨ ਨੇ ਅਚਾਨਕ ਦਾਤਰੀ ਕੱਢੀ, ਸ਼੍ਰੀਪ੍ਰਿਆ 'ਤੇ ਹਮਲਾ ਕਰ ਦਿੱਤਾ ਅਤੇ ਉਸਨੂੰ ਮਾਰ ਦਿੱਤਾ।
ਕਾਤਲ ਨੇ ਖੁਦ ਨੂੰ ਕਰਵਾਇਆ ਗ੍ਰਿਫਤਾਰ
ਕਾਤਲ ਪਤੀ ਦੀਆਂ ਹਰਕਤਾਂ ਇੱਥੇ ਹੀ ਨਹੀਂ ਰੁਕੀਆਂ। ਹੈਰਾਨ ਕਰਨ ਵਾਲੀ ਗੱਲ ਹੈ ਕਿ ਕਤਲ ਤੋਂ ਬਾਅਦ, ਉਸਨੇ ਸ਼੍ਰੀਪ੍ਰਿਆ ਦੇ ਖੂਨ ਨਾਲ ਲੱਥਪੱਥ ਸਰੀਰ ਨਾਲ ਇੱਕ ਸੈਲਫੀ ਲਈ ਅਤੇ ਇਸਨੂੰ ਆਪਣੇ ਵਟਸਐਪ ਸਟੇਟਸ 'ਤੇ ਕੈਪਸ਼ਨ ਦੇ ਨਾਲ ਪੋਸਟ ਕੀਤਾ, "ਇਸ ਨੇ ਮੈਨੂੰ ਧੋਖਾ ਦਿੱਤਾ।" ਉਸਦੇ ਚਿਹਰੇ 'ਤੇ ਕੋਈ ਪਛਤਾਵਾ ਨਹੀਂ ਸੀ।
ਇਹ ਭਿਆਨਕ ਫੋਟੋ ਵਾਇਰਲ ਹੋ ਗਈ, ਜਿਸ ਨਾਲ ਹੋਸਟਲ 'ਚ ਦਹਿਸ਼ਤ ਫੈਲ ਗਈ। ਹਾਲਾਂਕਿ, ਬਾਲਾਮੁਰਗਨ ਭੱਜਿਆ ਨਹੀਂ ਸਗੋਂ ਪੁਲਸ ਦੇ ਆਉਣ ਦੀ ਉਡੀਕ ਕੀਤੀ। ਪੁਲਸ ਨੇ ਉਸਨੂੰ ਮੌਕੇ 'ਤੇ ਹੀ ਗ੍ਰਿਫ਼ਤਾਰ ਕਰ ਲਿਆ ਤੇ ਕਤਲ ਦਾ ਹਥਿਆਰ ਬਰਾਮਦ ਕਰ ਲਿਆ। ਸ਼ੁਰੂਆਤੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਬਾਲਾਮੁਰਗਨ ਨੂੰ ਆਪਣੀ ਪਤਨੀ 'ਤੇ ਕਿਸੇ ਹੋਰ ਆਦਮੀ ਨਾਲ ਪ੍ਰੇਮ ਸਬੰਧ ਹੋਣ ਦਾ ਸ਼ੱਕ ਸੀ।
ਇਸ ਭਿਆਨਕ ਕਤਲ ਨੇ ਤਾਮਿਲਨਾਡੂ ਦੀ ਰਾਜਨੀਤੀ ਵਿੱਚ ਭੂਚਾਲ ਲਿਆ ਦਿੱਤਾ ਹੈ। ਵਿਰੋਧੀ ਪਾਰਟੀਆਂ ਸੱਤਾਧਾਰੀ ਡੀਐੱਮਕੇ ਸਰਕਾਰ 'ਤੇ ਕਾਨੂੰਨ ਵਿਵਸਥਾ ਨੂੰ ਵਿਗੜਨ ਅਤੇ ਔਰਤਾਂ ਦੀ ਸੁਰੱਖਿਆ ਕਰਨ ਵਿੱਚ ਅਸਫਲ ਰਹਿਣ ਦਾ ਦੋਸ਼ ਲਗਾ ਰਹੀਆਂ ਹਨ। ਇਸ ਦੌਰਾਨ, ਡੀਐੱਮਕੇ ਸਰਕਾਰ ਅਤੇ ਰਾਜ ਪੁਲਸ ਦਾ ਕਹਿਣਾ ਹੈ ਕਿ ਇਹ ਘਟਨਾਵਾਂ ਨਿੱਜੀ ਦੁਸ਼ਮਣੀ ਕਾਰਨ ਵਾਪਰੀਆਂ ਹਨ ਅਤੇ ਹਰ ਮਾਮਲੇ 'ਚ ਤੁਰੰਤ ਕਾਰਵਾਈ ਕੀਤੀ ਜਾ ਰਹੀ ਹੈ ਤਾਂ ਜੋ ਜਲਦੀ ਨਿਆਂ ਅਤੇ ਵੱਧ ਤੋਂ ਵੱਧ ਸਜ਼ਾ ਯਕੀਨੀ ਬਣਾਈ ਜਾ ਸਕੇ।
ਨੈਸ਼ਨਲ ਕ੍ਰਾਈਮ ਰਿਕਾਰਡ ਬਿਊਰੋ (ਐੱਨਸੀਆਰਬੀ) ਦੇ ਤਾਜ਼ਾ ਅੰਕੜਿਆਂ ਦੇ ਅਨੁਸਾਰ, ਤਾਮਿਲਨਾਡੂ ਵਿੱਚ ਹਰ ਰੋਜ਼ ਔਸਤਨ 52 ਔਰਤਾਂ ਘਰੇਲੂ ਹਿੰਸਾ ਜਾਂ ਜਿਨਸੀ ਹਮਲੇ ਦਾ ਸ਼ਿਕਾਰ ਹੁੰਦੀਆਂ ਹਨ। ਇਸ ਮਾਮਲੇ ਨੇ ਇੱਕ ਗੰਭੀਰ ਸਵਾਲ ਖੜ੍ਹਾ ਕੀਤਾ ਹੈ। ਜਦੋਂ ਕਾਤਲ ਭੱਜਣ ਦੀ ਬਜਾਏ, ਲਾਸ਼ ਨਾਲ ਸੈਲਫੀ ਲੈਣ ਅਤੇ ਸੋਸ਼ਲ ਮੀਡੀਆ 'ਤੇ ਪੋਸਟ ਕਰਨ ਦੀ ਹਿੰਮਤ ਕਰਦਾ ਹੈ ਤਾਂ ਕਾਨੂੰਨ ਦਾ ਕਿੰਨਾ ਕੁ ਡਰ ਰਹਿੰਦਾ ਹੈ?
