PM ਮੋਦੀ ਨੇ ''ਫੌਦਾ'' ਦੇ ਸਿਤਾਰਿਆਂ ਨਾਲ ਲਈ ਸੈਲਫੀ, ਬੋਲੇ- ''ਅੰਡਰਕਵਰ ਦੀ ਲੋੜ ਨਹੀਂ''

ਨਵੀਂ ਦਿੱਲੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਆਪਣੇ ਇਜ਼ਰਾਈਲ ਦੌਰੇ ਦੇ ਦੂਜੇ ਦਿਨ ਇੱਕ ਵੱਖਰੇ ਅੰਦਾਜ਼ ਵਿੱਚ ਨਜ਼ਰ ਆਏ। ਪੀਐਮ ਮੋਦੀ ਨੇ ਨੈੱਟਫਲਿਕਸ ਦੀ ਪ੍ਰਸਿੱਧ ਇਜ਼ਰਾਈਲੀ ਸੀਰੀਜ਼ 'ਫੌਦਾ' (Fauda) ਦੀ ਸਟਾਰ ਕਾਸਟ ਨਾਲ ਮੁਲਾਕਾਤ ਕੀਤੀ ਅਤੇ ਉਨ੍ਹਾਂ ਨਾਲ ਇਕ ਖਾਸ ਸੈਲਫੀ ਵੀ ਸਾਂਝੀ ਕੀਤੀ।

ਪ੍ਰਧਾਨ ਮੰਤਰੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ X 'ਤੇ ਤਸਵੀਰ ਪੋਸਟ ਕਰਦਿਆਂ ਮਜ਼ਾਕੀਆ ਅੰਦਾਜ਼ ਵਿੱਚ ਲਿਖਿਆ, "ਸ਼ੁਕਰ ਹੈ ਕਿ ਇਸ ਮੁਲਾਕਾਤ ਲਈ ਸਿਰਫ਼ ਇੱਕ ਸੈਲਫੀ ਦੀ ਲੋੜ ਸੀ, ਕਿਸੇ ਅੰਡਰਕਵਰ ਮਿਸ਼ਨ ਦੀ ਨਹੀਂ"। ਇਸ ਮੁਲਾਕਾਤ ਦੌਰਾਨ ਸੀਰੀਜ਼ ਦੇ ਮੁੱਖ ਕਲਾਕਾਰ ਲਿਓਰ ਰਾਜ਼ (Lior Raz), ਹਿਸ਼ਾਮ ਸੁਲੇਮਾਨ ਅਤੇ ਇਟਜ਼ਿਕ ਕੋਹੇਨ ਮੌਜੂਦ ਸਨ। ਦੱਸ ਦੇਈਏ ਕਿ 'ਫੌਦਾ' ਇਜ਼ਰਾਈਲ ਡਿਫੈਂਸ ਫੋਰਸਿਜ਼ ਦੇ ਅਸਲ ਤਜ਼ਰਬਿਆਂ 'ਤੇ ਅਧਾਰਤ ਇੱਕ ਸਪਾਈ-ਥ੍ਰਿਲਰ ਸੀਰੀਜ਼ ਹੈ, ਜੋ ਭਾਰਤ ਵਿੱਚ ਵੀ ਕਾਫੀ ਮਕਬੂਲ ਹੈ ਅਤੇ ਇਸਦਾ ਹਿੰਦੀ ਰੀਮੇਕ 'ਤਣਾਅ' (Tanaav) ਸਾਲ 2022 ਵਿੱਚ ਬਣਾਇਆ ਗਿਆ ਸੀ।

ਦੌਰੇ ਦੇ ਦੂਜੇ ਦਿਨ ਪੀਐਮ ਮੋਦੀ ਨੇ ਇਜ਼ਰਾਈਲ ਦੇ ਅਧਿਕਾਰਤ ਹੋਲੋਕਾਸਟ ਮੈਮੋਰੀਅਲ 'ਯਾਦ ਵਾਸ਼ੇਮ' (Yad Vashem) ਦਾ ਦੌਰਾ ਕੀਤਾ। ਉਨ੍ਹਾਂ ਨੇ ਨਾਜ਼ੀਆਂ ਵੱਲੋਂ ਮਾਰੇ ਗਏ 60 ਲੱਖ ਯਹੂਦੀਆਂ ਦੀ ਯਾਦ ਵਿੱਚ ਸ਼ਰਧਾਂਜਲੀ ਭੇਟ ਕੀਤੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਇਜ਼ਰਾਈਲ ਦੇ ਰਾਸ਼ਟਰਪਤੀ ਇਸਹਾਕ ਹਰਜ਼ੋਗ ਨਾਲ ਦੁਵੱਲੀ ਗੱਲਬਾਤ ਕੀਤੀ।

ਇਜ਼ਰਾਈਲੀ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨਾਲ ਸਾਂਝੀ ਪ੍ਰੈੱਸ ਕਾਨਫਰੰਸ ਦੌਰਾਨ ਪੀਐਮ ਮੋਦੀ ਨੇ ਵੱਡਾ ਐਲਾਨ ਕਰਦਿਆਂ ਕਿਹਾ ਕਿ ਦੋਵਾਂ ਦੇਸ਼ਾਂ ਨੇ ਆਪਣੇ ਰਿਸ਼ਤਿਆਂ ਨੂੰ 'ਸਪੈਸ਼ਲ ਸਟ੍ਰੈਟੇਜਿਕ ਪਾਰਟਨਰਸ਼ਿਪ' (Special Strategic Partnership) ਤੱਕ ਵਧਾਉਣ ਦਾ ਫੈਸਲਾ ਕੀਤਾ ਹੈ। ਪੀਐਮ ਮੋਦੀ ਨੇ ਕਿਹਾ ਕਿ ਭਾਰਤ ਅਤੇ ਇਜ਼ਰਾਈਲ ਦੇ ਸਬੰਧ ਡੂੰਘੇ ਭਰੋਸੇ, ਸਾਂਝੇ ਲੋਕਤੰਤਰੀ ਮੁੱਲਾਂ ਅਤੇ ਮਨੁੱਖੀ ਸੰਵੇਦਨਾਵਾਂ ਦੀ ਮਜ਼ਬੂਤ ਨੀਂਹ 'ਤੇ ਟਿਕੇ ਹੋਏ ਹਨ।

Thankfully, this interaction required only a selfie, no undercover work! #Fauda pic.twitter.com/u1tqG3RztB

— Narendra Modi (@narendramodi) February 26, 2026