ਮਹਾਕੁੰਭ ''ਚ ਪਾਕਿਸਤਾਨ ਤੋਂ ਪਹੁੰਚਿਆ ਹਿੰਦੂ ਸ਼ਰਧਾਲੂਆਂ ਦਾ ਜੱਥਾ, ਲਾਈ ਆਸਥਾ ਦੀ ਡੁੱਬਕੀ

ਮਹਾਕੁੰਭ- ਉੱਤਰ ਪ੍ਰਦੇਸ਼ ਦੇ ਪ੍ਰਯਾਗਰਾਜ 'ਚ ਚੱਲ ਰਹੇ ਮਹਾਕੁੰਭ 'ਚ ਆਸਥਾ ਦੀ ਡੁੱਬਕੀ ਲਾਉਣ ਲਈ ਦੁਨੀਆ ਦੇ ਦੇਸ਼ਾਂ ਤੋਂ ਵੱਡੀ ਗਿਣਤੀ 'ਚ ਲੋਕ ਪਹੁੰਚ ਰਹੇ ਹਨ। ਮਹਾਕੁੰਭ ਦੀ ਵਿਸ਼ਾਲਤਾ ਬਾਰੇ ਸੋਸ਼ਲ ਮੀਡੀਆ 'ਤੇ ਵੇਖ ਅਤੇ ਸੁਣ ਕੇ ਪਾਕਿਸਤਾਨੀ ਦੇ ਸਨਾਤਨੀ ਲੋਕ ਵੀ ਖੁਦ ਨੂੰ ਇੱਥੇ ਆਉਣ ਤੋਂ ਰੋਕ ਨਹੀਂ ਸਕੇ ਹਨ। ਪਾਕਿਸਤਾਨ ਦੇ ਸਿੰਧ ਸੂਬੇ ਤੋਂ 68 ਹਿੰਦੂ ਸ਼ਰਧਾਲੂਆਂ ਦਾ ਜੱਥਾ ਵੀਰਵਾਰ ਨੂੰ ਇੱਥੇ ਪਹੁੰਚਿਆ ਅਤੇ ਸੰਗਮ 'ਚ ਡੁੱਬਕੀ ਲਾਈ। ਜਾਣਕਾਰੀ ਮੁਤਾਬਕ ਪਾਕਿਸਤਾਨ ਤੋਂ ਆਏ ਸਾਰੇ ਸ਼ਰਧਾਲੂਆਂ ਨੇ ਪਵਿੱਤਰ ਸੰਗਮ ਵਿਚ ਇਸ਼ਨਾਨ ਕਰ ਕੇ ਆਪਣੇ ਪੂਰਵਜਾਂ ਦੀ ਆਤਮਾ ਦੀ ਸ਼ਾਂਤੀ ਲਈ ਅਰਦਾਸ ਕੀਤੀ।

ਪਿਛਲੇ ਸਾਲ ਅਪ੍ਰੈਲ ਮਹੀਨੇ 250 ਲੋਕ ਪਾਕਿਸਤਾਨ ਤੋਂ ਪ੍ਰਯਾਗਰਾਜ ਆਏ ਸਨ ਅਤੇ ਗੰਗਾ ਵਿਚ ਡੁੱਬਕੀ ਲਾਈ ਸੀ। ਇਸ ਵਾਰ ਸਿੰਧ ਸੂਬੇ ਦੇ 6 ਜ਼ਿਲ੍ਹਿਆਂ- ਗੋਟਕੀ, ਸੱਕਰ, ਖੈਰਪੁਰ, ਸ਼ਿਕਾਰਪੁਰ, ਕਰਜਕੋਟ ਅਤੇ ਜਾਟਾਬਲ ਤੋਂ 68 ਲੋਕ ਆਏ ਹਨ, ਜਿਨ੍ਹਾਂ 'ਚੋਂ 50 ਦੇ ਕਰੀਬ ਲੋਕ ਪਹਿਲੀ ਵਾਰ ਮਹਾਕੁੰਭ ​ ਆਏ ਹਨ।

ਇੱਥੇ ਆਉਣ ਦੀ ਬਹੁਤ ਇੱਛਾ ਸੀ: ਪਾਕਿਸਤਾਨੀ ਸ਼ਰਧਾਲੂ

ਇਸ ਤੋਂ ਪਹਿਲਾਂ ਅੱਜ ਸੈਕਟਰ-9 ਸਥਿਤ ਸ੍ਰੀ ਗੁਰੂਕ੍ਰਿਸ਼ਨੀ ਕੈਂਪ ਵਿਚ ਸਿੰਧ ਸੂਬੇ ਤੋਂ ਆਏ ਗੋਬਿੰਦ ਰਾਮ ਮਖੀਜਾ ਨੇ ਕਿਹਾ ਜਦੋਂ ਤੋਂ ਅਸੀਂ ਪਿਛਲੇ ਦੋ-ਤਿੰਨ ਮਹੀਨਿਆਂ ਤੋਂ ਮਹਾਕੁੰਭ ​​ਬਾਰੇ ਸੁਣਿਆ ਹੈ, ਸਾਡੇ ਇੱਥੇ ਆਉਣ ਦੀ ਬਹੁਤ ਇੱਛਾ ਸੀ। ਅਸੀਂ ਆਪਣੇ ਆਪ ਨੂੰ ਆਉਣ ਤੋਂ ਨਹੀਂ ਰੋਕ ਸਕੇ। ਮਖੀਜਾ ਨੇ ਕਿਹਾ ਕਿ ਮੈਂ ਇੱਥੇ ਆਨੰਦ ਲੈ ਰਿਹਾ ਹਾਂ, ਮੈਂ ਬਹੁਤ ਖੁਸ਼ੀ ਮਹਿਸੂਸ ਕਰ ਰਿਹਾ ਹਾਂ। ਇੱਥੇ ਅਨੁਭਵ ਨੂੰ ਬਿਆਨ ਕਰਨ ਲਈ ਮੇਰੇ ਕੋਲ ਸ਼ਬਦ ਨਹੀਂ ਹਨ। ਇੱਥੇ ਆ ਕੇ ਅਸੀਂ ਸਨਾਤਨ ਧਰਮ ਵਿਚ ਜਨਮ ਲੈ ਕੇ ਮਾਣ ਮਹਿਸੂਸ ਕਰ ਰਹੇ ਹਾਂ।

ਪਹਿਲੀ ਵਾਰ ਆਪਣੇ ਧਰਮ ਨੂੰ ਜਾਣਨ ਦਾ ਮੌਕਾ ਮਿਲਿਆ: ਸੁਰਭੀ

ਸਿੰਧ ਸੂਬੇ ਦੇ ਗੋਟਕੀ ਦੀ ਰਹਿਣ ਵਾਲੀ 11ਵੀਂ ਜਮਾਤ ਦੀ ਵਿਦਿਆਰਥਣ ਸੁਰਭੀ ਨੇ ਦੱਸਿਆ ਕਿ ਉਹ ਪਹਿਲੀ ਵਾਰ ਭਾਰਤ ਆਈ ਹੈ ਅਤੇ ਪਹਿਲੀ ਵਾਰ ਕੁੰਭ ਵਿਚ ਆਈ ਹੈ। ਉਨ੍ਹਾਂ ਕਿਹਾ ਇੱਥੇ ਪਹਿਲੀ ਵਾਰ ਸਾਨੂੰ ਆਪਣੇ ਧਰਮ ਨੂੰ ਡੂੰਘਾਈ ਨਾਲ ਦੇਖਣ ਅਤੇ ਸਮਝਣ ਦਾ ਮੌਕਾ ਮਿਲ ਰਿਹਾ ਹੈ। ਅਸੀਂ ਬਹੁਤ ਵਧੀਆ ਮਹਿਸੂਸ ਕਰ ਰਹੇ ਹਾਂ। ਸਿੰਧ ਤੋਂ ਆਈ ਪ੍ਰਿਅੰਕਾ ਨੇ ਕਿਹਾ ਕਿ ਮੈਂ ਪਹਿਲੀ ਵਾਰ ਭਾਰਤ ਅਤੇ ਇਸ ਮਹਾਕੁੰਭ 'ਚ ਆਈ ਹਾਂ। ਇੱਥੇ ਸਾਡੇ ਸੱਭਿਆਚਾਰ ਨੂੰ ਦੇਖਣਾ ਇਕ ਬਹੁਤ ਹੀ ਚੰਗਾ ਅਨੁਭਵ ਹੈ। ਮੈਂ ਇਕ ਘਰੇਲੂ ਔਰਤ ਹਾਂ ਅਤੇ ਭਾਰਤ ਆਉਣਾ ਮੇਰਾ ਸਭ ਤੋਂ ਵੱਡਾ ਸੌਭਾਗ ਹੈ। ਅਸੀਂ ਉੱਥੇ ਪੈਦਾ ਹੋਏ ਅਤੇ ਮੁਸਲਮਾਨਾਂ ਵਿਚ ਰਹੇ। ਸਿੰਧ ਪ੍ਰਾਂਤ ਵਿੱਚ ਹਿੰਦੂਆਂ ਨਾਲ ਓਨਾ ਵਿਤਕਰਾ ਨਹੀਂ ਹੁੰਦਾ ਜਿੰਨਾ ਮੀਡੀਆ ਦਿਖਾ ਰਿਹਾ ਹੈ। ਪਰ ਸਾਨੂੰ ਇੱਥੇ ਆਪਣੇ ਸੱਭਿਆਚਾਰ ਨੂੰ ਦੇਖਣ ਦਾ ਮੌਕਾ ਮਿਲ ਰਿਹਾ ਹੈ।

ਵੀਜ਼ਾ ਪ੍ਰਕਿਰਿਆ ਨੂੰ ਸਰਲ ਬਣਾਉਣ ਦੀ ਮੰਗ

ਭਾਰਤ ਵਿਚ CAA ਕਾਨੂੰਨ ਬਾਰੇ ਆਪਣੇ ਵਿਚਾਰ ਜ਼ਾਹਰ ਕਰਦਿਆਂ ਸੱਕਰ ਜ਼ਿਲ੍ਹੇ ਤੋਂ ਨਿਰੰਜਨ ਚਾਵਲਾ ਨੇ ਕਿਹਾ ਸਿੰਧ ਵਿਚ ਅਜਿਹਾ ਮਾਹੌਲ ਨਹੀਂ ਹੈ ਕਿ ਲੋਕ ਭਾਰਤੀ ਨਾਗਰਿਕਤਾ ਲਈ ਅਰਜ਼ੀ ਦੇ ਸਕਣ ਚਾਵਲਾ ਨੇ ਕਿਹਾ ਮੈਂ ਭਾਰਤ ਸਰਕਾਰ ਨੂੰ ਵੀਜ਼ਾ ਜਾਰੀ ਕਰਨ ਦੀ ਪ੍ਰਕਿਰਿਆ ਨੂੰ ਥੋੜ੍ਹਾ ਆਸਾਨ ਬਣਾਉਣ ਲਈ ਬੇਨਤੀ ਕਰਨਾ ਚਾਹਾਂਗਾ। ਮੌਜੂਦਾ ਸਮੇਂ ਵਿਚ ਵੀਜ਼ਾ ਮਨਜ਼ੂਰ ਹੋਣ ਵਿਚ ਛੇ ਮਹੀਨੇ ਦਾ ਸਮਾਂ ਲੱਗਦਾ ਹੈ। ਹਾਲਾਂਕਿ ਇੱਥੇ ਆਏ ਸਮੂਹ ਨੂੰ ਆਸਾਨੀ ਨਾਲ ਵੀਜ਼ਾ ਦਿੱਤਾ ਗਿਆ, ਜਿਸ ਲਈ ਅਸੀਂ ਭਾਰਤ ਸਰਕਾਰ ਦਾ ਧੰਨਵਾਦ ਕਰਦੇ ਹਾਂ।