LRGMA ਦੀ ਐਗਜ਼ੀਬਿਸ਼ਨ ਵਿਚ ਦੇਸ਼ ਭਰ ਤੋਂ ਆਏ ਹੋਲਸੇਲ ਕਾਰੋਬਾਰੀ, ਦੂਜੇ ਦਿਨ 5726 ਤੱਕ ਪਹੁੰਚਿਆ ਅੰਕੜਾ

ਲੁਧਿਆਣਾ (ਭੁਪੇਸ਼): ਲੁਧਿਆਣਾ ਰੈਡੀਮੇਡ ਗਾਰਮੈਂਟਸ ਮੈਨੂਫੈਕਚਰਰਜ਼ ਐਸੋਸੀਏਸ਼ਨ (ਐੱਲ.ਆਰ.ਜੀ.ਐੱਮ.ਏ.) ਵੱਲੋਂ ਇੰਡੀਆ ਦੀ ਸਭ ਤੋਂ ਵੱਡੀ ਆਟਮ ਵਿੰਟਰ ਬੀ-2-ਬੀ ਗਾਰਮੈਂਟ ਐਗਜ਼ੀਬਿਸ਼ਨ ਪੀ.ਏ.ਯੂ. ਲੁਧਿਆਣਾ ਵਿਚ ਚੱਲ ਰਹੀ ਹੈ। ਇਸ 3 ਰੋਜ਼ਾ ਆਟਮ/ਵਿੰਟਰ ਰੈਡੀਮੇਡ ਗਾਰਮੈਂਟ ਐਗਜ਼ੀਬਿਸ਼ਨ ਦੇ ਦੂਜੇ ਦਿਨ ਪੰਜਾਬ ਤੋਂ ਇਲਾਵਾ ਦਿੱਲੀ, ਗਵਾਲੀਅਰ, ਕਾਨਪੁਰ, ਜੰਮੂ-ਕਸ਼ਮੀਰ, ਰਾਜਸਥਾਨ, ਪੱਛਮੀ ਬੰਗਾਲ, ਮਹਾਰਾਸ਼ਟਰ, ਬੈਂਗਲੁਰੂ, ਕੋਲਕਾਤਾ, ਸ਼ਾਹਜਹਾਨਪੁਰ, ਹਰਿਆਣਾ, ਉੱਤਰ ਪ੍ਰਦੇਸ਼, ਐੱਮ.ਪੀ. ਤੋਂ ਇਲਾਵਾ ਵੱਖ-ਵੱਖ ਰਾਜਾਂ ਤੋਂ 5726 ਹੋਲਸੇਲ ਕਾਰੋਬਾਰੀਆਂ ਨੇ ਲੁਧਿਆਣਾ ਦੇ ਬਣੇ ਰੈਡੀਮੇਡ ਗਾਰਮੈਂਟਸ ਦੀ ਲੇਟੈਸਟ ਰੇਂਜ ਨੂੰ ਦੇਖਿਆ ਅਤੇ ਆਰਡਰ ਬੁੱਕ ਕਰਵਾਏ।

ਦੂਜੇ ਦਿਨ ਪੰਜਾਬ ਦੇ ਸਾਬਕਾ ਮੰਤਰੀ ਭਾਰਤ ਭੂਸ਼ਣ ਆਸ਼ੂ, ਕੌਂਸਲਰ ਸੰਨੀ ਭੱਲਾ, ਹਲਕਾ ਵੈਸਟ ਯੂਥ ਕਾਂਗਰਸ ਦੇ ਪ੍ਰਧਾਨ ਚੈਰੀ ਆਹਲੂਵਾਲੀਆ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਆਸ਼ੂ ਨੇ ਐੱਲ.ਆਰ.ਜੀ.ਐੱਮ.ਏ. ਵੱਲੋਂ ਲਗਾਈ ਗਈ ਇਸ ਪ੍ਰਦਰਸ਼ਨੀ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਅਜਿਹੇ ਆਯੋਜਨਾਂ ਨਾਲ ਪੰਜਾਬ ਦੀ ਹੌਜ਼ਰੀ ਇੰਡਸਟਰੀ ਪ੍ਰਫੁੱਲਿਤ ਹੋਵੇਗੀ। ਐਗਜ਼ੀਬਿਸ਼ਨ ਦੇ ਟਾਈਟਲ ਸਪਾਂਸਰ ਫੋਮੇਰਾ ਗਰੁੱਪ ਦੇ ਚੇਅਰਮੈਨ ਦਰਸ਼ਨ ਲਾਲ ਬਵੇਜਾ, ਐੱਮ.ਡੀ. ਅਰੁਣ ਬਵੇਜਾ ਅਤੇ ਗੋਲਡ ਸਪਾਂਸਰ ਸਾਰਕ ਨਿਟਸ ਦੇ ਕਰਨ ਕੋਚਰ ਸਨ। ਐਸੋਸੀਏਸ਼ਨ ਦੇ ਚੇਅਰਮੈਨ ਦਰਸ਼ਨ ਲਾਲ ਗਾਬਾ, ਪ੍ਰਧਾਨ ਸੰਦੀਪ ਬਹਿਲ ਮਨੀ, ਮੈਂਟਰ ਏ.ਐੱਸ. ਦੁਆ, ਫਾਈਨਾਂਸ ਸੈਕਟਰੀ ਸੌਰਵ ਗੁਪਤਾ, ਜਨਰਲ ਸਕੱਤਰ ਅਮਨਦੀਪ ਸਿੰਘ, ਐਡਵਾਈਜ਼ਰ ਸ਼ੋਭਨ ਕੁਮਾਰ ਅਤੇ ਹੋਰਨਾਂ ਨੇ ਆਏ ਹੋਏ ਬਾਇਰਸ ਅਤੇ ਪਤਵੰਤਿਆਂ ਦਾ ਧੰਨਵਾਦ ਕੀਤਾ।

ਐੱਲ.ਆਰ.ਜੀ.ਐੱਮ.ਏ. ਨੇ ਦੇਸ਼ ਵਿਚ ਬਣਾਇਆ ਨਾਂ: ਰਾਜ ਅਰੋੜਾ ਮਿਡਾਸ

ਮਿਡਾਸ ਨਿਟਸ ਦੇ ਰਾਜ ਅਰੋੜਾ ਨੇ ਪ੍ਰਬੰਧਕਾਂ ਦੇ ਸ਼ਾਨਦਾਰ ਯਤਨਾਂ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇਸ ਨਾਲ ਰੈਡੀਮੇਡ ਗਾਰਮੈਂਟ ਇੰਡਸਟਰੀ ਨੂੰ ਨਵੀਆਂ ਉਚਾਈਆਂ ਅਤੇ ਸਫਲਤਾ ਪ੍ਰਾਪਤ ਕਰਨ ਦਾ ਮਾਰਗ ਮਿਲਿਆ ਹੈ। ਐੱਲ.ਆਰ.ਜੀ.ਐੱਮ.ਏ. ਨੇ ਦੇਸ਼ ਦੀਆਂ ਨਾਮੀ ਐਗਜ਼ੀਬਿਸ਼ਨਾਂ ਵਿਚ ਟਾਪ-5 ਵਿਚ ਨਾਂ ਬਣਾ ਲਿਆ ਹੈ। ਇਸ ਪਲੇਟਫਾਰਮ 'ਤੇ ਸਾਰੇ ਪ੍ਰਮੁੱਖ ਬ੍ਰਾਂਡਾਂ ਨੇ ਨਵੀਂ ਟੈਕਨਾਲੋਜੀ ਨਾਲ ਬਣੇ ਰੈਡੀਮੇਡ ਗਾਰਮੈਂਟ ਦੀ ਲੇਟੈਸਟ ਰੇਂਜ ਨੂੰ ਪੇਸ਼ ਕੀਤਾ ਅਤੇ ਆਰਡਰ ਬੁੱਕ ਕੀਤੇ। ਇਸ ਨਾਲ ਇੰਡਸਟਰੀ ਵਿਚ ਕੰਮ ਦੀ ਰਫ਼ਤਾਰ ਵਧੇਗੀ, ਲੱਖਾਂ ਲੋਕਾਂ ਨੂੰ ਰੁਜ਼ਗਾਰ ਮਿਲੇਗਾ ਅਤੇ ਹੌਜ਼ਰੀ ਇੰਡਸਟਰੀ ਕਾਰਨ ਮਾਨਚੈਸਟਰ ਦਾ ਦਰਜਾ ਹਾਸਲ ਕਰਨ ਵਾਲਾ ਲੁਧਿਆਣਾ ਨਵੀਆਂ ਬੁਲੰਦੀਆਂ ਨੂੰ ਛੂਹ ਸਕੇਗਾ।